ދެކުނު އެމެރިކާގެ ޤައުމެއް ކަމަށްވާ އުރުގުއޭ އަދި މެދު އެމެރިކާގެ ގައުމެއްކަމަށްވާ ގުއާޓިމާލާއިން ކޮވިޑް-19 ގެ ޕޮޒިޓިވް ކޭސްތަކެއް ފެނިއްޖެކަމަށް އެ 2 ގައުމުން ހާމަކޮށްފިއެވެ.

އުރުގުއޭގެ ހެލްތު މިނިސްޓްރީން ހާމަކޮށްފައިވާ ގޮތުން އެޤައުމުން 4 މީހަކު ވަނީ ކޮރޯނާވައިރަސް އަށް ޕޮޒިޓިވްވެފައެވެ. އަދި މިއީ އެޤައުމުން ފުރަތަމައަށް ފެނުނު ހަތަރު ކޭސް ކަމަށާއި، އެމީހުންނަކީ މި މަހުގެ ކުރީ ކޮޅު އިޓަލީގެ މިލާނުން އައި ބައެއް ކަމަށް އެގައުމުގެ ހެލްތު މިނިސްޓްރީން ވަނީ ބުނެފައެވެ.

އުރުގުއޭގެ ހެލްތު މިނިސްޓްރީން ބުނީ މި އެންމެންގެ ވެސް ހާލު ރަނގަޅުކަމަށާއި އެމީހުން ތިބީ ގޭގައި ބައިތިއްބާފައި ކަމަށެވެ.

މީގެ އިތުރުން ގުއާޓިމާލާގެ ރައީސް އެލެޖެންޑްރީ ގިއަމްމައްޓޭ ހުކުރު ދުވަހު އެޤައުމުން ވެސް ކޮރޯނާވައިރަސްއަށް ޕޮޒިޓިވްވެފައިވާ މީހަކު ފެނިފައިވާ ކަން ހާމަކުރައްވާފައެވެ.

ގިއަމްމައްޓޭ ވިދާޅުވީ ކޮރޯނާވައިރަސް ޖެހިފައިވަނީ ފިރިހެނަކަށް ކަމަށާއި، އޭނާ އަކީ މިދިޔަ ހަފުތާގެ ބުދަ ދުވަހު އިޓަލީއަށް ދަތުރުކޮށްފައައި މީހެއް ކަމަށާއި، އޭނާ އަނބުރާ ޤައުމަށް އައިސްފައިވަނީ އެއޮރޯމެކްސިކޯގެ ފުލައިޓަކުން ކަމަށެވެ.

ޓްވިޓަރގައި ޢާންމުކުރި ބަޔާނެއްގައިގުއާޓިމާލާގެ ރައީސް ވަނީ މި ދަނޑިވަޅުގައި ހާސް ނުވުމަށާއި، ރައްކާތެރިވުމުގެ ގޮތުން ފިޔަވަޅު އެޅުމަށް ގޮވާލައްވާފައެވެ.