ފޯވާޑް އަހުމަދު ރިޒްވާން (ރިޒޭ) ގެ 10 ލަނޑާއެކު، ވިލިމާލެ ޔުނައިޓެޑް 12-0 އިން ބަލިކޮށް ކްލަބު އީގަލްސް އެފްއޭ ކަޕްގެ ސެމީ ފައިނަލަށް ދަތުރުކޮށްފި އެވެ.

މި މެޗުގައި ރިޒޭ ކާމިޔާބުކުރި 10 ލަނޑާއެކު، އޭނާ ވަނީ ރާއްޖޭގެ ރަސްމީ ފުޓްބޯޅަ މުބާރާތެއްގައި، އެއް މެޗެއްގައި ތިންވަނައަށް އެންމެ ގިނަ ލަނޑު ޖެހި ކުޅުންތެރިޔާގެ ރެކޯޑާ ހަމަކޮށްފައެވެ.

އެއް މެޗެއްގައި އެންމެ ގިނަ ލަނޑު ޖެހުމުގެ ރެކޯޑް އޮތީ 2009 ވަނަ އަހަރުގެ ވަތަނިއްޔާ ދިވެހި ލީގުގެ ފަހު ބުރުގައި ލ. ކަޅައިދޫ އަތުން 20-0 އިން ވީބީ އައްޑޫ އެފްސީ މޮޅުވި މެޗުގައި 12 ލަނޑު ޖެހި އަލީ އަޝްފާގް (ދަގަނޑޭ) ގެ އަތުގައެވެ. ލިސްޓުގެ ދެވަނައިގައި އޮތީ 2016 ވަނަ އަހަރުގެ ތިންވަނަ ޑިވިޝަނުގައި ވެލިއަންޓް ސްޕޯޓްސް ކްލަބު އަތުން 36-0 އިން ވީކޭ ސްޕޯޓްސް ކްލަބު މޮޅުވި މެޗުގައި 11 ލަނޑު ޖެހި އަހުމަދު ހަލީމް (އައްމަޑޭ) އަތުގަ އެވެ. ރިޒޭ 10 ލަނޑު ޖަހައި ރެކޯޑް އެއްވަރުކުރީ 2001 ވަނަ އަހަރުގެ އެފްއޭ ކަޕްގައި އޯޝަންސް އަތުން 22-0 އިން އައިއެފްސީ މޮޅުވި މެޗުގައި 10 ލަނޑު ޖެހި އާދަމް އަބްދުއްލަތީފް (ލައްޗޭ) އާއެވެ.

ރިޒޭ ޖެހި 10 ލަނޑާއެކު އޭނާ މިހާރު ވަނީ މި ސީޒަނުގައި މިހާތަނަށް 38 ލަނޑު ޖަހާފައެވެ.

ހުކުރު ދުވަހުގެރޭ ގައުމީ ފުޓްބޯޅަ ދަނޑުގައި ކުޅުނު ކުއާޓާ ފައިނަލް މެޗުން 12-0 އިން އީގަލްސް މޮޅުވިއިރު، މި މެޗުގައި ރިޒޭގެ އިތުރުން އީގަލްސްއަށް ލަނޑުތައް ޖަހައިދިނީ ޓޮޝިކީ އޮކަމޮޓޯ އާއި ހަސަން ރާއިފް އަހުމަދު (ހަންނަ) އެވެ.

މިއަހަރުގެ އެފްއޭ ކަޕްގެ ސެމީ ފައިނަލަށް ޓީމުތައް ދަތުރުކުރިއިރު، ސެމީ ފައިނަލް ފުރަތަމަ މެޗުގައި މިމަހުގެ 16 ވަނަ ދުވަހު ހަވީރު ބައްދަލުކުރާނީ މާޒިޔާ ސްޕޯޓްސް އެންޑް ރެކްރިއޭޝަނާއި ދަ ގްރާންޑޭ ސްޕޯޓްސް ކްލަބެވެ. އަދި އެރޭ ކުޅޭ ސެމީ ފައިނަލް ދެވަނަ މެޗުގައި ބައްދަލުކުރާނީ ޓީސީ ސްޕޯޓްސް ކްލަބާއި ކްލަބު އީގަލްސް އެވެ.