މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސްގައި ޝަކުވާ ހުށަހެޅުމަށްޓަކައި ގާއިމުކޮށްފައިވާ ޗައިލްޑް ހެލްޕްލައިން 1412 އިން 24 ގަޑިއިރު ޚިދުމަތް ދެވެމުން ނުދާކަމަށް އޮޑިޓަރ ޖެނެރަލް އޮފީހުން ކޮށްފައިވާ އޮޑިޓް ރިޕޯޓްގައި ބުނެފި އެވެ.
އޮޑިޓް އޮފީހުން ކޮށްފައިވާ މިއޮޑިޓަކީ މިއަހަރުގެ ޖެނުއަރީ މަހުގެ 18 ވަނަ ދުވަހު ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީގެ ބައްދަލުވުމުގައި ނިންމާފައިވާ ކަންކަމުގެ ތެރެއިން ކުޑަކުދިންގެ މައްސަލަތައް ތަހުޤީޤުކޮށް އެ ކުދިންނަށް ރައްކާތެރިކަން ފޯރުކޮށްދިނުމުގެ ޒިންމާ މަތިކޮށްފައިވާ ޖެންޑަރ މިނިސްޓްރީގެ ފެމިލީ އެންޑް ސޯޝަލް ސަރވިސަސްގެ ފެމިލީ ސަޕޯޓް ޑިޕާޓްމަންޓުން ކުރަމުންދާ މަސައްކަތްތަކުގެ ޕަރފޯމަންސް ދެނެގަތުމަށް ކޮށްފައިވާ އޮޑިޓެކެވެ.
މިއޮޑިޓް ކުރުމަށްފަހު އޮޑިޓް އޮފީހުން ރިޕޯޓް އާންމުކޮށްފައިވާއިރު މިރިޕޯޓްގައި ބުނެފައިވަނީ ޗައިލްޑް ހެލްޕްލައިން، ކޯލް ސެންޓަރު ބަންދުކުރާ ގަޑިތަކުގައި އޮން-ކޯލްގައި ހުންނަ މުވައްޒަފަށް ކޯލްތައް ޑައިވަރޓްވާއިރު އެ މުވައްޒަފު ކޭހެއްގައި މަސައްކަތްކުރަމުންދާ ވަގުތާއި އޮން-ކޯލް ފޯނަށް ޖަވާބުދޭ ވަގުތުތަކުގައި ޑައިވަރޓްވާ ކޯލްތަކަށް ޖަވާބުނުދެވޭ ކަމަށެވެ. އަދި ޕްރޭންކް ކޯލްތަކާއި ސައިލެންޓް ކޯލްތަކާއި ކޭސްތަކާއި ގުޅޭ މައުލޫމާތު ބެލޭނެ އެހެން ނިޒާމެއް މިނިސްޓްރީން ގާއިމުކޮށްފައި ނުވުމުގެ ސަބަބުން ކޭސްވާކަރުން ރަސްމީ ބޭނުންތަކުގައި ހެލްޕްލައިނަށް ގުޅަމުން ދިއުމުން ޚިދުމަތަށް ބުރު އަރާ ކަމަށެވެ. އަދި ހެލްޕްލައިންގެ ޚިދުމަތް އެންމެ ބޮޑަށް ބޭނުންވާ ފަރާތްތަކަށް ޚިދުމަތް ފޯރުކޮށް ނުދެވި އެފަރާތް ހުރި ހާލަތު އިތުރަށް ގޯސްވުމަށް މަގުފަހިވެގެންދިޔުމުގެ ފުރުސަތު އޮންނަކަމަށް މިރިޕޯޓްގައި ބުނެފައިވެ އެވެ.
މީގެއިތުރުން މިހެލްޕްލައިނަށް މިނިސްޓްރީގެ މުވައްޒަފުން ރަސްމީ ބޭނުންތަކުގައި ގުޅާކަން ފާހަގަ ކުރެވިފައިވާކަމަށްވެސް މިރިޕޯޓްގައި ބުނެފައިވެ އެވެ. އެގޮތުން އޮންކޯލްގައި ތިބޭ މުވައްޒަފުން ކޭސްތަކާއި ގުޅިގެން ސާފުކުރަންޖެހޭ މުހިންމު މައުލޫމާތު ސާފު ކުރުމަށާއި އެހެނިހެން ކަންކަމުގައި ހެލްޕްލައިނަށް ގުޅާކަން ފާހަގަކުރެވޭކަމަށް ރިޕޯޓްގައިވެ އެވެ. އަދި މިގޮތަށް ދިމާވަނީ ކޭސްތަކާއި ގުޅޭ މައުލޫމާތު ބެލޭނެ ނިޒާމެއް މިނިސްޓްރީގައި ގާއިމުކޮށްފައި ނުވުމުގެ ސަބަބުންކަމަށް ފާހަގަ ކުރެވޭކަމަށް އޮޑިޓް ރިޕޯޓްގައި ބުނެފައިވެ އެވެ.
އެހެންކަމުން މިކަން އިސްލާހުކުރުމަށް ކޭސްވޯކަރުން އޮންކޯލްގައި ތިބޭ ވަގުތުތަކުގައި ކޭސްތަކުގެ މައުލޫމާތު ރިއަލް ޓައިމްކޮށް ބެލޭނެ އިންތިޒާމެއް ހަމަޖެއްސުމާއެކު ހެލްޕްލައިންގެ އިޚުތިޞާސްގެ ތެރޭގައި ހިމެނޭ ކަމެއްގައި ކޮންމެހެން ގުޅަން ޖެހިގެން ނޫން ގޮތަކަށް ހެލްޕްލައިނަށް އިންޓަރނަލް ކޯލް ނުކުރުމަށް މުވައްޒަފުންނަށް އިރުޝާދު ދިނުމަށް މިނިސްޓްރީއަށް ދަންނަވާކަމަށް ރިޕޯޓްގައި ބުނެފައިވެ އެވެ.
މީގެއިތުރުން 24 ގަޑިއިރު ޚިދުމަތް ދެވޭ ފެންވަރަށް ކޯލްސެންޓަރުގައި އިންސާނީ އަދި އެހެނިހެން ވަސީލަތްތައް ގާއިމުކުރުމަށާއި ހެލްޕްލައިން ކޯލްތައް ޓްރެކް ކުރެވޭނެ ޚަރުދަނާ ނިޒާމެއް ގާއިމުކުރުމަށާއި ހެލްޕްލައިނަށް އަންނަ ކޯލްތަކުގެ ތެރެއިން މިސްވާ ކޯލްތަކުގެ އަދަދު ވީހާވެސް މަދުކުރުމަށް ރިޕޯޓްގައި ފާހަގަކޮށްފައިވެ އެވެ. އަދި ހެލްޕްލައިނަށް ރައްޔިތުން ހޭލުންތެރިކުރުމުގެ އިތުރު ޕްރޮގްރާމްތައް ރާވައި ހިންގުމަށްވެސް މިނިސްޓްރީއަށް ވަނީ ލަފާ އަރުވާފައެވެ.
