ބެރިކޭޑުތަކާ ޕެޕަރސްޕްރޭތަކުގެ ތެރެއިން ޑިމޮކްރަޓިކް ސަރުކާރެއް ގެނައީ އަންހެނުންގެ ބޮޑު ދައުރަކާއެކު: ރަައީސް
7 މާރިޗު 2020 | ހޮނިހިރު 05:32މުޖުތަމައު ބިނާ ކުރުމުގެ އެންމެ މުހިއްމު ދައުރެއް އަދާކުރާ އެއް ބަޔަކީ އަންހެނުން
\"ރަށްވެހި ފެސްޓިވަލް\" ފެށުމުގެ ރަސްމިއްޔާތުގައި ރައީސް ސޯލިހު ވާހަކަފުޅު ދައްކަވަނީ
އަނިޔާވެރި ބިރުވެރި ދުވަސްތަކުން ރާއްޖެ މިންޖު ކުރުމުގައި އެންމެ ކުރީސަފުގައި ތިބި އެއް ބަޔަކީ ދިވެހި އަންހެނުންކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު ވިދާޅުވެއްޖެއެވެ.
އެމްޑީޕީގެ އަންހެނުންގެ ރޫހުގެ ފަރާތުން ހޮނިހިރު ދުވަހު ފަށާފައިވާ "ރަށްވެހި ފެސްޓިވަލް" ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، މުޖުތަމައު ބިނާ ކުރުމުގެ އެންމެ މުހިއްމު ދައުރެއް އަދާކުރާ އެއް ބަޔަކީ އަންހެނުން ކަމަށެވެ. އެގޮތުން ފާއިތުވި 7 އަހަރު ރާއްޖެ ދުއް އަނިޔާވެރި، ބިރުވެރި ވެރިކަމުގެ ދުވަސްވަރު އެ އަނިޔާއިން ދިވެހިން މިންޖުކުރުމަށް އެންމެ ކުރީ ސަފުގައި ތިބި އެއްބަޔަކީ ދިވެހި އަންހެނުންކަމަށް ރައީސް ވިދާޅުވިއެވެ.
އަދި އަންހެނުންގެ ބުރަ މަސައްކަތަށް އަބަދުވެސް ޝުކުރުވެރިވާކަން އެމަނިކުފާނު ވަނީ ފާހަގަކުރައްވާފައެވެ.
ކުރިއަށްއޮތް ލޯކަލް ކައުންސިލް އިންތިޚާބަށް އެމްޑީޕީން ފޯރިއާއެކު ކެމްޕެއިން ކުރަމުން އަންނަކަން ފާހަގަކުރައްވައި ރައީސް ވިދާޅުވީ، ލާމަރުކަޒީ ޤާނޫނަށް ގެނެވުނު އެންމެ ބޮޑު އަދި އެންމެ މުހިއްމު އިސްލާޙަކީ ކައުންސިލް ތަކުގައި އަންހެނުންނަށް ގޮނޑިތަކެއް ހަމަޖެއްސުން ކަމަށެވެ. އެގޮތުން ކުރިޔާ ޚިލާފަށް ކެމްޕެއިން ޕޯސްޓަރުތަކުންނާއި، ސިޔާސީ އިސް ސަފުން އަންހެން ކަނބަލުން ފެންނަން ފަށައިފިކަން ފާހަގަކުރައްވައި ރައީސް ވިދާޅުވީ، މިއީ ސިޔާސީ މައިދާނުގައި އަންހެނުންގެ ހިއްސާ އިތުރުކުރުމަށް އެޅުނު މުހިއްމު ފިޔަވަޅެއް ކަމަށެވެ.
އޭގެ އިތުރުން، ނިމިދިޔަ ލޯކަލް ކައުންސިލްތަކުގެ ޕްރައިމަރީގައި އެމްޑީޕީގެ 968 ކެންޑިޑޭޓުން ވާދަކުރި ކަމަށާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ޕްރައިމަރީގައި 640 ކެންޑިޑޭޓުން ވާދަކޮށް 440 އަންހެނުން ޕްރައިމަރީ ކާމިޔާބުކުރިކަން ރައީސް ފާހަގަކުރެއްވިއެވެ.
ރައީސް އިތުރަށް ވިދާޅުވީ، ޤައުމެއްގެ ޙާލަތު ރަނގަޅު ކުރުމުގައި ވަރަށް ގިނަ ބައެއްގެ ހިއްސާ އެކުލެވޭ ކަމަށާއި، އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ މެމްބަރުންނަށްވެސް ކުރިޔާ ޚިލާފަށް މިހާރު އުޖޫރައެއް ކަނޑައެޅިފައިވާ ކަމަށެވެ. އަދި އެކަމުގެ ސަބަބުން ކޮމިޓީގެ ހިންގުމާއި ވަސީލަތްތައް އިތުރަށް ވަރުގަދަވެގެންދާނެ ކަމަށް އެމަނިކުފާނު ވިދާޅުވިއެވެ.
އޭގެ އިތުރުންވެސް ރައީސް ސޯލިޙުވަނީ އަންހެނުންނަށް ކުރިމަތިވާ އެކި ގޮންޖެހުންތައް ހައްލުކުރުމަށް ސަރުކާރުން ގެންގުޅޭ ސިޔާސަތުތަކާއި، ސަރުކާރުގެ ދުރު ރާސްތާ ޕްލޭންގައި ކުރުމަށް ނިންމާފައިވާ ކަންކަމަށް އަލިއަޅުވާލައްވާފައެވެ.
