ރައްޔިތުންގެ ތާއީދު ހޯދަން ސަރުކާރުން ބޭނުންވާ ކަމާއިމެދު ޝައްކު: ސައުދުﷲ ހިލްމީ
2 ޖުލައި 2017 | އާދީއްތަ 12:15މިއީ ސަރުކާރުން ރައްޔިތުންނަށް ދޭ އަނިޔާއެއް
ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ
ގދ. ތިނަދޫގައި ހުރި ސަރުކާރުގެ އެންމެ ބޮޑު ސަޕޯޓަރަށް ސަރުކާރުން ދެމުންދާ އަނިޔާތައް ފެނިފައި ރައްޔިތުންގެ ތާއީދު ހޯދަން ސަރުކާރުން ބޭނުންވާ ކަމާއިމެދު ޝައްކު އުފެދޭ ކަމަށް ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ ވިދާޅުވެއްޖެއެވެ.
ސައުދުﷲ މިހެން ވިދާޅުވީ ތިނަދޫ އިންޖީނު ގޭގައި ސީނިއާ މުވައްޒިފަކު ހއ. ތުރާކުނު އިންޖީނުގެއަށް ބަދަލު ކުރުމަށް ނިންމާ އަންގާފައިވާ ޗިޓްގެ ފޮޓޯއާ އެކު އޭނާ މިއަދު ކުރައްވާފައިވާ ޓުވީޓެއްގައެވެ.
ސައުދު ވިދާޅުވެފައިވަނީ އެ މުވައްޒިފަކީ މިސަރުކާރަށް ވަރަށް ބޮޑަށް ތާއީދު ކުރާ މީހެއް ކަމަށާއި ނަމަވެސް އޭނާގެ ވަޒިފާ އެހެން ރަށަކަށް ބަދަލު ކުރުމަކީ ދޭ އަނިޔާއެއް ކަމަށެވެ.
އެގޮތުން ސައުދު ވަނީ ފެނަކަ ކޯޕަރޭޝަނަށް ވެސް ވަރަށް ބޮޑަށް ފާޑުވިދާޅުވެފަ އެވެ. އަދި އެ ކުންފުންޏަކީ ދައުލަތުގެ ކުންފުންޏެއްތޯ ނުވަތަ އަމިއްލަ ކުންފުންޏެއްތޯ އާއި އަމިއްލަ ކުންފުނިތަކުން ވެސް އެހާ އަނިޔާވެރިކޮށް ކަންކަން ނުކުރާނެ ކަމަށް ވިދާޅުވެފައެވެ.
ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ އަނެއްކާ ވެސް ސަރުކާރަށް ފާޑުވިދާޅުވާން ފައްޓަވާފައިވާއިރު ދިއްދޫ ދާއިރާގެ މެމްބަރު އަބްދުއްލަތީފު ވެސް ވަނީ ސަރުކާރާ ދެކޮޅަށް ފާޑު ވިދާޅުވާން ފައްޓަވާފައެވެ.
މީގެ ކުރިންވެސް މި ދެމެމްބަރުން ވަނީ ރައީސް މައުމޫންއަށް ތާއީދުކޮށް ސަރުކާރަށް ފާޑުވިދާޅުވެފައެވެ.
އަދި ދުވަސްވަރަކީ އިދިކޮޅު ފަރާތްތަކުން ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރުގެ ވޯޓް އަނެއްކާ ވެސް ވެއްދުމަށް މަސައްކަތް ކުރާ ދަނޑިވަޅެކެވެ.
