ފިޝަރީޒް މިނިސްޓަރ އިސްތިއުފާ ދެއްވާ، މިއަދުން މިއަދަށް ކޯލިޝަން އުވާލަންޖެހޭ: ޢަބްދުﷲ ޝަހީމް
25 ފެބުރުއަރީ 2020 | އަންގާރަ 05:47ކޯލިޝަން ސަރުކާރެއް އުފައްދައިގެން ރައްޔިތުން ބޭނުންވާ ކަންކަން ފޯރުކޮށް ނުދެވޭކަމަށް ވިދާޅުވި
ކަނޑިތީމު ދާއިރާގެ މެމްބަރ އަބްދުﷲ ޝަހީމް އަބްދުލްހަކީމް
މިއަދުގެ ހަޤީޤަތަކީ ފިޝަރީޒް މިނިސްޓްރީ ފެއިލްވެއްޖެ ކަމަށާއި އެހެންކަމުން ފިޝަރީޒް މިނިސްޓަރ ޒަހާ ވަހީދު އިސްތިއުފާދެއްވުމަށް ރައްޔިތުންގެ މަޖިލީހުގެ އެމްޑީޕީގެ ޕާލަމަންޓްރީ ގްރޫޕްގެ ކަނޑިތީމު ދާއިރާގެ މެމްބަރ އަބްދުﷲ ޝަހީމް އަބްދުލްޙަކީމް ގޮވާލައްވައިފި އެވެ.
ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި ޔުޓިލިޓީ ރެގިޔުލޭޓަރީ އޮތޯރިޓީ ބިލަށް ބަހުސްކުރައްވަމުން އަބްދުﷲ ޝަހީމް ވަނީ މިއަދުގެ ސަރުކާރަށް ވަރަށް ބޮޑަށް ފާޑުވިދާޅުވެ ވާހަކަ ދައްކަވާފަ އެވެ. އެގޮތުން ޝަހީމް ވިދާޅުވީ ބިލްތައް ހުށަހަޅައިގެން ކަންކަން ރަނގަޅުކުރަން އުޅޭއިރު އެކަންކަން ރަނގަޅަށް ކުރަންޖެހޭ ކަމަށެވެ. މަސްވެރިންނާ ގުޅުންހުރި ޤާނޫނެއް ރައްޔިތުންގެ މަޖިލީހުން ފާސްކޮށްފައިވާކަން ފާހަގަކުރައްވާ ޝަހީމް ވިދާޅުވީ އެބިލްގައި އެކަން ކުރާނެ އުސޫލުތަކަކާއި ހަމަތައް ލިޔުމަށް ފިޝަރީޒް މިނިސްޓްރީއަށް ޖެހޭކަމަށެވެ.
އެހެންނަމަވެސް މިއަދު މަސްވެރިންގެ ހާލަތަކީ ކޮބައިތޯ އާއި އެކަން މިނިސްޓަރ ބައްލަވާތޯ ޝަހީމް ވަނީ ސުވާލު އުފައްދަވާފަ އެވެ.
ޝަހީމްގެ ވާހަކަފުޅުގައި ވަނީ ކޯލިޝަން ސަރުކާރެއް އުފައްދައިގެން ރައްޔިތުން ބޭނުންވާ ކަންކަން ފޯރުކޮށް ނުދެވޭކަމަށް ވިދާޅުވެ ކޯލިޝަންގައި ތިއްބެވި އެހެން ޕާޓީތަކަށް ފާޑުވިދާޅުވެފަ އެވެ. އެގޮތުން ޝަހީމް ވިދާޅުވީ ކޯލިޝަން ހަދާފައި އޮތް ސަރުކާރެއް ކޯލިޝަން ޕާޓްނަރުން ގޮތުގައި ޖުމްހޫރީ ޕާޓީ އާއި އަދާލަތު ޕާޓީ މީހުން އިސްކޮށްގެން ބޯޑުތަކަށް ލެވިދާނެ ކަމަށެވެ. ނަތީޖާ މިއަދު މިއޮތީ ފެންނަން ކަމަށާއި މުއައްސަސާތައް ދަނީ ފެއިލްވަމުން ކަމަށް ޝަހީމް ވިދާޅުވި އެވެ.
ސަރުކާރު ފެއިލްވުމުގެ ކުރިން މިސަރުކާރުން ވަރަށް ފުންކޮށް މިކަމާއި ވިސްނަންޖެހޭ ކަމަށް ޝަހީމް ވިދާޅުވި އެވެ. މިއަދު ކުންފުނިތައް ހަދާ މިކުންފުނިތަކަށް ލާފަތިބި އެމްޑީއާ ޑީއެމްޑީން ކަންކުރަމުންދާގޮތް ވަރަށް ރަނަގަޅަށް މިސަރުކާރަށް އެނގެން އެބަޖެހޭ ކަމަށް ޝަހީމް ވިދާޅުވި އެވެ. ޝަހީމް ވިދާޅުވީ ކޯލިޝަން ސަރުކާރު އުވާލާ މިނިސްޓްރީތަކުގެ ބާރު އެމްޑީޕީއަށް ލިބެންޖެހޭ ކަމަށެވެ.
ޝަހީމް ވިދާޅުވީ މިވާހަކަތައް ދެއްކުމުން ބައެއް ބޭފުޅުން ހިތްހަމަނުޖެހިދާނެ ކަމަށެވެ. އެހެންނަމަވެސް ގޯސްކޮށް ކަންކުރަމުންދާނަމަ އެވާހަކަ ދައްކާނެ ކަމަށާއި ހުރިހާ ކަމެއް ދަނީ ރަނގަޅަށް ނޫން ކަމަށް ޝަހީމް ވިދާޅުވި އެވެ. އަދި މިއަދު އެކަން ވަރަށް ސާފުކޮށް އެބަފެންނަކަމަށާއި އެހެންކަމުން މަޖިލީހަށް އައިސް ސަރުކާރަށް ސަނާނުކިޔާނެ ކަމަށް ޝަހީމް ވިދާޅުވި އެވެ.
