މިއަދު 18:00 އިން ފެށިގެން 14 ދުވަހުގެ މުއްދަތަށް ރިސޯޓުތަކުން ރަށްރަށަށް ދަތުރުކުރުން ހުއްޓާލުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އަންގައިފިއެވެ.

އެޗްޕީއޭ އިން ހޮނިހިރު ދުވަހު އާއްމުކޮށްފައިވާ ބަޔާނެއްގައި ބުނެފައިވަނީ، އާންމު ސިއްހީ ރައްކާތެރިކުރުމުގެ ގާނޫނުގެ ދަށުން ޑިރެކްޓަރ ޖެނެރަލް އޮފް ޕަބްލިކް ހެލްތަށް ލިބިގެންވާ ގާނޫނުގެ ދަށުން ރިސޯޓުތަކުން މީހުން ދިރިއުޅޭ އެއްވެސް ރަށަކަށް މީހުން ދަތުރުކުރުމާއި، ރާއްޖޭގެ އެހެން ރަށްރަށުން ރިސޯޓުތަކަށް މީހުން ދަތުރުކުރުން ހޮނިހިރު ދުވަހުގެ ހަޔަކުން ފެށިގެން 14 ދުވަހުގެ މުއްދަތަަށް ހުއްޓާލުމަށް އަންގާ ކަމަށެވެ.

ރާއްޖޭގެ ރިސޯޓުތަކުން މީހުން ދިރިއުޅޭ ރަށްރަަށަށް ދިޔުން މަނާކޮށްފައިވާއިރު، ކޮވިޑް-19 އިތުރަށް ފެތުރުނަ ނުދިޔުމަށްޓަކައި ސަރުކާރުން ދަނީ މުހިއްމު ފިޔަވަޅުތަކެއް އަޅަމުންނެވެ. ކޮވިޑް-19 އަށް ރާއްޖެއިން މިހާތަނަށް 10 މީހަކު ވަނީ ޕޮޒިޓިވްވެފައެވެ.

އެ ހުރިހާ އެންމެންނަކީވެސް ބިދޭސީންނެވެ. ކޮރޮނާވައިރަހަށް ޕޮޒިޓިވްވި މީހުންނަކީ ތަފާތު ހަތަރު ރިސޯޓަކުން ޕޮޒިޓިވްވި މީހުންނެވެ. ރާއްޖެއިން އެންމެ ފުރަތަމަ އެ ބަލި ފެނިފައިވަނީ ކްރައުން އެންޑް ޗަމްޕާ ރިސޯޓްސް އިން ޅ. އަތޮޅުގައި ހިންގަމުން އަންނަ ކުރެއްދޫ އައިލެންޑް ރިސޯޓްސް އެންޑް ސްޕާއިންނެވެ.

އެ ރިސޯޓުގައި ކޮވިޑް-19 ފެތުރިފައިވަނީ ޗުއްޓީ ހޭދަކުރަން ދިޔަ އިޓަލީގެ ދެ ފަތުރުވެރިންގެ ފަރާތުންނެވެ. އެމީހުން އެ ބައްޔަށް ޕޮޒިޓިވްކަން ރިސޯޓަށް އަންގާފައިވަނީ އެނބުރި އިޓަލީ އަށް ދިޔުމަށް ފަހުއެވެ. އެއާއި އެކު އެ ރިސޯޓުން މިހާތަނަށް ތިން މީހަކު ވަނީ ކޮވިޑް-19 އަށް ޕޮޒިޓިވްވެފައެވެ. އިޓަލީގެ ދެ ފަތުރުވެރިން ބަލިވެ ހުއްޓާ ރާއްޖެއިން ފުރުވަލުމުގައި އެއްވެސް ފަރާތެއްގެ އިހުމާލެއްވޭތޯ ބަލައިދިނުމަށް ޕްރޮސެކިއުޓަރ ޖެނެރަލް (ޕީޖީ) ވަނީ ފުުލުހަށް އަމުރުކޮށްފައެވެ. އަދި ފުލުހުން ދަނީ މިހާރު އެ މައްސަލަ ބަލަމުންނެވެ.