ސްނެޕްޗެޓް ސްޓްރީކް ގެއްލޭކަން ހަނދާންކޮށްދޭ އެކުވެރިއަކީ ކާކު؟

ހޭބޯނާރާ ބުރަ މަސައްކަތުގައި ގިނަ މީހުން އުޅޭއިރު ވަގުތުދާ ގޮތް ގިނަ ފަހަރަށް ނޭނގެއެވެ. މަސައްކަތުގެ މާހައުލުން ބޭރަށް ޖެހެލުމަށް ނުވަތަ ކުޑަ ބްރޭކެއް ނަގަނީ ކޮފީ މޭޒަކުންނެވެ. ކޮފީ މޭޒުން ނިންމާލަނީ އެއް ނޫނެއެވެ. އިންސްޓަގްރާމް ނުވަތަ ސްނެޕްޗެޓުގެ ސްޓޯރީ އަޕްނުކުރާނެ ޒުވާނަކު މަދުވާނެއެވެ. ޓެކްނޮލޮޖީ ތަފާތު އެޕްލިކޭޝަންތަކުން މުނިފޫހި ފިލުވަމުންދާއިރު، ސްނެޕްޗެޓްގެ ސްޓްރީކަކީ ތަފާތު އެއްޗެވެ.

ސްނެޕްޗެޓްގެ ސްޓްރީކަކީ ދެމީހަކު މެދުކެނޑުމެއްނެތި ކޮންމެ ދުވަހަކު އެކަކު އަނެކަކަށް ސްނެޕްކުރުމުން ސްނެޕްޗެޓް ފެންނަ އެއްޗެކެވެ. އަދި މެދުކެނޑުމެއްނެތި ސްނެޕްކުރި ވަރަކަށް ސްޓްރީކަށް އެކިކަހަލަ ބަދަލުތައް އަންނަމުންދާނެއެވެ.

ސެނެޕްގެ ސްޓްރީކަށް ގިނަ ބައެއްގެ ސަމާލުކަން ހުއްޓިފައިވާއިރު، ޗެޓްކުރުމުގެ ބަދަލުގައި އެކަކު އަނެކަކަށް ފޮޓޯ ފޮނުވި ނަމަވެސް ސްޓްރީކް އަރާނެއެވެ. މަޖާ ކުޅިވަރަކަށް ވެސް ބައެއް މީހުން މިކަން ކޮށްއުޅެއެވެ.

ސްނެޕްގެ ސްޓްރީކާއި ބެހޭ ގޮތުން ރާއްޖެއެމްވީއާ ވާހަކަދެއްކި ބައެއް ޒުވާނުން ބުނީ ސްޓްރީކް ގެއްލުމުން ބައެއް ރައްޓެހިން ގުޅާ ނުރުހިގެން އެއްޗެހި ކިޔާ ކަމަށެވެ. އަދި ބައެއް ހާލަތްތަކުގައި ސްޓްރީކް ގެއްލޭކަމުގެ ނިޝާން އެރުމުން ފޯނުން ގުޅާ ހަނދާންކޮށްދޭ ކަމަށެވެ.

މީގެ އިތުރުން ޒުވާނަކު ކިޔާދިން ގޮތުގައި ސްޓްރީކް ގެއްލިގެން ބައެއް ރައްޓެހިން އަދަބުދީފައި އެބަހުއްޓެވެ. އެގޮތުން ގްރޫޕް އެންމެނަށް ހަފުތާއެއް ވަންދެން ރޭގަނޑުގެ ކެއުން ދިނުން ފަދަ ކަންކަން ހިމެނެއެވެ.

ބައެއް މީހުން ފާހަގަކުރާ ގޮތުގައި ސްޓްރީކް ނުގެއްލި ސަލާމަތްވަނީ އެކުވެރިޔާ ނުވަތަ ސްޓްރީކް ގެއްލޭ މީހާ ގުޅައިގެން ނުވަތަ ފޭސްބުކްއިން މެސެޖްކޮށް ހަނދާންކޮށްދީގެންނެވެ. އެހެންކަމުން ސްނެޕްގެ ސްޓްރީކް ދެމެހެއްޓުމަށް މިފަދަ ރައްޓެހިން މުހިންމު ދައުރެއް އަދާކުރެއެވެ.

ބައެއް މީހުން ކިޔާދިން ގޮތުގައި ސްނެޕްޗެޓުން ބައެއް މީހުން އަދަބާ ޚިލާފުކަންކަން ކުރި ނަމަވެސް ސްނެޕްޗެޓަކީ ދޭދޭ ގުޅުން ބަދަހިކޮށްދިނުމުގެ އިތުރުން މުނިފޫހި ފިލުވުމަށް ބޭނުންކުރަން މަޖާ އެޕްލިކޭޝަނެއެވެ.

ގިނަ ބައެއްގެ މެދުގައި މަގުބޫލު ސްނެޕްޗެޓަކީ އީވާން ސްޕީގަލް، ބޮބީ މަރޕީ އަދި ރޭޖީ ބްރައުން 2011 ވަނަ އަހަރު ސްޓެންފޯޑް ޔުނިވަރސިޓީގައި ކިޔަވަން އުޅުނުއިރު އީޖާދުކުރި އެޕްލިކޭޝަންއެކެވެ. ޕިކަބޫގެ ނަމުގައި މިއެޕްލިކޭޝަން ތައާރަފުކުރި ނަމަވެސް އެނަން ކިޔާ ކުންފުންޏަކުން މައްސަލަ ޖެއްސުމާއެކު، އެޕްލިކޭޝަންގެ ނަން ސްނެޕް ޗެޓަށް ބަދަލުކުރިއެވެ.

ޖެނުއަރީ 2014 ވަނަ އަހަރު ފޭސްބުކްގެ ވެރިޔާ މަރކް ޒަކަރބަރގް ސްނެޕްޗެޓް ގަންނަން 03 ބިލިއަން ޑޮލަރު ހުށަހެޅިނަމަވެސް އެޕްލިކޭޝަން ވިއްކާފައެއްނުވެއެވެ. މިހާރު ސެނެޕްޗެޓަކީ އިންކް ގެ ނަމުގައި ހިންގާ ކޮންޕެނީގެ އުފެއްދުމެކެވެ. މިއީ ސްނެޕްޗެޓް ހިންގަންވެގެން އުފައްދާފައިވާ ކުންފުންޏެކެވެ.

މިކުންފުނިން ބުނާ ގޮތުގައި ކޮންމެ ކަމެއްގައި ވެސް ހެވާއި، ރަނގަޅު އޮންނައިރު، ހެޔޮ ގޮތުގައި ބޭނުންހިފައިފި ކަމުގައިވާނަމަ އޭގެ ރަނގަޅު ނަތީޖާ ފެންނާނެއެވެ. އެގޮތުން ސްނެޕްޗެޓަކީ ފައިދާކުރާނެ މުނިފޫހިފިލުވައިދޭ މުހިންމު އެޕްލިކޭޝަނެކެވެ.