ގއ. ވިލިނގިލީގައި މީހަކު މަރުވި މައްސަލައެއްގައި 6 މީހަކު ހައްޔަރުކޮށްފި
ހުކުރު ދުވަހުގެ ރޭ ފަތިހު ހޮސްޕިޓަލަށް ގެންދިޔައިރުވެސް އޮތީ މަރުވެފަ
ގއ. އަތޮޅު ވިލިނގިލީގައި ހުންނަ އަތޮޅު ހޮސްޕިޓަލް
ގއ. އަތޮޅު ހޮސްޕިޓަލަށް ފަތިހު ގެންދިޔަ ޒުވާނަކު މަރުވެފައި އޮތް މައްސަލައަކާ ގުޅިގެން ހަ މީހަކު ހައްޔަރުކޮށްފި އެވެ.
ފުލުހުން ބުނި ގޮތުގައި ހުކުރު ދުވަހުގެ ފަތިހު، 5:00 ހާއިރު ގއ. އަތޮޅު ހޮސްޕިޓަލަށް 24 އަހަރުގެ ދިވެހި ފިރިހެނަކު ގެންދިޔައިރު ވެސް އޮތީ މަރުވެފަ އެވެ. އެގޮތުން އެ ޒުވާނާ ހޮސްޕިޓަލަށް ގެންދިޔައިރު ވެސް މަރުވެފައި އޮތް މައްސަލަ ފުލުހުންނަށް ހުށަހަޅާފައިވަނީ ފަތިހު 5:09 ހާއިރު ކަމަށްވެސް ފުލުހުން ބުނެއެވެ.
ފުލުހުން އިތުރަށް ބުނި ގޮތުގައި މި މައްސަލައިގައި ތުހުމަތު ކުރެވޭ ހަ މީހަކު، ކޯޓު އަމުރެއްގެ ދަށުން ފުލުހުން ވަނީ ހުކުރު ދުވަހުގެ ވަގުތެއްގައި ހައްޔަރުކޮށްފަ އެވެ.
އެގޮތުން ހައްޔަރުކޮށްފައި ވަނީ 24 އަހަރުގެ ދެ މީހަކާއި 18 އަހަރުގެ މީހެއްގެ އިތުރުން 23 އަހަރުގެ މީހަކާއި 21 އަދި 20 އަހަރުގެ މީހެއް ކަމަށް ފުލުހުން ބުނެ އެވެ.
ބައެއް ނޫސްތަކުގައި ރިޕޯޓުކޮށްފައިވާ ގޮތުގައި، މަރުވެފައި އޮތްވާ ފެނުނީ އެރަށު ހައިޑްޕާކް، މުހައްމަދު މުސްތަފާ ނަމަކަށް ކިޔާ ޒުވާނެކެވެ.
