އަނަންތަރާ ދިގު ރިސޯޓުން ކޮވިޑް-19 އަށް ޝައްކު ކުރެވުނު ދިވެހި މީހާ ހުޅުމާލޭގައި އުޅެފައިވޭ: މަބްރޫކް

އަނަންތަރާ ދިގު ރިސޯޓުން ކޮވިޑް-19 އަށް ޝައްކު ކުރެވުނު ދިވެހި މީހާ ހުޅުމާލޭގައި އުޅެފައިވާ ކަމަށް ކޮވިޑް-19 ގައި ޓާސްކް ފޯހުގެ ތަރުޖަމާން މަބްރޫކް އަޒީޒު ވިދާޅުވެއްޖެ އެވެ.

މިހާރު ކުރިޔަށްދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބްރޫކް ވިދާޅުވީ މިކަމާއި ގުޅިގެން ކޮންޓެކްޓް ޓްރޭސިންގެ މަސައްކަތް ކުރެވެމުންދާ ކަމަށާއި އޭގެ ތެރެއިން ސިމްޕްޓަމް ހުރި ފަރާތެއް ފަރުކޮޅުފުއްޓަށް ގެންދިއުމުގެ މަސައްކަތް މިހާރު ކުރަމުންދާ ކަމަށެވެ.

މީގެކުރިން އެޗްޕީއޭއިން ބުނެފައިވަނީ އަނަންތަރަ ދިގު މޯލްޑިވްސް ރިސޯޓުން ކޮވިޑް-19 އަށް ޕޮޒިޓިވްވި ބަޔަކާއި ޑައިރެކްޓް ކޮންޓެކްޓްވި ދިވެއްސަކު އެކަހެރި ކޮށްފައިވާ ކަމަށެވެ.

އަނަންތަރަ ދިގު ރިސޯޓުން މީހަކު އެކަހެރި ކޮށްފައިވާއިރު، އެ ރަށުން ދެ މީހަކު ވަނީ ޕޮޒިޓިވްވެފައެވެ. އެ ދެ މީހުންނާއެކު ރާއްޖެއިން ކޮވިޑް-19 ޖެހުނު މީހުންގެ އަދަދުވަނީ 13 އަށް އަރާފަ އެވެ. އެ އެންމެންނަކީވެސް ބިދޭސީންނެވެ. އަދި މިހާތަނަށް މި ބައްޔަށް ދިވެއްސަކު ޕޮޒިޓިވްވެފައެއް ނުވެއެވެ.