ފްރާންސްގެ ޕީއެސްޖީއަށް ކުޅެމުން އަންނަ ފޯވާޑް ކީލިއަން އެމްބާޕޭ އަށް އޮލިމްޕިކްސްގައި ފްރާންސް ގައުމީ ޓީމަށް ނުކުޅެވިދާނެ ކަމަށް ގައުމީ ޓީމުގެ ކޯޗު ޑިޑިއޭ ޑިޝޯމްޕްސް ބުނެފި އެވެ.

މީގެ ކުރިން މީޑިއާއަށް ދިން އިންޓަވިއުއެއްގައި އެމްބާޕޭ ވަނީ އޭނާ އޮލިމްޕިކްސް ކުޅެން ބޭނުންވާ ކަމުގެ އިޝާރާތެއް ދީފައެވެ. އެމްބާޕޭ ބުނީ އޭނާ މިވަގުތު ދެކެމުންދާ ހުވަފެނަކީ ޕީއެސްޖީއަށް ޗެމްޕިއަންސް ލީގު ހޯދައިދިނުމާއި، ފްރާންސާއެކު ޔޫރޯ ކާމިޔާބުކުރުމުގެ އިތުރުން މިއަހަރު ބޭއްވުމަށް ހަމަޖެހިފައިވާ އޮލިމްޕިކްސް ރަން މެޑަލް ފްރާންސަށް ހޯދައިދިނުން ކަމަށެވެ.

ފްރާންސުން ވަނީ މި މުބާރާތަށް 80 ކުޅުންތެރިންގެ ސްކޮޑެއް އެކުލަވާލާފައެވެ. އެ ސްކޮޑުގައި އެމްބާޕޭ ވެސް ހިމެނެއެވެ. އެކަމަކު ކްލަބު ސީޒަނަށް ފަހު ޔޫރޯ ކުޅެފައި އޮލިމްޕިކްސް ކުޅޭނަމަ އެމްބާޕޭއަށް އައު ސީޒަން ފަށަން ޖެހޭނީ އަރާމެއް ނުލިބިއެވެ. އަނެއްކޮޅުން އެމްބާޕޭ އަށް އޭރުން ޕީއެސްޖީގެ ޕްރީ ސީޒަނުގައި ވެސް ބައިވެރިނުވެވޭނެއެވެ. މި މައްސަލާގައި އެމްބާޕޭ ބުނީ އޭނާ ޕީއެސްޖީގެ އިސްވެރިންނާއި ވާހަކަދައްކާނެ ކަމަށެވެ.

މީޑިއާ ރިޕޯޓުތައް ބުނާ ގޮތުން ޕީއެސްޖީން ވަނީ ފްރާންސް އެފްއޭ އަށް އޮލިމްޕިކްސްގައި އެމްބާޕޭ ކުޅުމަށް ހުއްދަ ނުދޭނެ ކަމަށް އަންގާފައެވެ.

ފްރާންސްގެ ގައުމީ ޓީމު ކޯޗު ޑިޝޯމްޕްސް ބުނީ ޕީއެސްޖީ އާއި އަދި އެނޫންވެސް ކްލަބުތަކުން އޮލިމްޕިކްސްއަށް ކުޅުންތެރިން ނުފޮނުވާން ނިންމުމަކީ އެކްލަބުތަކުގެ އިމުގެ ތެރޭގައި، އެ ކްލަބުތަކަށް ލިބޭ ހައްގެއް ކަމަށެވެ.