ކޮރޯނާވައިރަސް ރާއްޖެއަށް ނާންނާނެކަމަކަށް ނުދެކެން، ޑަބްލިޔުއެޗްއޯގެ މިންގަނޑަށް އުޅުނީމާ ރަނގަޅުވާނެ: ނަޝީދު
ދިވެހިރާއްޖެއަށްވެސް ދުނިޔޭގައި އުޅޭ ބައްޔެއް ވިއްޔާ އަންނާނެ
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ދިވެހިރާއްޖެއަށް ކޮރޯނާވައިރަސް އަންނާނެ ކަމަށާއި އެއީ ނުވެދާނެކަމެއްގެ ގޮތުގައި ދެކިގެން އުޅުމަކީ އުނދަގޫ ކަމެއްކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެ އެވެ.
ކޮރޯނާވައިރަސް އާ ގުޅިގެން ރާއްޖެއަށް ކާޑުގެ ދަތިކަން ފޯރާނެކަމަށް ފެންނާތީ މަޖިލީހަށް ހުށަހެޅި ކުއްލި މައްސަލައިގެ ތެރެއިން ވާހަކަދައްކަވަމުން ރައީސް ނަޝީދު ވިދާޅުވީ ތަކުރާރުކޮށް ފާހަގަކުރަން ބޭނުންފުޅުވާ ކަމަކީ ދިވެހިރާއްޖެއަށްވެސް ދުނިޔޭގައި އުޅޭ ބައްޔެއް ވިއްޔާ އަންނާނެކަމެވެ. އަދި ރާއްޖެއަކީ ދުނިޔެއިން ބޭރުގައިވާ ބައެއްވެސް ނޫން ކަމަށާއި ދިވެހިންނަށް ދުނިޔެއިން ބޭރަށް ނިކުމެވެސް ނުތިބެވޭނެ ކަަމަށެވެ.
ބަލިތައް ޖެހުނީމާ އޮންނަގޮތަކީ ބަލީގެ ފަރުވާ އާއި ފަރުވާގެ ނިޒާމު ވަރުގަދަކުރުން ކަމަށް ނަޝީދު ވިދާޅުވި އެވެ. ކަންބޮޑުވެގެން ނުވަތަ މިކަމާއި ހާސްވެ ދުއްވައިގަނެ މުދާ ބައްކޮށް ގެއަށްވަދެ ފިލާތިބެ މިބާވަތުގެ ކަންކަމުގެ ތެރެއަށް ޤައުމު ދާން އުޅުން އެއީ ޒިންމާދާރު އަދި ބުއްދިވެރިކަމެއްވެސް ނޫންކަމަށް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ މިރޯގާއަށްވެސް ކުރަންޖެހޭ ކަމަކީ ސާފުތާހިރުކޮށް އުޅުން ކަމަށެވެ. އަދި މިކަމަކީ ރަނގަޅަށް ތައްޔާރުވާންޖެހޭ ކަމެއްކަމަށް ދެކެވަޑައިގަންނަވާ ކަމަށް ރައީސް ނަޝީދު ވިދާޅުވި އެވެ. އެހެންނަމަވެސް އެއީ ޤައުމުގައި ހިނގާ ކަންކަން ބަންދުކޮށްގެން އުޅެންޖެހޭ ކަމެއް ނޫންކަމަށް ރައީސް ނަޝީދު ވިދާޅުވި އެވެ. އަދި މި ވައިރަސް އާ ގުޅިގެން ފަތުރުވެރިން އައުމާއި ކާނާގެ ބާވަތްތައް ރާއްޖެ ގެނައުން ހުއްޓުމަކީ އެންމެ ބުއްދިވެރި ކަމެއްގެ ގޮތުގައި ދެކެވަޑައިނުގަންނަވާ ކަމަށް ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ މިކަމުގައި ޢަމަލުކުރަންޖެހޭ ޑަބްލިޔުއެޗްއޯގެ މިންގަނޑެއް އޮންނަކަމަށާއި ބަލަންޖެހޭނީ އެމިންގަނޑަށް ކަމަށެވެ. އެހެންކަމުން އެމިންގަނޑަށް ޢަމަލުކުރަމުންދާނަމަ މިކަމުގައި ހާސްވެ ކަންބޮޑުވެގެން އުޅުމުގެ ބޭނުމެއް ނެތްކަމަށް ނަޝީދު ވިދާޅުވި އެވެ. އަދި ޤައުމީ އެއްވެސް އެމަރޖެންސީއެއް މިކަމުގައި ގެންގުޅެން ފެނިވަޑައިނުގަންނަވާ ކަމަށް ނަޝީދު ވިދާޅުވި އެވެ.
