އިނިގިރޭސި އެފްއޭ ކަޕްގެ ފަސްވަނަ ބުރުން ޓޮޓެންހަމް ހޮޓްސްޕާސް ކެޓިއިރު، ކުއާޓަރ ފައިނަލަށް މެންޗެސްޓަރ ސިޓީ އާއި ލެސްޓަރ ސިޓީ ދަތުރުކޮށްފި އެވެ.
މުބާރާތުގެ ފަސްވަނަ ބުރުން ޓޮޓެންހަމް ކެޓީ ބުދަ ދުވަހުގެރޭ ކުޅުނު މެޗުގައި ނޯވިޗް ސިޓީ އަތުން ޕެނަލްޓީ ޖަހައިގެން 3-2 އިން ބަލިވުމުންނެވެ.
ޓޮޓެންހަމްގެ ދަނޑުގައި ކުޅުނު މި މެޗުގައި ފުރަތަމަ ލަނޑު ޖަހާ ލީޑު ނެގީ ޓޮޓެންހަމުންނެވެ. މެޗުގެ 13 ވަނަ މިނެޓުގައި މި ލަނޑު ކާމިޔާބުކޮށްދިނީ ޑިފެންޑަރު ވަޓޮންގަންއެވެ. އޭގެ ފަހުން މެޗުގައި ނޯވިޗުން ރަނގަޅު ކުޅުމެއް ދެއްކިއިރު، އެޓީމުން ނަތީޖާ އެއްވަރުކުރީ މެޗުގެ 78 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ފޯވަރޑް ޖޯސިޕް ޑްރިމިޗް އެވެ.
އިތުރު ވަގުތުގެ ދެ ހާފު ނިމުނުއިރުވެސް ނަތީޖާ އެއްވަރުވެފައި އޮތުމުން ޖެހި ޕެނަލްޓީ ޝޫޓްއައުޓްގައި ޓޮޓެންހަމްގެ ފަސް ޕެނަލްޓީގެ ތެރެއިން ކާމިޔާބުކުރެވުނީ ދެ ޕެނަލްޓީ އެވެ. ނޯވިޗުން ވަނީ ހަތަރު ޕެނަލްޓީގެ ތެރެއިން ތިން ޕެނަލްޓީ ކާމިޔާބުކޮށްފައެވެ.
މިއީ 1991 ވަނަ އަހަރުގެ ފަހުން ނޯވިޗް އެފްއޭ ކަޕްގެ ކުއާޓަރ ފައިނަލަށް ދަތުރު ކުރި ފުރަތަމަ ފަހަރެވެ.
![](https://dyncz33htw1ec.cloudfront.net/posts/2M1rJqHvn9YeSYXzg8PY.jpg)
މި މުބާރާތުގެ ކުއާޓަރއަށް މެންޗެސްޓަރ ސިޓީ ދަތުރުކުރީ ބުދަ ދުވަހުގެރޭ ކުޅުނު މެޗުގައި ޝެފީލްޑް ވެންސްޑޭ އަތުން 1-0 އިން މޮޅުވެގެންނެވެ.
އިނގިރޭސި ދެވަނަ ޑިވިޝަނުގައި ވާދަކުރާ ވެންސްޑޭގެ ދަނޑުގައި ކުޅުނު މި މެޗުގައި ސިޓީއަށް ލަނޑު ޖަހައިދިނީ 53 ވަނަ މިނެޓުގައި ސާޖިއޯ އަގުއޭރޯ އެވެ.
އަގުއޭރޯގެ ލަނޑަށްފަހު ވެސް ލީޑު ފުޅާކުރަން ސިޓީ އަށް ވަނީ ހުސް ފުރުޞަތުތަކެއް ލިބިގެން ގޮސްފައެވެ. އެގޮތުން މާރޭޒް އާއި ޖެސޫސްގެ އިތުރުން ބަދަލު ކުޅުންތެރިޔެއްގެ ގޮތުގައި ކުޅެން އެރި ރަހީމް ސްޓާލިން ފޮނުވާލި ބޯޅަތައް ވެންސްޑޭގެ ގޯލްކީޕަރު ވަނީ މަތަކޮށްފައެވެ.
މީގެ އިތުރުން މި މުބާރާތުގެ ކުއާޓަރއިން ލެސްޓަރ ޖާގަ ހޯދީ ބުދަ ދުވަހުގެރޭ ކުޅުނު މެޗުގައި ބާމިންގްހަމް ސިޓީ އަތުން 1-0 އިން މޮޅުވެގެންނެވެ. އެފްއޭ ކަޕްގެ ކުއާޓަރ ފައިނަލުގައި މެންޗެސްޓަރ ސިޓީ ވާދަކުރާނީ ނިއުކާސަލް ޔުނައިޓެޑާ އެވެ. ނޯވިޗް ބައްދަލުކުރާނީ މެންޗެސްޓަރ ޔުނައިޓެޑާއި ޑާބީ ކައުންޓީ ބުރާސްފަތި ދުވަހުގެރޭ ކުޅޭ ފަސްވަނަ ބުރުގެ މެޗުން މޮޅުވާ ޓީމަކާ އެވެ. ކުއާޓަރގެ އަނެއް ދެ މެޗުގައި ޝެފީލްޑް ޔުނައިޓެޑާއި އާސެނަލް ބައްދަލުކުރާއިރު، ލެސްޓަރ ސިޓީ ނުކުންނާނީ ޗެލްސީއާ ދެކޮޅަށެވެ.