ޗައިނާގައި ގިނަ ބަޔަކު ކަރަންޓީންކޮށްފައި ހުރި އިމާރާތެއް ވެއްޓި ގިނަ ބަޔަކު ތާށިވެއްޖެ

ނޮވެލް ކޮރޯނާވައިރަސް (ކޮވިޑް-19) އާ ގުޅިގެން ޗައިނާގައި މީހުން ކަރަންޓީން ކޮށްފައި ހުރި އިމާރާތެއް ކުއްލި ގޮތަކަށް ވެއްޓި ގިނަ ބަޔަކު ތާށިވެއްޖެއެވެ.

ޗައިނާގެ ކަމާބެހޭ ފަރާތްތަކާ ޙަވާލާދީ ބޭރުގެ މީޑިއާތަކުން ރިޕޯޓްކޮށްފައިވާ ގޮތުގައި ހޮނިހިރު ދުވަހު މި ހާދިސާ ހިނގާފައިވަނީ ޗައިނާގެ ފޫޖާން ޕްރޮވިންސްގެ ޗުއަންޖޯ ނަމަކަށް ކިޔާ އަވަށެއްގައެވެ. އެގޮތުން މިހާތަނަށް 33 މީހުން ސަލާމަތް ކޮށްފައިވާއިރު، އަދިވެސް ގިނަ ބަޔަކު އިމާރާތުގައި ތާށިވެފައިވާކަމަށް ސަރަޙައްދީ ސަރުކާރާ ޙަވާލާދީ މީޑިއާތަކުން ރިޕޯޓްކޮށްފައިވެއެވެ.

ރިޕޯޓްތައް ބުނާގޮތުން 5 ބުރީގެ މި އިމާރާތް ވެއްޓިފައިވަނީ ހޮނިހިރު ދުވަހުގެ ރޭ 7:00 ހާއިރުއެވެ. އަދި އެ ހޮޓަލަކީ ޗުއަންޖޯގެ ލީޖަންޖޫ ޑިސްޓްރިކްޓްގައި މީހުން ކަރަންޓީން ކޮށްފައިހުރި 2 އިމާރާތުގެ ތެރެއިން އެއް އިމާރާތެވެ. އެގޮތުން އެ އަވަށުގައި ކޮވިޑް-19 އަށް ޕޮޒިޓިވްވެފައިވާ މީހުން ގާތުގައި އުޅެފައިވާ މީހުން ކަރަންޓީން ކޮށްފައިތިބީ އެ ހޮޓަލުގައެވެ.

އޭގެ އިތުރުން، ރެސްކިއު ޓީމްތަކުން މީހުން ސަލާމަތް ކުރުމުގެ މަސައްކަތް ކުރަމުންދާކަމަށް ރިޕޯޓްތައް ބުނެއެވެ.

ކޮވިޑް-19 އެކި ޤައުމުތަކުގައި ފެތުރެމުންދާއިރު، ވައިރަސްގެ އަސަރު ކޮށްފައިވާ މީހުންގެ އަދަދު ވަނީ ލައްކައަކަށް އަރާފައެވެ. އަދި ވައިރަސްގެ ސަބަބުން މަރުވި މީހުންގެ އަދަދު 3400 އަށްވުރެ ގިނައެވެ. އެގޮތުން ޗައިނާ ފިޔަވައި މި ވައިރަސް އެންމެ ހަލުވި ކަމާއެކު ފެތުރެމުންދާ އެއް ޤައުމު ކަމަށްވާ އިޓަލީގައި ހޮނިހިރު ދުވަހު އެކަނިވެސް 1200 އަށްވުރެ ގިނަ މީހުން ވައިރަސްއަށް ޕޮޒިޓިވްވެފައިވެއެވެ.