ކޮވިޑް-19 އިން ރައްކާތެރިވުމުގެ ގޮތުން ސްޓެލްކޯ މުވައްޒަފުންގެ ތެރެއިން މަސައްކަތުގެ ދައިރާގެ ގޮތުން ކަސްޓަމަރުންނާއި ސީދާ މުއާމަލާތް ކުރަންޖެހޭ ފަރާތްތަކުން އޮފީސް މާހައުލުގައި މަސައްކަތް ކުރާ ގޮތަށް ހަމަޖައްސައިފިއެވެ.
ސްޓެލްކޯއިން ބުނީ މުޅި ދުނިޔޭގައި ހަލުވި ކަމާއެކު ފެތުރެމުންދާ ކޮވިޑް-19، ނުރައްކާތެރި ރޯގާއާއި ގުޅިގެން މުވައްޒަފުންގެ ސަލާމަތާއި ރައްކާތެރިވުމަށް ގިނަ ފިޔަވަޅުތަކެއް އަޅަމުންދާ ކަމަށެވެ.
އެގޮތުން ސްޓެލްކޯގައި މަސައްކަތް ކުރާ މުވައްޒަފުންގެ ތެރެއިން، ފްރޮންޓް ޑެސްކުގައި މަސައްކަތްކުރާ މުވައްޒަފުންނާއި، މަސައްކަތުގެ ދައިރާގެ ގޮތުން ކަސްޓަމަރުންނާއި ސީދާ މުއާމަލާތް ކުރަންޖެހޭ ފަރާތްތަކުގެ ތެރެއިން ނޭވާލާ ނިޒާމާއި، ފުއްޕާމޭގެ ބަލިތަކަށް ފަރުވާ ހޯދަމުންދާ މުވައްޒަފުންނާއި، ދިގު މުއްދަތަކަށް ބޭސް ބޭނުންކުރަންޖެހޭ ފަދަ ބައްޔެއް ކުރިމަތިވެފައިވާ މުވައްޒަފުންގެ އިތުރުން، މާބަނޑު އަދި ދެ އަހަރު ނުވާ ތުއްތު ކުދިން ގެންގުޅޭ މުވައްޒަފުން ކަސްޓަމަރުންނާއި، ސީދާ ބައްދަލުވެ، މުއާމަލާތް ކުރުމުގެ ބަދަލުގައި އޮފިސް މާހައުލުގައި މަސައްކަތް ކުރަންޖެހޭ ގޮތަށް މެނޭޖްމަންޓުން ނިންމާފައިވާ ކަމަށް ސްޓެލްކޯއިން މައުލޫމާތުދެއެވެ.
ސްޓެލްކޯއިން ބުނީ މުވައްޒަފުންނާއި، އާންމުންގެ ސަލާމަތާއި ރައްކާތެރިކަމަށް އެޅެން ހުރި ހުރިހާ ފިޔަވަޅެއް މިހާރު ވެސް ކުންފުނިން އަޅަމުންދާ ކަމަށެވެ.
ސްޓެލްކޯއިން މިނިންމުން ނިންމާފައިވާއިރު، މިމަހުގެ 19 އިން 26 އަށް ސަރުކާރުގެ ހުރިހާ އޮފީހެއް ބަންދަކުރުމަށް ވަނީ ނިންމާފައެވެ.
