ދުނިޔޭގައި ހަލުވިމިނެއްގައި ފެތުރެމުންދާ ކޮވިޑް-19 އާ ދެކޮޅަށް ރާއްޖެއިން ކުރަމުންދާ މަސައްކަތުގައި އެހީ ފޯރުކޮށްދިނުމަށް އިންޑިއާ ސަރުކާރުން ނިންމައިފިއެވެ.
މިކަން އިއުލާންކޮށް އިންޑިއާ ހައި ކޮމިޝަނުން ބުރާސްފަތި ދުވަހު ނެރުނު ބަޔާނެއްގައި ވަނީ، ރާއްޖޭގެ ޑޮކްޓަރުންނާއި ސިއްހީ ދާއިރާގެ މަސައްކަތްތެރިންނަށް އެހީ ފޯރުކޮށްދިނުމަށްޓަކައި އިންޑިއާގެ ސިއްހީ ދާއިރާގެ މާހިރުންގެ ޓީމެއް ރާއްޖެ އައުމަށް ހަމަޖެހިފައިވާ ކަމަށެވެ. މި ޓީމުގައި ޕަލްމޮނޮލޮޖިސްޓުންނާއި، ހޭނައްތާ ޑޮކްޓަރުން (އެނެސްތެޓިސްޓުން) އާއި ފިޒީޝަނުން އަދި ލެބް ޓެކްނީޝަނުން ހިމެނެއެވެ.
އޭގެ އިތުރުން، މި ބައްޔަށް ފަރުވާދިނުމަށް ބޭނުންކުރާ ބޭސް ވެސް ހަދިޔާކުރުމަށް ނިންމާފައިވާ ކަމަށް ބަޔާނުގައި ވެއެވެ. މި ބޭސްތައް އެކްސްޕޯޓް ކުރުން އިންޑިއާއިން މެދުކަނޑާލާފައިވީނަމަވެސް، ދިވެހިރާއްޖެއަށް މި ބޭސްތައް ފޯރުކޮށްދިނުމަށް ނިންމާފައިވަނީ ދެ ގައުމުގެ ދެމެދުގައިވާ ގާތް ގުޅުމުގެ ސަބަބުން ކަމަށް ބަޔާނުގައި ވެއެވެ.
ހައި ކޮމިޝަނުން އިތުރަށް ބުނެފައިވަނީ އިންޑިއާއިން ދިވެހިރާއްޖެއަށް ފޯރުކޮށްދޭ މިފަދަ އިންސާނިއްޔަތު ކަމުގެ އެހީތަކުން ވެސް ހާމަވެގެން ދަނީ އިންޑިއާގެ "ނެއިބަހުޑް ފަސްޓް" ސިޔާސަތާއި ދިވެހިރާއްޖޭގެ "އިންޑިއާ ފަސްޓް" ސިޔާސަތުގެ ވަރުގަދަކަމާއި ދެ ގައުމުގެ ދެމެދުގައިވާ ބަދަހި ގުޅުން ކަމަށެވެ.
ކޮރޯނާވައިރަސް އައުޓްބްރޭކް ފުރަތަމަ ފެނުނު ވޫހާން ސިޓީގައި ތިބި ދިވެހިން ރާއްޖެއަށް ގެނެސްފައިވަނީ އިންޑިއާގެ އެހީތެރިކަމުގައެވެ. އަދި ރާއްޖެއިން ނައްތާލާފައިވާ ހިމަބިހި އަލުން ރާއްޖެއިން ފެނުމާއި ގުޅިގެން، އިންޑިއާ ސަރުކާރުން އެމްއެމްއާރް ވެކްސިންގެ 30،000 ޑޯޒް ރާއްޖެއަށް ފޯރުކޮށްދީފައިވެއެވެ.
