އިލެކްޝަންސް ކޮމިޝަންގެ މެމްބަރުކަމަށް އަކްރަމްގެ ނަމާއެކު 4 ނަމެއް މަޖިލީހުގެ ތަޅުމަށް

އިލެކްޝަންސް ކޮމިޝަން (އީސީ) ގައި ހުސްވާ މެންބަރުކަމުގެ މަޤާމަށް ކުރިމަތިލެއްތި ބޭފުޅުންގެ ތެރެއިން އިންޓަވިއު އިން ފާސްވި 4 ފަރާތެއްގެ ނަން މަޖިލީހުގެ ތަޅުމަށް ފޮނުވުމަށް މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމައިފިއެވެ.

އިންޓަރވިއުގައި ބައިވެރިވެވަޑައިގެންނެވި ކޮމިޓީ މެމްބަރުންގެ 2/3 ވޯޓާއިއެކު ރައިސުލްޖުމްހޫރިއްޔާ މަޖިލީހަށް ފޮނުއްވި 4 ނަންވެސް ވަނީ ފާސްވެފައެވެ.

Advertisement

އިލެކްޝަންސް ކޮމިޝަނުގެ މެންބަރުކަމުގެ މަޤާމަށް ކުރިމަތިލެއްވި ބޭފުޅުންގެ ތެރެއިން މަޖިލީހުގެ ރުހުން ހޯއްދެވުމަށް ރައީސް ޞާލިހު ފޮނުއްވާފައިވާ ބޭފުޅުންގެ ތެރެއިން ލިސްޓުގެ އެއްވަނާގައި އޮތީ، ކޮމެޓީ ރިޕޯޓުގައި ވެސް އެންމެ ކުރީގައި އޮތް މިހާރުވެސް އެކޮމިޝަނުގެ ނައިބު ރައީސް އަދި އެ ކޮމިޝަނުގެ ތަރުޖަމާނު އަޙްމަދު އަކްރަމެވެ. ދެވަނާގައި އޮތީ، އިލެކްޝަންސް ކޮމިޝަނުގެ ކުރީގެ ނައިބު ރައީސް އަޙްމަދު ފަޔާޒު ހަސަނެވެ. އެކޮމިޝަނުގެ ކުރީގެ ޤާނޫނީ ވަކީލު މަރިޔަމް ޙަނީފާ ޚާލިދުގެ ނަން ތިންވަނާގައި އޮތްއިރު، ހަތަރު ވަނާގައި އޮތީ އަޙްމަދު މަންސޫރުއެވެ.

އިލެކްޝަންސް ކޮމިޝަނުގައި އަކްރަމް އަދާކުރަމުންދާ މަޤާމުގެ މުއްދަތު މި މާރޗު މަހުގެ 23 ވަނަ ދުވަހަށް ހަމަވާނެ އެވެ. އެހެންކަމުން އަކްރަމް މިވަނީ ދެވަނަ ދައުރަކަށްވެސް އެކޮމިޝަނުގެ މެންބަރުކަމަށް ކުރިމަތި ލައްވާފަ އެވެ. އަކްރަމަކީ، 2018 ވަނަ އަހަރުގެ ރިޔާސީ އިންތިޚާބާއި، 19 ވަނަ ރައްޔިތުންގެ މަޖިލީހުގެ އިންތިޚާބު، އަމާންކަމާއި އޮމާންކަމާއެކު ބޭއްވުމުގައި އިލެކްޝަންސް ކޮމިޝަނުގައި އިސް ދައުރެއް އަދާކުރެއްވި އެކޮމިޝަނުގެ މެންބަރުގެ އިތުރުން ތަރުޖަމާނު ވެސް މެއެވެ.