ދުނިޔޭގެ ފުޓްބޯޅައިގައި އެންމެ ބޮޑަށް ސަމާލުކަން ދޭ މެޗު ކަމަށްވާ އެލް ކްލަސިކޯ މެޗު ކާމިޔާބުކޮށް، ރެއާލް މެޑްރިޑުން ސްޕެނިޝް ލީގުގެ އެއްވަނައަށް އަލުން ޖެހިލައިފި އެވެ.

އަމިއްލަ ދަނޑުގައި ކުޅުނު މެޗުން ބާސެލޯނާ އަތުން ރެއާލް މޮޅުވީ 2-0 ގެ ނަތީޖާއަކުންނެވެ. މި މޮޅާއެކު ރެއާލް އެއްވަނައަށް ޖެހިލީ އެއް ޕޮއިންޓުގެ ފަރަގަކާ އެކުއެވެ. ރެއާލަށް 26 މެޗުން 56 ޕޮއިންޓު ލިބިފައިވާއިރު، ބާސާއަށް 26 މެޗުން ލިބިފައިވަނީ 55 ޕޮއިންޓެވެ.

އާދީއްތަ ދުވަހުގެރޭ ރެއާލްގެ ދަނޑުގައި ކުޅުނު މެޗުގެ ފުރަތަމަ ހާފުގައި މޮޅު ކުޅުމެއް ދެއްކީ ބާސާއިންނެވެ. އެގޮތުން މި ހާފުގައި ބާސާއިން ވަނީ ރެއާލްގެ ގޯލަށް ނުރައްކާ ކޮށްފައެވެ. އެގޮތުން ބާސާގެ މިޑްފީލްޑަރު އާތޫރު މެލޯ އާއި ކެޕްޓަން ލިއޮނެލް މެސީ ނުރައްކާތެރި ދެ ހަމަލާއެއް އުފެއްދި ނަމަވެސް، އެ ދެ ހަމަލާވެސް ރެއާލްގެ ގޯލްކީޕަރު ތިބައޫ ކޯޓުއާ ވަނީ ހުށިޔާރުކަމާއެކު ދިފާއު ކޮށްފައެވެ.

ފުރަތަމަ ހާފާ ޚިލާފަށް ދެވަނަ ހާފު ރެއާލުން ފެށީ ވަރުގަދަ ކޮށެވެ. އެގޮތުން ދެވަނަ ހާފުގެ ކުރީކޮޅު އޭރިއާ ބޭރުން ރެއާލްގެ މިޑްފީލްޑަރު އިސްކޯ ފޮނުވާލި ނުރައްކާތެރި ހަމަލާއެއް ބާސާގެ ގޯލްކީޕަރު މާކް-އަންދްރޭ ޓާ ސްޓޭގަން ދިފާއުކުރިއިރު، އޭގެ ފަހުން ބޮލުން އިސްކޯ ފޮނުވާލި ހަމަލާއެއް ގޯލުގެ ރޮނގު މަތިންހެން ދިފާއުކުރީ ބާސާގެ ޑިފެންޑަރު ޖެރާޑް ޕީކޭ އެވެ.

މި މެޗުގައި ރެއާލުން ލީޑު ނަގާފައިވަނީ 71 ވަނަ މިނެޓުގައެވެ. މިޑްފީލްޑަރު ޓޯނީ ކްރީސް ދިން ޕާހަކުން މި ލަނޑު އެޓީމަށް ކާމިޔާބުކޮށްދިނީ ވިނީޝިއަސް ޖޫނިއާ އެވެ. އަދި މެޗުގައި ރެއާލުން ލީޑު ފުޅާކޮށްފައިވަނީ އިތުރު ވަގުތުގައެވެ. މި ލަނޑު އެޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި މަރިއާނޯ ޑިއާޒް އެވެ. އޭނާ މި ލަނޑު ޖެހީ ކުޅެންއަރާ ލިބުނު ފުރަތަމަ ބޯޅައިންނެވެ.

އަމިއްލަ ދަނޑުގައި ބާސާ އަތުން ރެއާލް މޮލެއް ހޯދިއިރު، މިއީ 2016 ވަނަ އަހަރުގެ އޭޕްރީލް މަހަށްފަހު ލީގުގައި ބާސާ އަތުން ރެއާލް މޮޅުވި ފުރަތަމަ މެޗެވެ. މި ސީޒަނުގެ ލީގުގައި ކުޅުނު ފުރަތަމަ ކްލަސިކޯ މެޗު ނިމުނީ ދެޓީމުންކުރެ ޓީމަކަށް ލަނޑެއް ކާމިޔާބުނުކުރެވި އެއްވަރުވެގެންނެވެ.