ކުރީ ސަރުކާރުން ބޯހިޔާވަހިކަން ފޯރުކޮށްދިނުމަށް ކުރި މަސައްކަތަކީ ބޮޑު ޖޯކެއް: އެމްޑީޕީ
26 ފެބުރުއަރީ 2020 | ބުދަ 08:22މާދަމާއިން މާރޗް މަހުގެ 8 ގެ ނިޔަލަށް ކެންޑިޑޭޓުންގެ މަންދޫބުންގެ ގޮތުގައި ނަން ހުށަހެޅުމަށް ފުރުސަތު ހުޅުވިގެންދާނެ
ނޫސްވެރިންގެ ބައްދަލުވުމުގެ ތެރެއިން
ކުރީގެ ރައީސް އަބްދުﷲ ޔާމީންގެ ވެރިކަމުގައި ރައްޔިތުންނަށް ބޯހިޔާވަހިކަން ފޯރުކޮށްދިނުމުގެ ނަމުގައި ކުރި މަސައްކަތަކީ ބޮޑު ޖޯކެއްކަމަށް އެމްޑީޕީން ބުނެފިއެވެ.
ކުރިޔަށް އޮތް ލޯކަލް ކައުންސިލް އިންތިހަބާއި ގުޅިގެން އެމްޑީޕީން ސިލްސިލާކޮށް ބާއްވަމުން އަންނަ ނޫސްވެރިންގެ ބައްދަލުވުމެއްގައި ކައުންސިލް ކެމްޕެއިންގެ ސްޕޯކްސްޕަރސަން އަފްޝަން ލަޠީފު ވިދާޅުވީ ޔާމީންގެ ސަރުކާރުން އެތައް ބައެއްގެ ބޯހިޔާވެހިކަމުގެ ހައްގު ނިިގުޅައިގަނެފައިވާ ކަމަށާއި، ރައްޔިތުންނަށް ބޯހިޔާވަހިކަން ފޯރުކޮށްދިނުމުގެ ނަމުގައި ކުރި މަސައްކަތަކީ ބޮޑު ޖޯކެއް ކަމަށެވެ. އެފަދަ ބަޔަކު، އެމްޑީޕީން ރައްޔިތުންނަށް ވެފައިވާ ވައުދުތަކާއި ވާހަކަތަކަކީ ހޮޅި ވާހަކަތަކެއް ކަމަށް ސިފަކުރައްވާތީ ލަދުވެތިވާ ކަމަށެެވެ.
އަަފްޝަން ވިދާޅުވީ ދިވެހި ރައްޔިތުންނަށް ހައްގު ބޯހިޔާވަހިކަން ފޯރުކޮށްދިނުމަކީ 2008 ވަނަ އަހަރުގައި އެމްޑީޕީ ސަރުކާރުން ފެށމ ކަމެއްކަން ފާހަގަކޮށް އަފްޝަން ވިދާޅުވީ، އެއަށް ފަހު އައި ސަރުކާރުތަކުން ވަކި ބަޔަކަށް މަންފާވާ ގޮތަށް އެކަންތައް ކުރި ނަމަވެސް މި ސަރުކާރުން އެކަން ބަދަލުކުރުމުގެ މަސައްކަތް ފެށިފައިވާ ކަމަށެވެ. އަފްޝަން ވިދާޅުވީ ރައްޔިތުންގެ ދިމާވާ ދަތިތަކާއި ކަންބޮޑުވުންތައް ހައްލުކުރުމަށް ސަރުކާރާއި އަދި އެމްޑީޕީ ގުޅިގެން އަބަދުވެސް މަސައްކަތް ކުރާނެ ކަމަށެވެ.
ލޯކަލް ކައުންސިލް އިންތިހާބުގެ ކެމްޕެއިން މަސައްކަތަށް އަލިއަޅުއްވައި އަފްޝަން ވަނީ މި ސަރުކާރުން ކައުންސިލްތަކަށް ބޮޑެތި ބާރުތަކެއް ދީ އިސްލާހުތައް ގެނުވި، ލާމަރުކަޒީ ގާނޫނަށް ވީހާވެސް ބޮޑަށް އަހުލުވެރިވުމަށް ކެންޑިޑޭޓުންނާއި ކެމްޕެއިން ޓީމްތަކަށް ގޮވާލައްވާފައެވެ. ބުރާސްފަތި ދުވަހަކީ ލޯކަލް ކައުންސިލް އިންތިހާބަށް ރީ ރަޖިސްޓްރޭޝަންގެ ސުންގަޑި ހަމަވާ ދުވަހަށް ވުމާއެކު އެއްވެސް އެހީތެރިކަމެއް ބޭނުންވާނަމަ އެކަން ފޯރުކޮށްދޭނެކަމަށް އެމްޑީޕީން ވަނީ ބުނެފައެވެ.
އެމްޑީޕީން ވަނީ ބުރާސްފަތި ދުވަހުން ފެށިގެން އަންނަ މާރޗް މަހުގެ 8 ގެ ނިޔަލަށް ލޯކަލް ކައުންސިލް އިންތިހާބުގައި ވާދަކުރާ ކެންޑިޑޭޓުންގެ މަންދޫބުންގެ ގޮތުގައި ނަން ހުށަހެޅުމަށް ފުރުސަތު ހުޅުވިގެންދާނެ ކަމަށް ބުނެފައެވެ. އަދި މި ފަހަރު ބޭއްވިގެން ދާ އިންތިހާބަކީ ގިނަ އަދަދެއްގެ ކެންޑިޑޭޓުންނާއި އެކު ތަފާތުގޮތަކަށް ބޭއްވިގެންދާ އިންތިހާބަކަށް ވުމުން ވީހާވެސް ގިނަ އަދަދެއްގެ މަންދޫބުން ބައިވެރުވުމަށް އެ ޕާޓީން ވަނީ އެދިފައެވެ.
