މަތީ ތައުލީމުގެ ބިލަށް ހިޔާލު ހޯދުމަށް ހުޅުވާލައިފި
16 މާރިޗު 2020 | ހޯމަ 14:45ހިޔާލު ހުށައަޅަން ހުޅުވާލާފައިވަނީ މާޗް 15 އިން ފެށިގެން
ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަން
ދިވެހިރާއްޖޭގެ މަތީ ތައުލީމުގެ ބިލަށް ހިޔާލު ހޯދުމަށް ހަޔަރ އެޑިއުކޭޝަން މިނިސްޓްރީން އިއުލާންކޮށްފި އެވެ.
ހޯމަ ދުވަހު ހަޔަރ އެޑިއުކޭޝަނުން ކޮށްފައިވާ ބަޔާނެއްގައި އެ ބިލަށް ހިޔާލަށް ހުށައަޅަން 15 މާޗްއިން ފެށިގެން 18 މާޗްގެ 12:00 ނިޔަލަށް ހުޅުވާލެވިފައިވާ ކަމަށެވެ. އެ މިނިސްޓްރީން ބުނީ، ވަކި ބައިތަކަށްވެސް ހިޔާލު ހުށަހެޅިދާނެ ކަމަށެވެ.
މަތީ ތައުލީމާއި ތަމްރީނާއި ބެހޭ ބިލުގެ މަގްސަދަކީ މަތީ ތައުލީމާއި ތަމްރީނުގެ ފުރުސަތު ވީހާވެސް ގިނަ ރައްޔިތުންތުންނަށް ލިބޭނެ ގޮތަށް ސިޔާސަތުތައް އެކަށައެޅުމާއި، މަތީ ތައުލީމު ދޭ ފަރާތްތަކަށް އަދި ދާއިރާގައި ޝާމިލުވާން ބޭނުންވާ ފަރާތްތަކަށް ގާނޫނެއްގެ ތެރެއިން މަގުފަހިވެފައި އޮތުމާއި، އަދި އެ ފަދަ ތަންތަނުން ދޭ މަތީ ތައުލީމާއި ތަމްރީނަކީ ވަކި މިންގަނޑުތަކަކަށް ގިންތި ކުރެވި ފެންވަރު ކަށަވަރު ކުރެވިފައި އޮތުން ކަމަށް ހަޔަރ އެޑިއުކޭޝަން މިނިސްޓްރީން ބުންޏެވެ.
އެ މިނިސްޓްރީން ދެކޭ ގޮތުގައި މަތީ ތަޢުލީމާއި ބެހޭ ބިލެއް ގާނޫނާކަށް ވެގެން އައުމުން ރާއްޖޭގައި މަތީ ތައުލީމުގެ ފުރުސަތުތައް ފަހިވެ ފެންވަރު ރަނގަޅުވެ ވަރަށް ބޮޑުތަން ފުރިހަމަވެގެންދާނެ ކަމަށެވެ.
ހަޔަރ އެޑިއުކޭޝަނުން ބުނީ، އެފަދަ ބިލެއް ފާސްވެ ގާނޫނަކަށް ވުމުގެ ނަތީޖާއަކަށް ވެގެން ދާނީ ދިވެހި ރައްޔިތުންނަށް ރާއްޖޭގައި ލިބޭ މަތީ ތައުލީމާއި ތަމްރީނުގެ ފެންވަރާއި މެދު ކަށަވަރުކަން އުފެދި، ޔަގީންކަން އިތުރުވެގެން ދިއުން ވެގެންދާނެ ކަމަށެވެ.
މަތީ ތައުލީމުގެ ބިލަކީ 2019 ވަނަ އަހަރުގެ ފަހު ދައުރުގައި ފުރަތަމަ ކިޔުން އިއްވާފައިވާ ބިލެކެވެ.
