ލޯކަލް ކައުންސިލް އިންތިހާބު 18 އެޕްރިލް އަށް ފަސްކޮށްފި
އިންތިހާބު ފަސްކުރީ 18 އެޕްރިލްއަށް
އިލެކްޝަންސް ކޮމިޝަންގެ ރައީސް އަހްމަދު ޝަރީފް
އަންނަ އެޕްރިލް މަހުގެ 4 ގައި ބާއްވަން ހަމަޖެހިފައިވާ ލޯކަލް ކައުންސިލް އިންތިހާބު، 18 އެޕްރިލްއަށް ފަސްކުރިކަން އިލެކްޝަންސް ކޮމިޝަނުން އިއުލާންކޮށްފިއެވެ.
އިލެކްޝަންސް ކޮމިޝަނުން ކައުންސިލް އިންތިހާބު ފަސްކުރީ، އަންނަ މަހުގެ 18 ވަނަ ދުވަހަށެވެ. އިލެކްޝަންސް ކޮމިޝަންގެ ރައީސް ޝަރީފް ވިދާޅުވީ އޭޕްރީލް މަހުގެ 18 ވަނަ ދުވަހަކީ އިންތިހާބު ފަސްކުރެވޭނެ އެންމެފަހުގެ ތާރީހް ކަމަށެވެ.
ޝަރީފް ވިދާޅުވީ އިންތިހާބު ފަސްކުރީ، ސަރުކާރުގެ ފަރާތުން ހެލްތު މިނިސްޓަރ އަބްދުﷲ އަމީން މުޅި ރާއްޖެއަށް 30 ދުވަހުގެ ސިއްހީ ކުއްލި ނުރައްކަލުގެ ހާލަތު އިއުލާންކުރެއްވުމާއި ގުޅިގެންކަމަށެވެ. އަދި އެ މުއްދަތު ސަރުކާރުން އިތުރުކޮށްފިނަމަ، އެކަމުގައި ކުރިއަށްދާނެގޮތެއް ހޯދުމަށް ކޯޓަށް ވަޑައިގަންނަވާނެކަމަށްވެސް ޝަރީފް ވިދާޅުވި އެވެ. ޝަރީފް ވިދާޅުވީ ކޯޓަށް ވަޑައިގަންނަވަނީ ކަނދައެޅިފައިވާ މުއްދަތަށްވުރެފަހުން އިންތިހާބު ބާއްވަންޖެހިއްޖެނަމަ އެކަމަށް ޤާނޫނީގޮތުން ހައްލުތަކެއް ހޯދަން ޖެހިވަޑައިގަންނަވާނެތީކަމަށެވެ.
މީގެ އިތުރުން ޝަރީފް ވިދާޅުވީ އިންތިޚާބުގެ ގިނަ މަސައްކަތްތައް މިހާރު ނިމިފައިވާ ކަމަށެވެ.
ޝަރީފް ވިދާޅުވީ އޭޕްރީލް މަހުގެ 18 ވަނަ ދުވަހަކީ ގާނޫނުގައި ވާގޮތުގެ މަތިން އީސީން ލިބިގެންވާ ގާނޫނީ މުހުލަތުގެ ތެރެއިން ވޯޓުލާ ދުވަސް ފަސް ކުރެވޭނެ ފަހު ތާރީހު ކަމަށާއި، މިތާރީހު ބަދަލުކުރުމާ ގުޅިގެން އިންތިޚާބުގެ ކަންކަން ތަރުތީބު ކުރަމުންދާނީ ރާވަމުންދާނީ މިތާރީހާ އެއްގޮތަށް ކަމަށެވެ.
ޝަރީފް ވިދާޅުވީ އިންތިޚާބުގެ ކަންކަން އަލުން ބަލުން ފަށައިގެން ކުރިއަށްދާނެ ނަމަ ވަރަށް ބޮޑު ހަރަދެއް ހިނގާނެ ކަމަށެވެ. ނަމަވެސް ވޯޓު ލުމުގެ މުއްދަތު ލަސްކުރުމާ ގުޅިގެން މިއަންނަ މުއްދަތުގެ ތެރޭގައި އޮފިޝަލުންނާއި ޓާސްކްފޯސް މުއައްޒަފުންނަށް ކުރާ ހަރަދުތަކުގެ އިތުރުން އެހެން ހަރަދެއް ނުހިނގާނެ ކަމަށެވެ.
