ކޮވިޑް-19: ފާސްޓް އެންޑް ފިއުރިއަސް ރިލީސް ކުރުން އަންނަ އަހަރަށް ފަސްކޮށްފި

ދުނިޔޭގެ އެކި ކަންކޮޅުތަކުގައި ފެތުރެމުންދާ ކޮވިޑް-19 އާ ގުޅިގެން ފްރެންޗައިޒް ފިލްމު ސީރީޒެއް ކަމަށްވާ ފާސްޓް އެންޑް ފިއުރިއަސް ރިލީސް ކުރުން އަންނަ އަހަރަށް ފަސްކޮށްފިއެވެ.

މި ސީރީޒްގެ އައު ފިލްމު ރިލީސް ކުރުން ކުރިން ރާވާފައި އޮތީ، މިއަހަރުގެ މެއި މަހުގެ 22 ވަނަ ދުވަހަށެވެ. ނަމަވެސް ރިޕޯޓުތައް ބުނާގޮތުން ފިލްމު ރިލީސް ކުރުން ފަސްކޮށް، މިހާރު ކަނޑައަޅާފައިވަނީ އަންނަ އަހަރުގެ އޭޕްރީލް މަހުގެ 2 ވަނަ ދުވަހު ފިލްމު ރިލީޒް ކުރުމަށެވެ.

ރިޕޯޓުތައް ބުނާގޮތުން ކޮވިޑް-19 އާ ގުޅިގެން ހޮލީވުޑްގެ ގިނަ ފިލްމުތަކެއް ރިލީޒް ކުރުން ފަސްކޮށްފައިވާއިރު، "ޕީޓަރ ރެބިޓް 2" ރިލީސް ކުރުންވެސް ވަނީ ފަސްކޮށްފައެވެ. އެގޮތުން މާރޗު 27 ގައި ރިލީޒް ކުރަން އޮތް ފިލްމު މިހާރު ވަނީ އޯގަސްޓަށް ފަސްކޮށްފައެވެ.

ތަޖުރިބާކާރުން ބުނާ ގޮތުގައި ކޮވިޑް-19 އާ ގުޅިގެން އަންނަ ބަދަލުތަކުގެ ސަބަބުން މިއަހަރު ބޮކްސް އޮފީހަށް ލިބޭ އާމްދަނީވެސް 5 ބިލިއަން ޑޮލަރަށްވުރެ ދަށަށް ދާނެއެވެ. އެގޮތުން މިއީ ބޮކްސް އޮފީހުގެ ތާރީޚުގައިވެސް އާމްދަނީއަށް މިހާ ބޮޑު ގެއްލުމެއް ލިބޭ ފުރަތަމަ ފަހަރުކަމަށް ރިޕޯޓުތައް ބުނެއެވެ.

ބޮކްސް އޮފީހަށް ނިމިދިޔަ އަހަރު ވަނީ 42.5 ބިލިއަން ޑޮލަރުގެ އާމްދަނީއެއް ލިބިފައެވެ.