ކޮރޯނާ ވައިރަސްއާއި ގުޅިގެން އިރާނުން ބައިލައްކައަށްވުރެ ގިނަ ކުށްވެރިން ދޫކޮށްލަނީ

އިރާނުގައި ހަލުވިކަމާއެކު ފެތުރެމުންދާ ކޮވިޑް-19 އާއި ގުޅިގެން އެޤައުމުގެ ޖަލުތަކުގައި ތިބި 54،000 ޤައިދީން ވަގުތީގޮތުން ދޫކުރަން ނިންމައިފިއެވެ.

އިރާނުން މިގޮތަށް ނިންމާފައިވަނީ ކޮރޯނާއާއި ދެކޮޅަށް މިހާރު ކުރަމުންދާ މަސައްކަތާއި ގުޅިގެންނެވެ. މީގެ އިތުރުން އެތައްހާސް ޞިއްޙީ އެހީތެރިން މަސައްކަތަށް ނެރެ ކޮރޯނާވައިރަސް އާދެކޮޅަށް މަސައްކަތް ކުރުމަށް ވަނީ ނިންމާފައެވެ.

އިރާނުން މިފަދަ ނިންމުމެއް ނިންމާފައިވަނީ ފާއިތުވި ކުރު މުއްދަތެއްގެ ތެރޭގައި އެ ޤައުމުން ކޮރޯނާ ވައިރަސް ޖެހުނު މީހުންގެ ޢަދަދު ކުއްލިއަކަށް މައްޗަށް ދިއުމާއި ގުޅިގެންނެވެ. މިހާތަނަށް އެޤައުމުގައި 92 މީހަކު މި ބަލީގައި މަރުވެފައިވާ އިރު ހޮނިހިރު ދުވަހު އެކަނި އަލަށް 586 ކޭސް ވަނީ ފެނިފައެވެ. މިހާތަނަށް 2922 މީހަކު ވަނި ބަލިޖެހުނުކަން ކަށަވަރުވެފައެވެ.

އިރާނުގައި ކޮރޯނާ ވައިރަސް ފެތުރެން ފެށުމާއެކު މެދުއިރުމަތީގެ އެހެން ޤައުމުތަކަށް ވެސް ވަނީ މި ބަލި ފެތުރެން ފަށާފައެވެ. އާޘާރީ އެތައްތަނެއް ހިމެނޭ އިރާނުގެ ގޫމް ސިޓީން ފެތުރުނު ކޮރޯނާ ވައިރަސް މިހާރު ވަނީ އެ ޞަރަޙައްދުގެ އެހެން ޤައުމުތައްކަމަށްވާ އިރާގު، ޔޫއޭއީ، ބަހުރައިނަށް ވެސް ފޯރާފައެވެ.

ގޫމް ސިޓީއަށް މީހުން ވަނުމާއި އެތެރެވުން ހަފުތާއަކަށް މަނާކުރުމަށްފަހު އިރާނުގެ ސަރުކާރުން ވަނީ އެ ސިޓީ ދޫކޮށްދާ މިހުންގެ ގައިން ކޮރޯނާގެ އަލާމާތެއް ފެނިއްޖެނަމަ އެމީހަކު ވަގުތުން ކަރަންޓީން ކުރެވޭނެ ކަމަށެވެ. އެގޮތުން މެޑިކަލް ޓީމުތަކުން ގޫމް ސިޓީ ދޫކޮށްދާ މީހުން ދިއުމުގެ ކުރިން ޗެކްކުރާނެކަމަށް ވެސް ބުނެފައިވެއެވެ.

އިރާނުގެ އޮފިޝަލުން ވަނީ ކޮރޯނާ ކޮންޓްރޯލް ކުރުމަށް މަސައްކަތްތަކެއް ކުރަމުންދާކަމުގެ ޔަގީންކަން އެޤައުމުގެ ރައްޔިތުންނަށް ދީފައެވެ. ނަމަވެސް އެޤައުމުގެ ޤާނޫނު ހަދާ މަޖިލީހުގެ 23 މެންބަރަކު ކޮރޯނާއަށް ޕޮޒިޓިވްވުމާއި ގުޅިގެން އިރާން ސަރުކާރުގެ ވާހަކަތައް ޢާންމުންނަށް ޤަބޫލުކުރަން ދަތިކަމަށް މީޑިއާތަކުން ވަނީ ރިޕޯޓުކޮށްފައެވެ. މީގެ އިތުރުން އެޤައުމުގެ ސުޕްރީމް ލީޑަރުގެ އެޑްވައިޒަރު އާޔަތުﷲ އަލީ ޚާމަނާއީ ހޯމަ ދުވަހު ކޮރޯނާގައި މަރުވެފައިވާ ކަމަށް އެޤައުމުގެ ގައުމީ ރޭޑިއޯއިން ވަނީ އިޢުލާންކޮށްފައެވެ.

އިރާނުގެ ނައިބުރައީސް އިސްހާގް ޖަހަންގްރީ ވަނީ ފޮރިން މިނިސްޓްރީގެ ހުއްދައާއި ނުލާ ޤައުމުން ބޭރަށް އެއްވެސް ކަމެއްގެ ނުދެވޭނެ ގޮތައް، ޢާންމުން އެއްވެ ނޫޅެވޭނެ ކަމަށް އިދާރާތަކުގެ މައްޗަށް އަމުރެއް ނެރުއްވާފައެވެ.

އިރާނުގައި ކުއްލިގޮތަކަށް ކޮރޯނާގެ ބަލިމަޑުކަން ފެތުރުމާއި ގުޅިގެން ސަރުކާރުން މިކަމުގެ އެންމެ ތެދު މަޢުލޫމާތު ހާމަކުރަމުންނުދާ ކަމަށް ބައެއް ފަރާތްތަކުން އަންނަނީ ސުވާލު އުފައްދަމުންނެވެ.

ކޮރޯނާވައިރަސް ޖެހިގެން މިހާތަނަށް މުޅި ދުނިޔެއިން ވަނީ 107،800 ކޭސް ރިޕޯޓުކޮށްފައެވެ. މި ބަލީގައި މިހާތަނަށް 3661 މީހަކު މަރުވެފައިވާ އިރު، މި ބަލީގައި ރަނގަޅުވި މީހުންގެ އަދަދު އުޅެނީ 60،923 ގައެވެ.