ކޮވިޑް-19: މަނީލާގައި ތިބި ދިވެހި ދަރިވަރުން އެކަތިގަނޑަކަށްވެ އެ ކުރާ ހިތްވަރަށް ސާބަސް!

ކޮވިޑް-19 ގެ ބިރުވެރިކަން މުޅި ދުނިޔެއަށް ކުރިމަތިވެފައިވާ މި ދަނޑިވަޅުގައި ހުރިހާ ޤައުމަކުންވެސް މަސައްކަތް ކުރަމުންދަނީ ރައްކާތެރިކަމުގެ ފިޔަވަޅުތައް ވަރުގަދަކޮށް ވައިރަސްއިން ސަލާމަތްވާނެ މަގެއް ހޯދުމަށެވެ. ރާއްޖެއިންވެސް މަސައްކަތް ކުރަމުންދަނީ އެކި ޤައުމުތަކާއި ގުޅިގެން، ދިވެހިންގެ ރައްކާތެރިކަން ކަށަވަރު ކުރުމަށް އަޅަންޖެހޭ ފިޔަވަޅުތައް ވަރުގަދަ ކުރުމަށެވެ.

އެކި ޤައުމުތަކުގައި ގިނަ ދިވެހިން ވެސް އުޅެމުންދާއިރު، ބުރާސްފަތި ދުވަހުގެ ހަވީރު އިވިގެންދިޔަ ޚަބަރަކީ ކޮވިޑް-19 ގެ ބިރުވެރިކަން ފެތުރި، ފިލިޕީންސްގެ މަނީލާ ލޮކްޑައުން ކުރި ޚަބަރެވެ. އެއާއެކު ގިނަ ބައެއްގެ ހިތްތަކުގައި އުފެދިގެން ދިޔަ ސުވާލަކީ މަނީލާގައި ދިރިއުޅެމުންދާ އެތަކެއް ދިވެހި ދަރިވަރުންނެއްގެ ޙާލަކީ ކޮބައިބާއެވެ.

"ރާއްޖެއެމްވީ" އަށް މައުލޫމާތު ދެމުން މަނީލާގައި ތައުލީމު ހާސިލުކުރަމުންދާ ދިވެހި ދަރިވަރެއް ބުނީ، މަނީލާގައި 100 އަށްވުރެ ގިނަ ދިވެހި ދަރިވަރުން ތައުލީމު ހާސިލު ކުރަމުންދާއިރު، އޭގެ ތެރޭގައިވެސް ގިނައީ ސިއްޙީ ދާއިރާއިން މަތީ ތަޢުލީމު ހާސިލުކުރަމުންދާ ކުދިން ކަމަށެވެ. އެގޮތުން ގިނަ ދިވެހި ދަރިވަރުން ދިރިއުޅެމުންދަނީ މަނީލާގެ ސިޓީ ހޯލް ކައިރީގައިކަން ބަޔާންކޮށް، އެތަނުގައި އުޅެމުންދާ ބައެއް ދަރިވަރުން ވަނީ އެތަނުގެ ޙާލަތު 'ރާއްޖެއެމްވީ"އަށް ކިޔާދީފައެވެ.

މި ދަނޑިވަޅުގައި އެންމެ ބޮޑު ހާސްކަމެއްގެ ތެރޭގައި އުޅޭނީ ސިއްޙީ ދާއިރާގެ މަތީފަޑީގައި މަސައްކަތްކުރާ ސިއްޙީ އެހީތެރިންކަން ޔަޤީނެވެ. މުޅި ދުނިޔެއަށް ބަލާލި ކަމުގައިވިޔަސް މި ދަނޑިވަޅުގައި އެންމެ ބޮޑު ބިރުވެރިކަމެއްގެ ތެރޭގައި އުޅޭނީ ސިއްޙީ ދާއިރާގައި މަސައްކަތް ކުރާ ފަރާތްތަކެވެ. އެގޮތުން މަނީލާގައި ގިނަ ދަރިވަރުންތަކެއް މެޑިސިން ދާއިރާއިން ތައުލީމު ހާސިލުކުރަމުންދާއިރު، ގިނަ ދަރިވަރުން ދަނީ މި ޙާލަތުގެ ނާޒުކުކަން ވިސްނި، ހިތްވަރާއެކު އެކަމާ ކުރިމަތިލަމުންނެވެ.

މަނީލާގައި ތިބި ދިވެހި ދަރިވަރުންވެސް ދަނީ ކުރީބައިގައި އަމިއްލަ ފަރުދީ ޒިންމާ އަދާކޮށް، ތައްޔާރީ ފިޔަވަޅުތައް އަޅަމުންނެވެ. ހުރި ކަންބޮޑުވުންތަކާއެކުވެސް އަމިއްލައަށް އެޅެންހުރި މުހިއްމު ފިޔަވަޅުތައް ދަނީ އަޅަމުންނެވެ. އެގޮތުން މަނީލާގެ ސުޕަމާކެޓުތައް ފުރި ތޮއްޖެހެމުންދާ މި ދަނޑިވަޅުގައި ބޭރަށް ނުކުމެ އުޅުން ރައްކާތެރިނުވާނެތީ ހުރިހާ ދަރިވަރުން ދަނީ އެކަމަށް ސަމާލުވެ ތައްޔާރުވަމުންނެވެ.

އެގޮތުން ގޭތެރޭ ސާމާނާއި، ކެއްކުމަށް ބޭނުންވާ ސާމާނު ގިނަ ކުދިން ވަނީ މަހަކަށްވާވަރަށް ގޭގައި ރައްކާކޮށްފައެވެ. އަމިއްލަ ޤައުމު ނޫން ތަނެއްގައި ދިރިއުޅެމުންދާތީ ކޮންމެ ޙާލަތަކަށްވެސް ތައްޔާރުވެ ތިބުމުގެ ގޮތުންނެވެ.

މަނީލާގައި ތިބި ދިވެހި ދަރިވަރުންގެ ތެރެއިން ބައެއް ދަރިވަރުން އެނބުރި ރާއްޖެ އަންނަން ބޭނުންވާއިރު، އެ ދަރިވަރުންގެ އެންމެ ބޮޑު އެއް ކަންބޮޑުވުމަކީ ދިވެހި ދަރިވަރުންނަށް ހެލްތު އިންޝުއަރެންސް ނެތުމާއި، ކުޑަކޮށް ބަލިވިޔަސް ޑޮކްޓަރަށް ދައްކަން ދާ ޚަރަދު ބޮޑުކަމެވެ. އެއާއެކު މިފަދަ ހައްސާސް ދަނޑިވަޅެއްގައި ބަލިވެއްޖެނަމަ ދާނެ ޚަރަދަކީ ގިނަ ދަރިވަރުންގެ އެންމެ ބޮޑު ކަންބޮޑުވުމެވެ.

އޭގެ އިތުރުން، މާސްކު ނުލިބުމުގެ ދަތިކަމަކީވެސް އެކުދިން ފާހަގަކުރާ ކަންބޮޑުވުމެކެވެ. އޭގެ ތެރެއިން ބައެއް ކުދިން އެނބުރި ޤައުމަށް އަންނަން ބޭނުންވާ މައިގަނޑު ސަބަބަކީވެސް އެއީއެވެ.

މި ކަންބޮޑުވުންތަކާއެކުވެސް މަނީލާގައި ތިބި ދިވެހި ދަރިވަރުން ތިބީ ހިތްވަރާއެކު މި ޙާލަތުގެ ނާޒުކުކަން އެނގި، އެކަމަށް ތައްޔާރުވެގެންނެވެ. އޭގެ ތެރެއިން ބައެއް ކުދިން އެނބުރި ޤައުމަށް އައުމަށް މަސައްކަތް ކުރި ނަމަވެސް އެންމެންވެސް މި ދަނޑިވަޅުގެ ހައްސާސްކަން ޤަބޫލު ކުރެއެވެ. އެގޮތުން ފިލިޕީންސްގައި މި ވައިރަސް ފެތުރި މަރުވި މީހުންގެ ނިސްބަތްވެސް އިތުރުވަމުންދާއިރު، ފިލިޕީންސްގެ މަނީލާގައި ތިބި ދިވެހި ދަރިވަރުންގެ ހިތްވަރުން ނަމޫނާ ލިބިގަންނަން ޖެހެއެވެ. އެކުދިންގެ ހިތްވަރަށް ސާބަސްދޭ ވަރު ވެއެވެ.