ވާޑީގެ ދެ ލަނޑާއެކު ލެސްޓާއަށް ފަސޭހަ މޮޅެއް

އިނގިރޭސި ޕްރިމިއާ ލީގުގައި ހޯމަ ދުވަހުގެރޭ އެސްޓާ ވިލާ އަތުން ފަސޭހަކަމާއެކު ލެސްޓާ ސިޓީ މޮޅުވެއްޖެ އެވެ.

އަމިއްލަ ދަނޑުގައި ކުޅުނު މި މެޗުން ލެސްޓާ މޮޅުވީ 4-0 ގެ ނަތީޖާއަކުންނެވެ. މިއީ ލީގުގައި ލެސްޓާއިން އެންމެ ފަހުން ކުޅުނު ފަސް މެޗުގެ ތެރެއިން އެޓީމު މޮޅުވި ފުރަތަމަ މެޗެވެ.

ހޯމަ ދުވަހުގެރޭގެ މެޗުގައި ލެސްޓާގެ ފަރާތުން މޮޅު ކުޅުމެއްފެނިގެންދިޔައިރު، ފުރަތަމަ ހާފުގައި އެޓީމުން ވަނީ ލީޑު ނަގާފައެވެ. މެޗުގެ 40 ވަނަ މިނެޓުގައި މާކް އޯލްބްރައިޓަންގެ އެހީއާކު މި ލަނޑު ކާމިޔާބުކޮށްދިނީ ހާވޭ ބާންސް އެވެ.

ލެސްޓާއަށް މި މެޗުގައި ލީޑު ފުޅާކޮށްދިނީ މެޗުގެ 63 ވަނަ މިނެޓުގައި ލިބުނު ޕެނަލޓީއަކުން ޖެމީ ވާޑީ އެވެ. މިއީ އެންމެ ފަހުން ކުޅުނު 10 މެޗުގައި ވާޑީ ޖެހި ފުރަތަމަ ލަނޑެވެ. އަދި 79 ވަނަ މިނެޓުގައި ވާޑީ ވަނީ ލެސްޓާގެ ތިންވަނަ ލަނޑު ޖަހާފައެވެ. މިއީ ލީގުގައި މިހާތަނަށް ވާޑީ ކާމިޔާބުކުރި 99 ލަނޑެވެ.

މި މެޗުގައި ލެސްޓާގެ ހަތަރުވަނަ ލަނޑު މެޗު ނިމެން ފަސް މިނެޓަށް ވެފައިވަނިކޮށް މާކް އޯލްބްރައިޓަންގެ އެހީއާކު ކާމިޔާބުކޮށްދިނީ ހާވޭ ބާންސް އެވެ.

މި މޮޅާއެކު ތާވަލުގެ ތިންވަނައިގައި ލެސްޓާ އޮތީ 29 މެޗުން 53 ޕޮއިންޓާއެކު އެވެ. ދެވަނައިގައި އޮތް އެންމެ ފަހުގެ ޗެމްޕިއަން މެންޗެސްޓާ ސިޓީއަށް 28 މެޗުން ވަނީ 57 ޕޮއިންޓު ލިބިފައެވެ. ހޯމަ ދުވަހުގެރޭ ލެސްޓާ އަތުން ބަލިވި އެސްޓަން ވިލާ އޮތީ ތާވަލުގެ ފުލުން ދެވަނައިގައި 28 މެޗުން 25 ޕޮއިންޓާއެކު އެވެ.

ލީގުގައި ދެން ލެސްޓާއިން މެޗެއް ކުޅޭނީ މިމަހުގެ 14 ވަނަ ދުވަހު އެވެ. އެ ދުވަހު ލެސްޓާ ނުކުންނާނީ ރަށުން ބޭރުގައި ވަޓްފޯޑާ ދެކޮޅަށެވެ.