ފަރުކޮޅުފުށީގައި އައިސޮލޭޓް ކޮށްފައިވާ ދިވެއްސެއް ގޭގައި އެކަހެރިކޮށްފި
11 މާރިޗު 2020 | ބުދަ 22:51ގޭގައި އެކަހެރިކުރީ ނަތީޖާ ނެގެޓިވްވުމުން
ކޮވިޑް-19 ޓާސްކްފޯސްގެ ތަރުޖަމާނު މަބްރޫކް އަޒީޒު
ފަރުކޮޅުފުށީގައި އައިސޮލޭޓް ކޮށްފައިވާ ދިވެއްސެއް ގޭގައި އެކަހެރިކޮށްފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) ބުނީ ކޮވިޑް-19އަށް ޓެސްޓު ކުރުމަށް ސާމްޕަލް ނަގާފައިވާ ދިވެއްސެއްގެ ނަތީޖާ "ނެގަޓިވް" ވުމާ ގުޅިގެން، ފަރުކޮޅުފުށީގައި އައިސޮލޭޓް ކޮށްފައިވާ އެ މީހާ ގޭގައި އެކަހެރިކޮށް ބެހެއްޓުމަށް ވަނީ ފޮނުވިފައިވާ ކަމަށެވެ.
ސަރުކާރުގެ ފަރާތުން ހާމަކުރި މަޢުލޫމާތުތަކަށް ބަލާއިރު، މިހާތަނަށް ޕޮޒިޓިވް ކޭސްއަކަށް ބަދަލެއް ނާދެއެވެ. މިހާތަނަށް ރާއްޖޭގައި ކޮވިޑް-19 އަށް ޕޮޒިޓިވްވެފައިވަނީ 8 މީހެކެވެ. މީގެ އިތުރުން ފަރުކޮޅުފުށި އައިސޮލޭޝަންގައި 16 މީހަކާއި، ވިލިވަރު ކަރަންޓީންގައި 13 އެބަތިއްބެވެ.
ސާމްޕަލް އަޕްޑޭޓަށް ބަލާއިރު، މިހާތަނަށް 82 ސާމްޕަލް ނަގާފައިވެއެވެ. މީގެ ތެރެއިން ޕޮޒިޓިވް 8 ސާމްޕަލާއި، ނެގެޓިވް 76 ސާމްޕަލް އަދި ނަތީޖާ ނުލިބޭ 2 ސާމްޕަލެއް ހިމެނެއެވެ.
