އިލެކްޝަންސް ކޮމިޝަންގެ ހުސްވާ މަގާމަށް، އަކްރަމް، ފަޔާޒު، ހަނީފާ އަދި މަންސޫރު!
2 މާރިޗު 2020 | ހޯމަ 06:35މިހާރު އަކަރަމް އަދާކުރާ ކޮމިޝަނުގެ މެމްބަރުކަމުގެ ދައުރު ހަމަވާނީ މިމަހުގެ 23 ވަނަ ދުވަހު
އިލެކްޝަންސް ކޮމިޝަނުގައި މިހާރު ތިއްބެވި މެމްބަރުން
އިލެކްޝަންސް ކޮމިޝަނުގައި ހުސްވާ މެންބަރުކަމުގެ މަޤާމަށް ކުރިމަތިލެއްތި ބޭފުޅުންގެ ތެރެއިން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ފެނިވަޑައިގަންނަވާ ހަތަރު ބޭފުޅެއްގެ ނަން މަޖިީހުގައި އިއްވައި، އެނަންތައް ދިރާސާކުރުމަށް ކަމާބެހޭ ކޮމެޓީއަށް ފޮނުވައިފި އެވެ.
އިލެކްޝަންސް ކޮމިޝަނުގެ މެންބަރު ކަމުގެ މަޤާމަށް ކުރިމަތިލެއްވި ބޭފުޅުންގެ ތެރެއިން މަޖިލީހުގެ ރުހުން ހޯއްދެވުމަށް ރައީސް ޞާލިހު ފޮނުއްވާފައިވާ ބޭފުޅުންގެ ތެރެއިން ލިސްޓުގެ އެއްވަނާގައި އޮތީ، މިހާރުވެސް އެކޮމިޝަނުގެ ނައިބު ރައީސް އަދި އެ ކޮމިޝަނުގެ ތަރުޖަމާނު އަޙްމަދު އަކްރަމެވެ. ދެވަނާގައި އޮތީ، އިލެކްޝަންސް ކޮމިޝަނުގެ ކުރީގެ ނައިބު ރައީސް އަޙްމަދު ފަޔާޒު ހަސަނެވެ. އެކޮމިޝަނުގެ ކުރީގެ ޤާނޫނީ ވަކީލު މަރިޔަމް ޙަނީފާ ޚާލިދުގެ ނަން ތިންވަނާގައި އޮތްއިރު، ހަތަރު ވަނާގައި އޮތީ އަޙްމަދު މަންސޫރު ވ. ރިވެތި އެވެ.
އިލެކްޝަންސް ކޮމިޝަނުގައި އަކްރަމް އަދާކުރަމުންދާ މަޤާމުގެ މުއްދަތު މި މާރޗު މަހުގެ 23 ވަނަ ދުވަހަށް ހަމަވާނެ އެވެ. އެހެންކަމުން އަކްރަމް މިވަނީ ދެވަނަ ދައުރަކަށްވެސް އެކޮމިޝަނުގެ މެންބަރުކަމަށް ކުރިމަތި ލައްވާފަ އެވެ. އަކްރަމަކީ، 2018 ވަނަ އަހަރުގެ ރިޔާސީ އިންތިޚާބާއި، 19 ވަނަ ރައްޔިތުންގެ މަޖިލީހުގެ އިންތިޚާބު، އަމާންކަމާއި އޮމާންކަމާއެކު ބޭއްވުމުގައި އިލެކްޝަންސް ކޮމިޝަނުގައި އިސް ދައުރެއް އަދާކުރެއްވި އެކޮމިޝަނުގެ މެންބަރުގެ އިތުރުން ތަރުޖަމާނު ވެސް މެއެވެ.
ފަޔާޒަކީ 2013 ވަނަ އަހަރުގެ ރިޔާސީ އިންތިޚާބުގެ ފުރަތަމަ ބުރު ސުޕްރީމް ކޯޓުން ބާޠިލު ކުރިއިރު އިލެކްޝަންސް ކޮމިޝަނުގެ ނައިބު ރައީސެވެ. އަދި 18 ވަނަ ރައްޔިތުންގެ މަޖިލީހުގެ އިންތިޚާބުގެ ދުވަސްވަރު، ހިނގާދިޔަ ކަންތައްތަކަކާއި ގުޅިގެން ސުޕްރީމް ކޯޓުން ސުމޯޓޯ މައްސަލައެއް ބަލައި، އެކޮމިޝަނުގެ މެންބަރުކަމުން ވަކި ކުރެއްވި އިލެކްޝަންސް ކޮމިޝަނުގެ ކުރީގެ ނައިބު ރައީސެވެ. އެ ދުވަސްވަރު އިލެކްޝަންސް ކޮމިޝަނުގައި ޤާނޫނީ ވަކީލެއްގެ ގޮތުގައި މަސައްކަތްކުރެއްވީ ހަނީފާ ޚާލިދު އެވެ.
