އުރީދޫއިން ޑެފް ކޮމިއުނިޓީއަށް އެހީވުމަށް ޚާއްސަ ޕްލޭންތަކެއް!
ޚިދުމަތް ހޯދުމުގައި ފަސޭހަ ކުރުމުގެ ގޮތުން ޚާއްސަ ހޮޓްލައިންއެއް ޤާއިމުކޮށްފައިވޭ
އުރީދޫއިން ޑެފް އެސޯސިއޭޝަނާ ގުޅިގެން ކުރަމުންދާ މަސައްކަތްތަކުގެ މައުލޫމާތު ހިއްސާކުރަނީ
ރާއްޖޭގައި ޓެލެކޮމިއުނިކޭޝަން ޚިދުމަތްދޭ އެންމެ ބޮޑު އެއް ކުންފުނި ކަމަށްވާ އުރީދޫއިން އަޑުއިވުމުން ނުކުޅެދޭ ފަރާތްތަކައް ޚާއްސަ ޕްލޭންތަކެއް ތަޢާރަފުކޮށްފިއެވެ.
އަޑުއިވުމުން މަޙުރޫމުވެފައިވާ ކުދިންނަށް އެހީވުމުގެ ގޮތުން އުރީދޫއިން އެކި ރޮނގު ރޮނގުން ގިނަ މަސައްކަތްތަކެއް ދަނީ ކުރަމުންނެވެ. އެގޮތުން އެފަދަ ފަރާތްތަކަށް ޚިދުމަތްތައް ލިބިގަތުމުގައި ދިމާވެފައިވާ ގޮންޖެހުންތައް ދެނެގަނެ، އެކަންކަމަށް ޙައްލެއް ގެނައުމަށް އުރީދޫއިން މިހާރުވެސް ދަނީ ޑެފް އެސޯސިއޭޝަނާ ގުޅިގެން ގިނަ މަސައްކަތްތަކެއް ކުރަމުންނެވެ.
ޑެފް ކޮމިއުނިޓީއަށް އެހީވުމަށް އުރީދޫއިން ކުރަމުންދާ މަސައްކަތްތަކުގެ ތެރެއިން އަންގާރަ ދުވަހު ވަނީ އެ ފަރާތްތަކުން ޚިދުމަތް ހޯދުމުގައި ފަސޭހަ ކުރުމުގެ ގޮތުން ޚާއްޞަ ހޮޓްލައިނެއް ޤާއިމުކޮށްފައެވެ. އެގޮތުން 9611929 އަށް ގުޅައިގެން ވައިބަރ މެދުވެރިކޮށް މަޢުލޫމާތު ހޯދޭނެ އިންތިޒާމު ހަމަޖެހިފައިވާއިރު، އެ ނަންބަރަށް ގުޅާލުމުން މަޢުލޫމާތު ދިނުމަށް އިންނަވާނީ "ސައިން ލެންގުއޭޖް" ދަންނަ މުވައްޒަފެއް ކަމަށް އުރީދޫއިން މަޢުލޫމާތު ދެއެވެ.
އޭގެ އިތުރުން އުރީދޫ އިން ތަޢަރަފުކޮށްފައިވާ "އެކު" ޕޯސްޓްޕެއިޑް ޕްލޭންތައް ބޭނުން ކުރުމުގައިވެސް ޑެފް ކޮމިއުނިޓީއަށް ޚާއްޞަޕްލޭންތަކެއް ވަނީ ތަޢާރަފު ކޮށްފައެވެ. އެގޮތުން އުރީދޫ "އެކު" ޕޯސްޓްޕެއިޑް މެދުވެރިކޮށް ރާއްޖޭގެ އެންމެ ބޮޑު ޑޭޓާ އެލަވަންސްތަކާއި، އޮޕްޓިމައިޒް ކުރެވިފައިވާ ވީޑީއޯ ސްޓްރީމިންގ ޚިދުމަތް ލިބިގެންދާއިރު، ޑެފް ކޮމިއުނިޓީއަށް ޚާއްޞަކޮށް ވައިބަރއާއި، ވަޓްސްއެޕްގައި ފްރީކޮށް ވީޑިއޯ ކޯލް ކުރެވޭނެކަމަށް އުރީދޫއިން ބުނެއެވެ.
ފާއިތުވި ދުވަސްތަކުގައި އުރީދޫއިން ވަނީ ޑެފް ކޮމިއުނިޓީގެ ފަރާތުން ޚިދުމަތް ހޯދަން އަންނަ ފަރާތްތަކަށް އެހީވުމުގެ ގޮތުން އުރީދޫގެ 15 މުވައްޒަފުންނަށް ސައިން ލެންގުއޭޖް ޓްރެއިނިންގ ކޯހެއްވެސް ކުރިއަށް ގެންގޮސްފައެވެ. އެކަމުގެ ސަބަބުން އުރީދޫ ސެންޓަރުތަކަށް ޚިދުމަތް ހޯދަން އަންނަ ފަރާތްތަކަށް އިތުރަށް ލުއިފަސޭހަވެގެންދާނެ ކަމަށް އުރީދޫއިން ބުނެއެވެ.
