މިހާތަނަށް ދުނިޔޭގެ 61 ޤައުމަކުން ވައިރަސް ރިޕޯޓުކޮށްފައިވޭ: ޑަބްލިއުއެޗްއޯ

މިހާތަނަށް އައިއިރު ދުނިޔޭގެ 61 ޤައުމަކުން ވައިރަސް ރިޕޯޓުކޮށްފައިވާ ކަމަށް ވާރލްޑް ހެލްތް އޯގަނައިޒޭޝަން (ޑަބްލިއުއެޗްއޯ) އިން ބުނެފިއެވެ.

ދުނިޔޭގެ ޞިއްޙަތު ޖަމްޢިއްޔާ ޑަބްލިއުއެޗްއޯއިން ބުނާ ގޮތުގައި، ވައިރަސް އަލަށް ފެނުނު ޗައިނާގެ އިތުރަށް، ދުނިޔޭގެ 61 ޤައުމަކުން މިހާތަނަށް ކޮވިޑް-19 ޖެހިގެން އެ ޖަމްޢިއްޔާށް ރިޕޯޓުކޮށްފައިވެއެވެ. މިހާތަނަށް އެ ޖަމްޢިއްޔާއިން ބެލި ބެލުމުން 61 ޤައުމުން 8،739 މީހުން ވައިރަސްއަށް ޕޮޒިޓިވްވެ، 127 މީހުން މަރުވެފައިވާކަން ކަށަވަރުވެފައިވާ ކަމަށް އެ ޖަމްޢިއްޔާ އިން ބުނެއެވެ.

ޗައިނާއިން ބޭރުން ކޮވިޑް-19 އެންމެ ބޮޑަށް ފެތުރެމުން ދަނީ 4 ޤައުމެއްގައެވެ. އެއީ ދެކުނު ކޮރެއާ، އިޓަލީވިލާތް، އިރާން އަދި ޖަޕާންކަމަށާއި، މި ޤައުމުތަކުގައި ވައިރަސް ފެތުރެމުންދަނީ އެ ޖަމްޢިއްޔާއިން ކަންބޮޑުވާ މިންވަރަކަށް ކަމަށް ވެސް އެޖަމްޢިއްޔާގެ ޑިރެކްޓަރ ޖެނެރަލް ޓެޑްރޯސް އެދެނޯމް ގެބްރިޔޭސަސް ވިދާޅުވެފައިވެއެވެ.

ޑަބްލިއުއެޗްއޯ އިން މިހެން ބުނެފައިވާއިރު ޗައިނާގެ ނެޝަނަލް ހެލްތު ކޮމިޝަނުން ހާމަކުރި ކޮވިޑް-19 ގެ އެންމެ ފަހުގެ ތަފާސް ހިސާބުތަކަށް ބަލާއިރު، އެޤައުމުގައި ކޮވިޑް-19 ޖެހޭ މީހުންނާއި، ވައިރަސްގައި މަދުވާ މީހުންގެ ނިޞްބަތް މިހާރު ދަނީ ދަށްވަމުންނެވެ.

އެ ކޮމިޝަނުން މިއަދު ޢާންމުކުރި އެންމެ ފަހުގެ މަޢުލޫމާތުތަކައް ބަލާއިރު، އިއްޔެ އެޤައުމުގައި އަލަށް މިވައިރަސް ޖެހިގެން ރިޕޯޓުކޮށްފައިވަނީ 125 މީހުންނެވެ. އަދި އާދީއްތަ ދުވަހު 202 މީހުންނެވެ. އިއްޔެއަކީ ޖެނުއަރީގެ ފަހުން އެޤައުމުގައި އެންމެ މަދު ކޭސް ރިކޯޑުކުރެވުނު ދުވަހެވެ. އިއްޔެ އެޤައުމުން 31 މީހުން ވައިރަސް ޖެހިގެން މަރުވިއެވެ.

ހަމަ އެކަނި ވައިރަސް އަލަށް ފެނުނު ވުހާން ސިޓީއަށް ބަލާއިރުވެސް ނިޞްބަތުން ވައިރަސް ޖެހޭ މީހުންގެ އަދަު ވަނީ ދަށްވެފައެވެ. އިއްޔެ އެ ސިޓީން ވައިރަސްއަށް ޕޮޒިޓިވްވެގެން ރިޕޯޓުކޮށްފައިވަނީ 111 މީހުންނެވެ. އޭގެ ކުރީ ދުވަހު 193 މީހުންނެވެ.

ޗައިނާގެ ނެޝަނަލް ހެލްތު ކޮމިޝަނުން މަޢުލޫމާތުދޭ ގޮތުގައި ވައިރަސްއަށް ފަރުވާ ދިނުމަށް ފަހު ގެއަށް ދޫކޮށްލާ މީހުންގެ ނިޞްބަތް މިހާރު ގިނައެވެ. އެހެންނަމަވެސް، އެކަމާއި ގުޅޭ އިތުރު ތަފުޞީލު މިއަދުގެ ޕްރެސް ކޮންފަރެންސްގައި ހާމަކޮށްފައެއް ނުވެއެވެ.