ލޯކަލް ކައުންސިލްތަކުގެ އިންތިޚާބު 2020: މިއަދުމީ ރީރެޖިސްޓްރޭޝަންގެ ފަހު ދުވަސް!
27 ފެބުރުއަރީ 2020 | ބުރާސްފަތި 07:52މިއަދުގެ ހަވީރު 15:00 އަށް ރީރަޖިސްޓަރީވުމުގެ ފުރުސަތު ހަމަވާނެ
ރީރަޖިސްޓްރީވުމަށް އިލެކްޝަނުން ނޯތް ހާބަރުގައި ކުރިއަށްގެންދިޔަ ހަރަކާތުގެ ތެރެއިން - އިލެކްޝަންސް ކޮމިޝަން
އަންނަ އޭޕްރީލް މަހުގެ ހަތަރު ވަނަ ދުވަހު ބާއްވާ ލޯކަލް ކައުންސިލް އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގައި ރީރަޖިސްޓްރީވާން ބޭނުންވާ ފަރާތްތަކަށް ހުޅުވާލާފައިވާ ފުރުޞަތު މިއަދު ހަމަވާނެ އެވެ.
އިލެކްޝަންސް ކޮމިޝަނުން ބުނީ، ރީރަޖިސްޓްރީވާން ބޭނުންވާ ފަރާތްތަކަށް ހުޅުވާލެވުނު ފުރުޞަތު މި ފެބްރުއަރީ 27 ވަނަ ދުވަހު (މިއަދު)ގެ 15:00އަށް ހަމަވާނެ ކަމަށެވެ. ރީރަޖިސްޓްރީވާން ބޭނުންވާ ފަރާތްތަކަށް އެ ފުރުޞަތު އިލެކްޝަންސް ކޮމިޝަނުން ހުޅުވާލާފައިވަނީ މިމަހުގެ 16 ވަނަ ދުވަހު އެވެ.
ރީރަޖިސްޓްރީވާން ޖެހެނީ، ރައްޔިތުންގެ މަޖިލީހުގެ އިންތިޚާބުގައި ޖަލުތައް، ރިސޯޓުތައް އަދި ސިނާޢީ މަސައްކަތްކުރާ ތަންތަނަށް ވޯޓުލީ މީހުންނާއި ވޯޓުލާން ރަޖިސްޓަރީވެފައިވާ ތަން ނޫން އެހެން ތަނެއްގައި ވޯޓުލުމަށްޓަކައި ރަޖިސްޓްރީވުމަށެވެ. އަދި އަންނަ އޭޕްރީލް ހަތަރު ވަނަ ދުވަހަށް އަލަށް 18 އަހަރު ފުރޭ މީހުންގެ ތެރެއިން ރަށްވެހިވެފައިވާ ތަންނޫން އެހެން ތަނަކަށް ވޯޓުލާން ބޭނުންވާ މީހުން ނެވެ.
އިލެކްޝަންސް ކޮމިޝަނުން ގެންދަނީ ރީރަޖިސްޓަރީވުމަށް ބޭނުންވާ މީހުންނަށް އެފުރުޞަތު ފަސޭހަކަމާއެކު ފޯރުކޮށްދިނުމަށް ޙަރަކާތްތަތަކެއް ހިންގުމުން ނެވެ. އެގޮތުން، މިކަން ފަސޭހަކޮށްދިނުމުގެ ގޮތުން އިލެކްޝަންސް ކޮމިޝަނުން މޮބައިލްކޮށް ތަންތަނަށް ގޮސް ރީރަސްޖިސްޓްރީ ކުރުމުގެ ޙަރަކާތެއް ވަނީ ހިންގާފައެވެ.
ނިމިގެންދިޔަ ރައްޔިތުންގެ މަޖިލިސް އިންތިޚާބުގައި ވޯޓުލީ ތަން ނޫން އެހެންތަނަކަށް ވޯޓުލާން ޖެހޭނަމަ ރީރަޖިސްޓްރީވާން ޖެހޭނެ އެވެ.
