ޖަރުމަން ލީގުގެ މެޗުތައް ފަސްކޮށްފި

ޔޫރަޕުގައި މިހާރު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން ޖަރުމަން ލީގުގެ މެޗުތައް ފަސްކޮށްފިއެވެ.

ޖަރުމަން ފުޓުބޯޅައިގެ މައި އިދާރާއިން ބުނީ ޖަރުމަން ލީގު ފަސްކުރީ މިހާރު ޖަރުމަންގައި ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން ކަމަށާއި ލީގުގެ ކުޅުން އަލުން ފަށާނީ އޭޕްރީލް ދެވަނަ ދުވަހު ކަމަށެވެ.

ޖަރުމަން ލީގުގެ މެޗުތައް ކުރިން ކުޅެން ނިންމީ ސަޕޯޓަރުން ނުވައްދައެވެ.

ޖަރުމަންގެ އިތުރުން ކޮވިޑް-19 ގެ ސަބަބުން ޔޫރަޕުގެ ބޮޑެތި ފަސް ލީގުގެ މެޗުތައް ވަނީ ފަސްކޮށްފައެވެ. އެގޮތުން ޕްރިމިއާ ލީގު، އިޓާލިއަން ލީގު، ސްޕެނިޝް ލީގު، ފްރެންޗް ލީގު ހިމެނެއެވެ. މީގެ އިތުރުން ޔޫރަޕުގެ އެންމެ ބޮޑު ދެ މުބާރާތް ކަމަށްވާ ޔުއެފާ ޗެމްޕިއަންސް ލީގާއި ޔުއެފާ ޔުރޮޕާ ލީގުގެ މެޗުތައް ފަސްކުރުމަށް ވެސް ވަނީ ނިންމައިފައެވެ.

ކޮރޯނާވައިރަސް (ކޮވިޑް-19) އަށް ޔޫރަޕުގެ ބައެއް ކުޅުންތެރިން ޕޮޒިޓިވްވެފައިވާއިރު، މި ވައިރަސްގެ ސަބަބުން އާސެނަލް، ޔުވެންޓަސް، މެންޗެސްޓާ ސިޓީ، ވަޓްފޯޑް، އެވެޓަން އަދި ރެއާލް މެޑްރިޑްގެ ކުޅުންތެރިން ވަނީ ކަރަންޓީނުކޮށްފައެވެ.

ދުނިޔޭގެ ގައުމުތަކުން 125،000 އަށް ވުރެ ގިނަ މީހުން ކޮރޯނާވައިރަސް (ކޮވިޑް-19) އަށް ޕޮޒިޓިވްވެފައިވާއިރު މި ވައިރަސް މިހާރު ދުނިޔޭގެ 118 ގައުމަކަށް ވަނީ ފެތުރިފައެވެ. އަދި މިވައިރަސްގައި މަރުވި މީހުންގެ އަދަދު 4600 އަށް ވުރެ ވަނީ އިތުރުވެފައެވެ.

ޖަރުމަނުން މިހާތަނަށް 3000 އަށްވުރެ ގިނަ މީހުން ކޮރޯނާވައިރަސް (ކޮވިޑް-19) އަށް ޕޮޒިޓިވްވެފައިވާއިރު، 7 މީހުން ވަނީ މަރުވެފައެވެ.