ހަފްތާއަކަށް ސްކޫލް ހުޅުވުން ލަސްކޮށްފި

ފުރަތަމަ ޓާމްގެ މިޑްޓާމް ހޮލިޑޭއަށްފަހު އިތުރު ހަފްތާއަކަށް ސްކޫލްތައް ނުހުޅުވާ ލަސްކޮށްފައިވާ ކަމަށް ސަރުކާރުން ހާމަކޮށްފިއެވެ.

ސަރުކާރުގެ ފަރާތުން ބުދަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮވިޑް-19 ގެ ޓާސްކްފޯހުގެ ތަރުޖަމާނު މަބްރޫކް އަޒީޒު ވިދާޅުވީ ސްކޫލްތައް ޗުއްޓީއަށްފަހު ހަފްތާއަކަށް ސްކޫލްތަށް ނުހުޅުވާ ގޮތަށް މިހާރު ނިންމި ނަމަވެސް، އެ ހާލަތު ރިވައިސް ކުރުމަށްފަހު އެ ނިންމުމަށް ބަދަލުތައް އަންނާނެ ކަމަށެވެ. އޭނާ ވިދާޅުވީ އެ ހާލަތު ރިވައިސްކޮށް ރާއްޖޭގެ ހާލަތަށް ބަދަލު އަންނަމުންދާ ވަރަކަށް އެކަމަށް އަޅަންޖެހޭ ފިޔަވަޅުތައް އަޅަމުން ގެންދާނެ ކަމަށެވެ.

މަބްރޫކް ވިދާޅުވީ އެއްވެސް ކަމެއް ކުރުމަށް ފަސްޖެހުމެއް ނެތްކަމަށާއި، ރައްޔިތުންގެ ރައްކާތެރިކަމާއި ދަރިވަރުންގެ ރައްކާތެރިކަމަށް ބަލާފައި އަޅަންޖެހޭ ފިޔަވަޅުތައް އަޅަމުން ގެންދާނެ ކަމުގެ ޔަގީންކަށް އަރުވާ ކަމަށެވެ.

ފުރަތަމަ ޓާމްގެ މިޑްޓާމް ހޮލިޑޭ ފެށުނީ މި ހިނގަމުންދާ މާޗް މަހުގެ 8 ވަނަ ދުވަހުއެވެ. އަދި 15 ވާ އާދީއްތަ ދުވަހު އަލުން ސްކޫލްތައް ހުޅުވޭގޮތަށް މިއަހަރުގެ އެކަޑަމިކް ކަލަންޑަރުގައި ވަނީ ހަމަޖައްސާފައެވެ. ނަމަވެސް ސަރުކާރުގެ ނިންމުމާއެކު ދެން ސްކޫލްތައް ހުޅުވޭނީ މިމަހުގެ 22 ވަނަ ދުވަހުއެވެ. ނަމަވެސް ހާލަތަށް ބަލާފައި މި ނިންމުން ބަދަލުވެދާނެ ކަމަށް ސަރުކާރުން ވަނީ ހާމަކޮށްފައެވެ.

ސްކޫލްތައް ހަފްތާއަކަށް ބަންދު ކުރުމަށް ނިންމާފައިވާއިރު، މޯލްޑިވްސް މެޑިކަލް އެސޯސިއޭޝަނާއި ބައެއް ޑޮކްޓަރުން ވެސް ދިޔައީ ސްކޫލްތައް މި ދުވަސްވަރު ބަންދު ކުރުމަށް ގޮވާލަމުންނެވެ.