ސަލްމާންގެ ރާދޭ އާއި އަކްޝޭގެ ސޫރްޔަވަންޝީ ރިލީޒްކުރުން އެއްދުވަހެއްގައި؟
14 މާރިޗު 2020 | ހޮނިހިރު 04:58އަކްޝޭ އާއި ސަލްމާންގެ ފިލްމް ކްލޭޝް ވެދާނެ ކަމަށް އެންމެ ފަހުގެ މީޑީއާ ރިޕޯޓްތައް ބުނޭ
ސަލްމާން ޚާން އާއި އަކްޝޭ ކުމާރު
ބޮލީވުޑްގެ ތަރި ސަލްމާން ޚާން މިވަގުތު ދަނީ އޭނާގެ އަންނަން އޮތް ފިލްމް "ރާދޭ: ޔުއަރ މޯސްޓް ވޯންޓެޑް ބާއީ" ރިލީޒް ކުރުމަށް ތައްޔާރު ވަމުންނެވެ.
މި އެކްޝަން ޑްރާމާ ހެދުމުގެ ވާހަކަ ދެކެވުނު ދުވަހުންފެށިގެން ނޫސްތަކުގެ ފަލަ ސުރުޚީތަކަށް މި ފިލްމާއި ގުޅޭ ޚަބަރުތަކަށް އަރަމުން ދެއެވެ.
އަނެއް ކޮޅުން އަކްޝޭ ދަނީ ފިލްމުގެ ޑައިރެކްޓަރ ރޯހިތު ޝެޓީއާއެކު އެނާގެ އަންނަން އޮތް ފިލްމު "ސޫރްޔަވަންޝީ" ރިލީޒްކުރުމަށް ތައްޔާރުވަމުނެވެ.
"ސޫރްޔަވަންޝީ" ގައި ރިލީޒް ކުރުމަށް ކުރިން ހަމަޖެހިފައި އޮތީ މިހިނގާ މާރޗު މަހުގެ 24 ވަނަ ދުވަހުއެވެ. ނަމަވެސް ކޮވިޑް-19 އާ ގުޅިގެން މި ފިލްމު ރިލީޒް ކުރުން ވަނީ ފަސްކޮށްފައެވެ.
އެހެންކަމުން އަކްޝޭ އާއި ސަލްމާނުގެ ފިލްމު ކްލޭޝް ވެދާނެ ކަމަށް އެންމެ ފަހުގެ މީޑީއާ ރިޕޯޓުތައް ބުނެއެވެ.
ޕްރަބޫ ދޭވާ ޑައިރެކްޓް ކުރާ ފިލްމު "ރާދޭ" ރިލީޒް ކުރުމަށް ހަމަޖެހިފައިވަނީ މިއަހަރުގެ މެއި މަހުގެ 22 ގައެވެ. "ސޫރްޔަވަންޝީ" ވެސް މި ދުވަހު ރިލީޒްކުރުމަށް ވާހަކަދެކެވެމުންދާކަމަށް ރިޕޯޓުތައް ބުނެއެވެ.
ސޫރްޔަވަންޝީ ގައި އަކްޝޭއާއެކު ލީޑްރޯލުން ފެނިގެންދާނީ ކެޓްރީނާ ކައިފްއެވެ. "ރާދޭ" ގައި ސަލްމާން ޚާނާއެކު ލީޑް ރޯލުން ފެނިގެންދާނީ ދިޝާ ޕަޓާނީއެވެ.
ކޮންމެއަކަސް މި ދެފިލްމު އެއްދުވަހެއްގައި ރިލީޒްކޮށްފިނަމަ އެންމެ ބޮޑު ތަރުޙީބެއް ލިބިގެންދަނީ ކޮންފިލްމަކަށްތޯ އެނގިގެން ދާނެއެވެ.
