ޗައިނާގައި ހަލުވިކަމާއެކު ފެތުރެމުންދިޔަ ކޮވިޑް-19 މިހާރު އޮތީ ކޮންޓްރޯލް ކުރެވޭ ޙާލަތެއްގައި ކަމަށް އެ ޤައުމުގެ ރައީސް ޝީ ޖިންޕިން ވިދާޅުވެއްޖެއެވެ.

ޗައިނާގައި ކޮވިޑް-19 ފެތުރެން ފެށި މައި މަރުކަޒު ވުހާން ސިޓީއަށް ޒިޔާރަތްކުރެއްވުމަށްފަހު މީޑިއާއާއި ވާހަކަ ދައްކަވަމުން ޗައިނާގެ ރައީސް ޝީ ޖިންޕިން ވިދާޅުވީ އެ ޤައުމު މިހާރު ވައިރަސް ކޮންޓްރޯލް ކުރެވޭ ޙާލަތަކަށް ގެނެވިފައިވާ ކަމަށެވެ.

ޗައިނާގައި ވައިރަސް ފެތުރެންފެށި ފަހުން އަންގާރަ ދުވަހަކީ އެޤައުމުގައި އެންމެ މަދުން މި ބަލީގައި މީހުން މަރުވި ދުވަހެވެ. އަންގާރަ ދުވަހު އެޤައުމުން މަރުވެފައިވަނީ 19 މީހުންނެވެ. އަދި މި އެންމެންނަކީ ވުހާން ސިޓީން މަރުވި މީހުންނެވެ. މީގެ ތެރޭގައި އެހެން ޤައުމަކުން އައި 2 މީހަކު ވެސް ހިމެނެއެވެ.

މިހާތަނަށް ޗައިނާއިން އެކަނި 80،754 މީހަކު ބައްޔަށް ޕޮޒިޓިވްވެފައިވާ އިރު، 3،136 މީހަކު ވަނީ ބަލީގައި މަރުވެފައެވެ. ޗައިނާއިން މިހާތަނަށް 60،113 މީހަކު ވަނީ މި ބަލިން ރަނގަޅުވެފައެވެ. އެހެންކަމުން ޗައިނާގައި މި ބަލީގައި ފަރުވާ ދެމުންދަނީ 20،641 މީހަކަށެވެ.

ޗައިނާގައި ހަލުވިކަމާއެކު ވައިރަސް ފެތުރެން ފެށިފަހުން އެޤައުމުގެ ރައީސް ވުހާން ސިޓީއަށް ޒިޔާރާތްކުރި މިއީ ފުރަތަމަ ފަހަރެވެ. އޭނާ ސިޓީއަށް ވަޑައިގެން ބައްލަވާލައްވާފައިވަނީ ހުބޭ ޕްރޮވިންސްގެ މަސައްކަތްތައްދާ ގޮތެވެ.

ވުހާންއާއެކު މުޅި ހުބޭ ޕްރޮވިންސް "ލޮކްޑައުން" ކޮށްފައިވާތާ ގާތްގަޑަކަށް 2 މަސްދުވަހާއި ގާތްވެފައިވާއިރު، ޝީ ޒިޔާރަތްކޮށްފައިވަނީ ގެތަކުގައި އައިސޮލޭޓްވެގެން ތިބި މީހުން ކައިރިއަށް ކަމަށް މީޑިއާތަކުން ރިޕޯޓުކޮށްފައިވެއެވެ.

ޝީގެ ޒިޔާރަތަށްފަހު މީޑިއާއާ ވާހަކަދައްކަވަމުން ޝީ ވިދާޅުވީ ވުހާން ސިޓީ އަދި ހުބޭ ޕްރޮވިންސްގައި ވައިރަސް ކޮންޓްރޯލް ކުރެވިފައިވާ ކަމަށެވެ. އަދި އެ ޕްރޮވިންސްގެ ޙާލަތު ރަނގަޅުކުރުމަށް ކުރެވުނު މަސައްކަތް ކާމިޔާބުވެއްޖެކަން ޝީ ވަނީ ހާމަކުރައްވާފައެވެ.

ދުނިޔޭގައި މިހާތަނަށް 116،455 މީހަކު މި ބައްޔަށް މިއަދާ ހަމައަށް ޕޮޒިޓިވްވެފައިވާ އިރު، 64،750 މީހަކު ވަނީ ބަލިން ސަލާމަތްވެފައެވެ. އަދި މަރުވި މީހުންގެ ޢަދަދު އުޅެނީ 4،091 ގައެވެ. މި ތަފާސް ހިސާބުތަކައް ބަލާއިރު ވައިރަސްގެ އެކްޓިވް ކޭސްތައް އުޅެނީ 47،614 ގައެވެ.