ވޯލްޑް ކަޕް ކޮލިފިކޭޝަނުގެ މެޗުތައް ފަސްކޮށްފި

ދުނިޔޭގެ އެކި ކަންކޮޅުތަކުގައި ހަލުވިކަމާއިއެކު މިހާރު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން 2022 ގެ ފީފާ ވޯލްޑް ކަޕާއި 2023 ގެ އޭއެފްސީ އޭޝިއަން ކަޕް ޖޮއިންޓް ކޮލިފިކޭޝަނުގެ އޭޝިއާ ސަރަހައްދުގެ މެޗުތައް ފަސްކުރުމަށް ފީފާއިން ފާސްކޮށްފިއެވެ.

މެޗުތައް ފަސްކުރިކަން ފީފާއިން ވަނީ އެފްއޭއެމަށް މިހާރު އަންގައިފައެވެ. އެފްއޭއެމްގެ އޮފިޝަލަކު ރާއްޖެ.އެމްވީ އަށް މައުލޫމާތު ދެމުން ބުނީ ފީފާ ވޯލްޑް ކަޕް އަދި އޭޝިއަން ކަޕްގެ ޖޮއިންޓް ކޮލިފިކޭޝަނުގެ މެޗުތައް ފަސްކޮށްފައިވާ ކަމަށާއި ފީފާއިން އެކަން ހޯމަ ދުވަހު އެފްއޭއެމަށް އަންގައިފައިވާ ކަމަށެވެ.

އޭއެފްސީ އަދި ފީފާއިން މަޝްވަރާ ކުރުމަށްފަހު މެޗުތައް ފަސްކުރުމަށް ނިންމިއިރު އޭއެފްސީގެ އޮފިޝަލުން ވަނީ ހޯމަ ދުވަހު ކުއްލި ބައްދަލުވުމެއްވެސް ބާއްވާފައެވެ. އަދި މި ބައްދަލުވުމުގައި އޭއެފްސީއިން ވަނީ މެޗުތައް ފަސްކުރަން ބޭނުންވާ ތާރީހުތައް ފީފާ އަށް ހުށަހަޅަން ނިންމާފައެވެ.

އޭއެފްސީ އަދި ފީފާއިން ކޮލިފިކޭޝަނުގެ މެޗުތައް ފަސްކުރަން ނިންމިއިރު، މި މަހު ކޮލިފިކެޝަނުގައި ރާއްޖެއިން ދެ މެޗެއް ކުޅޭ ގޮތަށް އޮތީ ހަމަޖެހިފައެވެ. އެއީ ޗައިނާއާ ދެކޮޅަށް މި މަހު 26 ވަނަ ދުވަހު ތައިލެންޑުގައި ކުޅެން ހަމަޖެހިފައި އޮތް މެޗާއި، މިމަހުގެ 31 ވަނަ ދުވަހު ގައުމީ ފުޓްބޯޅަ ދަނޑުގައި ސީރިއާއާ ދެކޮޅަށް ރާއްޖެ ކުޅެން އޮތް މެޗެވެ. ޗައިނާ މެޗު އެންމެ ފުރަތަމަ ތައިލެންޑަށް ބަދަލުކުރަންވެސް ނިންމީ ކޮރޯނާވައިރަސް (ކޮވިޑް-19) ގެ ސަބަބުންނެވެ.

މި ދެ މެޗަށް ތައްޔާރުވުމަށް ރާއްޖޭގެ ގައުމީ ޓީމުގެ ފަރިތަކުރުންތައް މީގެ ކުރިން ވަނީ ފަށާފައެވެ.

ކޮލިފައިންގައި ރާއްޖެ އޮތް ގްރޫޕް އޭގެ އެއްވަނައިގައި ސީރިއާ އޮތީ 54 މެޗުންވެސް މޮޅުވެ 15 ޕޮއިންޓާއެކު އެވެ. ދެވަނައިގައި އޮތް ޗައިނާއިން ވަނީ 4 މެޗުން 7 ޕޮއިންޓް ހޯދާފައެވެ. ތިންވަނައިގައި އޮތް ފިލިޕީންސް ވެސް ވަނީ 5 މެޗުން 7 ޕޮއިންޓް ހަމަކޮށްފައެވެ. ހަތަރުވަނައިގައި އޮތް ރާއްޖެއަށް 5 މެޗުން ލިބިފައިވަނީ 6 ޕޮއިންޓެވެ. އެންމެ ފުލުގައި އޮތް ގުއާމަށް އަދި ޕޮއިންޓެއް ނުލިބެ އެވެ.

ކޮރޯނާވައިރަސް ދުނިޔޭގެ 88 ގައުމަށްވުރެ ގިނަ ގައުމަށް ފެތުރިފައިވާއިރު، މި ވައިރަސް މިހާރުވަނީ ރާއްޖެއިން ވެސް ފެނިފައެވެ. ރާއްޖެއިން މިވައިރަހަށް 4 މީހުން ވަނީ ޕޮޒިޓިވްވެފައެވެ.