ސަފާރީން ޕޮޒިޓިވްވި މީހުން އެކަހެރިކުރާނީ ލ. އަތޮޅުގައި ކަމަށް ޓާސްކް ފޯހުގެ ތަރުޖަމާނު މަބްރޫކް އަޒީޒު ވިދާޅުވެއްޖެ އެވެ.
ކޮވިޑް-19ގެ އެންމެފަހުގެ މަޢުލޫމާތު ދިނުމަށް އާދިއްތަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ އައިލެންޑް ސަފާރީ 01 އިން ކޮވިޑް-19 އަށް ޕޮޒިޓިވްވި މީހުން މިވަގުތަށް އެކަހެރިކުރާނީ ލ އަތޮޅުގައި ކަމަށާއި، އެސަފާރީ އޮތީ ފުވައްމުލައް ސިޓީ ކައިރީގައި ކަމަށެވެ.
މަބްރޫކް ވިދާޅުވީ ސަފާރީ މިހާރު ލ. އަތޮޅަށް ދަތުރު ކުރަމުންދާ ކަމަށެވެ. އަދި އެ ސަފާރީގައި ޕޮޒިޓިވްވެފައިވާ ދެ މީހުން މިވަގުތަށް ލ. އަތޮޅުގެ ކަރަންޓީނު ފެސިލިޓީއެއްގައި ބެހެއްޓުމަށް ނިންމާފައިވާ ކަމަށް މަބްރޫކް ވިދާޅުވިއެވެ.
ކޮވިޑް-19 ޖެހުނު މީހުންގެ އަދަދުވަނީ 13 އަށް އަރާފަ އެވެ. އެ އެންމެންނަކީވެސް ބިދޭސީންނެވެ. އަދި މިހާތަނަށް މި ބައްޔަށް ދިވެއްސަކު ޕޮޒިޓިވްވެފައެއް ނުވެއެވެ.
