ކުރިއަށް އޮތް 2 އިންތިޙާބަށް އައްޑޫސިޓީން 53 ކެނޑިޑޭޓުން ކުރިމަތިލައްވައިފި
4 މާރިޗު 2020 | ބުދަ 11:51އެކަން އިއުލާނު ކުރެއްވީ އިލެކްޝަންސް ކޮމިޝަނުގެ ނައިބްރައީސް
އައްޑޫސިޓީ ކެނޑިޑޭޓުންގެ ނަންތައް ތަރުތީބު ކުރުމާއި ގުރުއަތު ނެގުމަށް ބޭއްވި ރަސްމިއްޔާތު
ކުރިއަށް އޮތް ލޯކަލް ކައުންސިލް އިންތިޙާބާއި، އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ އިންތިޙާބަށް އައްޑޫސިޓީން 53 ކެނޑިޑޭޓުން ކުރިމަތިލައްވައިފިއެވެ.
ކެނޑިޑޭޓުންގެ ނަންތައް ތަރުތީބު ކުރުމާއި ގުރުއަތު ނެގުމަށް ބުދަ ދުވަހު އައްޑޫ އިކުއެޓޯރިއަލް ހޮސްޕިޓަލުގެ އޮޑިޓޯރިއަމްގައި ބޭއްވި ރަސްމިއްޔާތެއްގައި އެކަން އިއުލާނު ކުރެއްވީ އިލެކްޝަންސް ކޮމިޝަނުގެ ނައިބްރައީސް އަހުމަދު އަކުރަމްއެވެ.
އަކުރަމް ވިދާޅުވީ، ކުރިއަށް އޮތް ލޯކަލް ކައުންސިލް އިންތިޙާބަށް އައްޑޫސިޓީގެ 12 ދާއިރާއަށް 36 ކެނޑިިޑޭޓުން ކުރިމަތިލައްވާފައިވާ ކަމަށާއި، އަންހެނުންގެ ތަރައްޤީއަށް މަސައްކަތް ކުރާ ކޮމިޓީއަށް 17 ކެނޑިޑޭޓުން ކުރިމަތިލައްވާފައިވާ ކަމަށެވެ.
އަކުރަމް އިތުރަށް ވިދާޅުވީ، އައްޑޫސިޓީން ކުރިމަތިލައްވާފައިވާ ކެނޑިޑޭޓުންވެސް ޤާނޫނުގައިވާގޮތުން ރަސްމީކޮށް ކެމްޕެއިން ކުރުމަށް ހުޅުވާލެވިފައިވާ ކަމަށެވެ.
މި ރަސްމިއްޔާތުގައި ފުލުހުންނާއި، އޭސީސީގެ އިތުރުން، އެޗްއާރްސީއެމްގެ އޮފިޝަލުންވެސް ބައިވެރިވެވަޑައިގެންނެވިއެވެ.
