އަސަދުﷲ އަށް އަނިޔާވެ ހަ މަހަށް ކުޅުމާއި ދުރަށް

މާޒިޔާ ސްޕޯޓްސް އެންޑް ރެކްރިއޭޝަނުގެ ކެޕްޓަން އަސަދުﷲ އަބްދުﷲ ގެ ކަނާތު ކަކުލަށް ލިބުނު އަނިޔާއާ ގުޅިގެން، އޭނާ ހަ މަހަށް ކުޅުމާއި ދުރަށްދާން ޖެހިއްޖެ އެވެ.

އަސަދުﷲ އަށް އަނިޔާވީ އޭއެފްސީ ކަޕްގެ ޕްލޭއޮފްގެ ފުރަތަމަ ލެގުގައި މި މަހުގެ 19 ވަނަ ދުވަހު މާލޭގައި އިންޑިއަން ސުޕަ ލީގުގެ ޗެމްޕިއަން ބެންގަލޫރު އެފްސީ އަތުން މާޒިޔާ މޮޅުވި މެޗުގައެވެ. އެ މެޗުގެ ނުވަވަނަ މިނެޓުގައި އަސަދުﷲ އަށް އަނިޔާވުމުން އޭނާ ވަނީ ދަނޑުން ބާލާފައެވެ.

މިއީ ތިން އަހަރުގެ ތެރޭ އަސަދުﷲ ގެ ކަކުލަށް ލިބުނު ދެވަނަ އަނިޔާއެވެ. މީގެ ކުރިން 2017 ވަނަ އަހަރު ވާތު ކަކުލަސް އަނިޔާވިއިރުމ އެ އަނިޔާއިން ރަނގަޅުވުމަށް އޭނާ ވަނީ އޮޕަރޭޝަނެއްވެސް ކޮށްފައެވެ. އެ އޮޕަރޭޝަނަށްފަހު އަސަދުﷲ އެނބުރި ކުޅުމުގެ ތެރެއަށް އައީ 9 މަސް ފަހުންނެވެ.

ރާއްޖެ ޓީވީއަށް މައުލޫމާތު ދެމުން މާޒިޔާގެ އޮފިޝަލަކު ބުނީ ކަނާތު ކަކުލަށް ލިބުނު އަނިޔާއިން ރަނގަޅުވުމަށް މިފަހަރުވެސް އޮޕަރޭޝަނަށް ކުރަން ޖެހިފައިވާ ކަމަށާއި، އަސަދުﷲ އަށް ދެން އެނބުރި ކުޅުމުގެ ތެރެއަށް އާދެވޭނީ 6 ނުވަތަ 7 މަސް ފަހުން ކަމަށެވެ.

އޭއެފްސީ ކަޕްގެ ޕްލޭއޮފްގެ ފުރަތަމަ ދެވަނަ ލެގަށް މާޒިޔާ ޓީމު އިންޑިއާއަށް ގޮސްފައިވާއިރު، އަސަދުﷲ ވެސް ވަނީ ޓީމާއެކު ގޮސްފައެވެ. ދެވަނަ ލެގުގައި ބެންގަލޫރާ ދެކޮޅަށް މާޒިޔާ ނުކުންނާނީ އަންނަ ބުދަ ދުވަހު ރާއްޖެ ގަޑިން 19:00 ގައެވެ. މި މެޗު ކުޅޭނީ ބެންގަލޫރުގެ ސްރީ ކަންޓްރީވާ ސްޓޭޑިއަމްގައެވެ.

ދެވަނަ ލެގާ ކުރިމަތިލާއިރު، މާލޭގައި ކުޅުނު ފުރަތަމަ ލެގުގެ މެޗުން މާޒިޔާ ވަނީ ބެންގަލޫރު އަތުން 2-1 އިން މޮޅުވެފައެވެ. އެހެންކަމުން ރަށުން ބޭރުގައި ބެންގަލޫރާ އެއްވަރުކޮށްލައިގެންވެސް ގްރޫޕް ސްޓޭޖުގެ ޖާގައެއް ހޯދުމުގެ ފުރުސަތު މާޒިޔާއަށް އެބައޮތެވެ.

ޕްލެއި އޯފުން ކުރިހޯދާ މާޒިޔާ ގްރޫޕު ސްޓޭޖަށް ދަތުރުކޮށްފިނަމަ، ފުރަތަމަ ފަހަރަށް ގްރޫޕު ސްޓޭޖުގައި ރާއްޖޭގެ ދެ ޓީމެއް ކުޅުމުގެ ފުރުސަތު އެބައޮތެވެ. ޕްލެއި އޯފުން މާޒިޔާއަށް ކުރިލިބިއްޖެ ނަމަ، އެޓީމު ވާދަކުރަން ޖެހޭނީ ގްރޫޕު އީ ގައެވެ. އެ ގްރޫޕުގައި ހިމެނެނީ ރާއްޖޭގެ ޓީސީ ސްޕޯޓްސް ކްލަބުގެ އިތުރުން އިންޑިއާގެ އައި ލީގުގެ ޗެމްޕިއަން ޗެންނާއީ ސިޓީ އާއި ބަންގްލަދޭޝްގެ ބަޝުންދަރާ ކިންގްސް އެވެ.