ނުރައްކާތެރި މިންވަރަކަށް އިޓަލީވިލާތުގައި ކޮރޯނާވައިރަސް ފެތުރެނީ

އިޓަލީވިލާތުގައި ނުރައްކާ މިންވަރަކަށް ކޮރޯނާވައިރަސް ފެތުރި 272 މީހުންނަށް މިހާތަނަށް ވައިރަސް ޖެހިފައިވާކަމަށް އެގައުމުން ހަމަކޮށްފިއެވެ.

އެގައުމުގެ އުތުރުގެ ސަރަހައްދުން ހޯމަ ދުވަހުގެ ނިޔަލަށް އިޓަލީގައި 40 ކޭސް އަލަށް ފެނިފައިވާ ކަމަށް އިޓަލީގެ ސިވިލް ޕްރޮޓެކްޝަން ޑިޕާޓްމަންޓުން ވަނި ހާމަކޮށްފައެވެ. އަދި މިއާއެކު އިޓަލީވިލާތުން ކޮރޯނާވައިރަސް ޖެހުނު މީހުންގެ އަދަދު ވަނީ 272 އަށް އަރާފައިވެއެވެ.

މިހާތަނަށް މި ބަލީގައި އެގައުމުން 7 މީހަކު ވަނީ މަރުވެފައެވެ. މީގެ ތެރޭގައި ހިމެނެނީ ލޮމްބާޑީއިން މަރުވި 6 މީހުންނާއި ވެނެޓޯ އިން މަރުވި އެކަކެވެ. ބަލިފެތުރިފައިވާ މިންވަރުގެ ތަފްސީލަށް ބަލާއިރު، ލޮމްބާޑީގައި 206 މީހުން، ވެނެޓޯގައި 38 މީހުން، އެމިލިއާ-ރޮމަންޏާ ގައި 21 މީހުން، ޕީޑްމޮންޓުގައި 3 މީހުން، ބޮލްޒަނީ އަދި ޓްރެންޓީނޯގައި 1 އަދި ރޯމްގައި 3 މީހަކަށް ވަނީ ބަލީގެ އަސަރުކޮށްފައެވެ.

މިހާތަނަށް މުޅި ދުނިޔެއިން 79،0000 އަށް ވުރެ ގިނަ މީހުން ވައިރަސްއަށް ޕޮޒިޓިވް، 2،600 މަރުވެފައިވާކަމަށް އެންމެފަހުގެ ތަފާސް ހިސާބުތަކުން ދައްކައެވެ. އަދި ކުވޭތާއި، ބަހްރެއިނާއި، އަފްޣާނިސްތާނާއި، އިރާޤާއި، އޮމާނުން އިއްޔެ ވަނީ ފުރަތަމަ ފަހަރަށް މި ވައިރަސް ފެނިފައެފެ. ކުވޭތުން 3 ކޭސް، އޮމާނުން 2 ކޭސް، އަދި އިރާޤާއި ބަހްރެއިނުން، ކޮންމެ ޤައުމަކުން އެކަކު ވަނީ ކޮވިޑް-19 އަށް ޕޮޒިޓިވް ވެފައެފެ.

މި ވައިރަސް އެންމެ ފުރަތަމަ ފެނުނު ޗައިނާއަށް ބަލާއިރު، އިއްޔެ އެކަނި އެޤައުމުން 150 މީހުން ވަނީ މި ވައިރަސްއަށް ޕޮޒިޓިވް ވެފައެވެ. ޗައިނާގެ ނެޝަނަލް ހެލްތު ކޮމިޝަނުން ބުނާގޮތުގައި، އެޤައުމުގައި 77،262 މީހުން މި ވައިރަސްއަށް ޕޮޒިޓިވްވެ، 2،595 މީހުން ވަނީ މަރުވެފައެވެ.