ދުނިޔޭގައި މިހާރު ހަލުވި ކަމާއެކު ފެތުރެމުންދާ ކޮރޯނާވައިރަސް (ކޮވިޑް-19)އާ ގުޅިގެން އަދި ރާއްޖޭގައިވެސް ކޮރޯނާވައިރަސް އުޅޭތީ، އިންތިހާބު ފަސްކުރަން ނިންމިއިރު، އިދިކޮޅު ޕީޕީއެމް-ޕީއެންސީ ކޯލިޝަނާ މަޝްވަރާ ނުކުރައްވާކަމަށް ވިދާޅުވެ ޕީއެންސީގެ ރައީސް އަބްދުއްރަހީމް އެހައްދަވަނީ ކަނޑައެޅިގެން އިތުރުފުޅު ކަމަށް އިލެކްޝަންސް ކޮމިޝަނުގެ ނާއިބު ރައީސް އަހުމަދު އަކްރަމް ވިދާޅުވެއްޖެ އެވެ.
އިލެކްޝަންސް ކޮމިޝަނުގެ ނައިބު ރައީސް އަދި އެކޮމިޝަނުގެ ތަރުޖަމާނު އަހުމަދު އަކްރަމް ހުކުރު ދުވަހު "ރާއްޖެއެމްވީ" އަށް ވިދާޅުވީ، އަންނަ އޭޕްރީލް މަހުގެ 4 ވަނަ ދުވަހު ބޭއްވުމަށް ނިންމާފައިވާ ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ އިންތިހާބު އޭޕްރީލް މަހުގެ 18 އަށް ފަސްކުރަން ނިންމާފައިވަނީ އެލެކްޝަންސް ކޮމިޝަނުން އެކުލަވާލާފައިވާ ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ އިންތިހާބާ ގުޅޭ ގައުމީ ލަފާދޭ ކޮމެޓީގެ ލަފާގެ މަތިން އިލެކްޝަންސް ކޮމިޝަނުން ކަމަށެވެ.
އަކްރަމް ވިދާޅުވީ އިންތިހާބާބެހޭ ގައުމީ ލަފާދޭ ކޮމެޓީއެކުލަވާލާފައިވާނީ ސިޔާސީ ޕާޓީތަކާއި ކަމާބެހޭ ދައުލަތުގެ މުއައްސަސާތަކާއި އަދި މަދަނީ ބައެއް ޖަމިއްޔާތަށް ހިމެނޭ ގޮތަށް ކަމަށެވެ. އެގޮތުން ޕީޕީއެމާއި ޕީއެންސީގެ އިސްވެރިންވެސް އިންތިހާބާބެހޭ ގައުމީ ލަފާދޭ ކޮމެޓީގައި ހިމެނިވަޑައިގަންނަވާ ކަމަށެވެ. އަދި ގައުމީ ލަފާދޭ ކޮމެޓީގެ ބައްދަލުވުންތަކުގައި ޕީޕީއެމާއި ޕީއެންސީންވެސް ބައިވެރިވާ ކަމަށް އަކްރަމް ވިދާޅުވި އެވެ.
އިންތިހާބު ފަސްކުރުމުގެ ކުރިން ޕީޕީއެމް-ޕީއެންސީ އާ މަޝަވަރާ ނުކުރައްވާތޯ، ނޫސްވެރިޔަކު ކުރި ސުވާލަކަށް ޖަވާބު ދެއްވަމުން އަބްދުއްރަހީމް ވިދާޅުވީ، ޕީޕީއެމާއި ޕީއެންސީއާއެކު އިލެކްޝަންސް ކޮމިޝަނުން މަޝްވަރާ ކޮށްފައި ނުވާކަމަށެވެ.
އިލެކްޝަންސް ކޮމިޝަނުން ވަނީ އިންތިހާބާބެހޭ ގައުމީ ލަފާދޭ ކޮމެޓީ އިންތިހާބަށް ތައްޔާރުވުމާއެކު އެކުލަވާލާފަ އެވެ. އަދި ގައުމީ ލަފާދޭ ކޮމެޓީގެ ބައްދަލުވުންތައް މީޑިއާތަކަށް ހުޅުވާލައިގެން، ޓީވީން ލައިވް ކުރުމުގެ ފުރުސަތުވެސް އިލެކްޝަންސް ކޮމިޝަނުން ހުޅުވާލާފައި ވެއެވެ.
އިލެކްޝަންސް ކޮމިޝަނަކުން އަޅުގަނޑުމެންނަކާ މަޝްވަރާއެއް ނުކުރައްވާ. އެބޭފުޅުން، އޮންނަ އުސޫލެއްގެ ތެރެއިން އެކަން އެކުރެއްވީ،ޕީއެންސީގެ ރައީސް އަބްދުއްރަހީމް އަބްދުﷲ
އަބްދުއްރަހީމް ވިދާޅުވީ، ކޮވިޑް-19 އިތުރަށް ފެތުރުން ކޮންޓްރޯލް ކުރުމަށްޓަކައި، ރާއްޖޭގައި ބުރާސްފަތި ދުވަހު އިއުލާން ކުރި ސިއްހީ ނުރައްކަލުގެ ހާލަތާ ގުޅިގެން ކައުންސިލްތަކުގެ އިންތިޚާބު ފަސްކޮށްފައިވާއިރު، އެކަމުގައި އިލެކްޝަންސް ކޮމިޝަން (އީސީ) އިން އަމަލުކުރީ ރަނގަޅަށް ނޫން ކަމަށެވެ.
އަންނަ މަހުގެ 18 އަށް އިންތިހާބު ފަސްކުރަން އިލެކްޝަންސް ކޮމިޝަނުން ނިންމުމުން މިހާލަތުގައި ކެމްޕެއިން ކުރުމުގެ ފުރުސަތު ނެތް ކަމަށްވެސް އަބްދުއްރަހީމް ވަނީ ވިދާޅުވެފަ އެވެ.
އަންނަ މަހުގެ ހަތަރު ވަނަ ދުވަހު ބޭއްވުމަށް ކުރިން ނިންމާފައިވާ އިންތިޚާބު މިހާރު ވަނީ އެ މަހުގެ 18 އަށް ފަސްކޮށްފަ އެވެ. ގާނޫނު ބުނާގޮތުން މިހާރު މި ހިނގާ ކައުންސިލްތަކުގެ ދައުރު ހަމަ ވުމުގެ އެއްމަސް ދުވަސް ކުރިން އިންތިޚާބު ބާއްވަން ޖެހެ އެވެ.
އިލެކްޝަންސް ކޮމިޝަނުން ބުނެފައިވަނީ އެކޮމިޝަނަށް ލިބިދޭ ބާރުގެ ދަށުން އިންތިހާބު ފަސްކުރެވޭނެ އެންމެ ފަހު ތާރީހަކީ އޭޕްރީލް މަހުގެ 18 ކަމަށެވެ.
ގާނޫނުގައި ބުނާ މުއްދަތުގައި އިންތިހާބު ނުބޭއްވޭފަދަ ހާލަތެއް މެދުވެރިވެއްޖެނަމަ އިންތިހާބު ފަސްކުރެވޭނީ ކޯޓު އަމުރެއްގެ ދަށުން ނެވެ.
އިލެކްޝަންސް ކޮމިޝަނުންބުނީ އިންތިހާބު ބޭއްވުމަށް މިހާރު ވަރަށް ގިނަ ޚަރަދުތަކެއް ކުރެވިފައިވާއިރު، އިތުރަށް އިންތިހާބު ފަސްކުރާނަމަ އިތުރު 25 މިލިއަން ރުފިޔާ އިންތިހާބު ބޭއްވުމަށް ބޭނުންވާނެ ކަމަށެވެ.
