ބިޒްނަސް އެކްސްޕޯ ފަށައިފި

ރާއްޖޭގެ ހުރިހާ ދާއިރާއެއްގައި މަސައްކަތް ކުރާ ވިޔަފާރިވެރިންނަށް ބާއްވާ ކޯޕަރޭޓް މޯލްޑިވްސް ބިޒްނަސް އެކްސްޕޯ ފަށައިފިއެވެ.

މި އެކްސްޕޯ މި މަހުގެ 23 ވަނަ ދުވަހު ފަށާފައިވާއިރު އެކްސްޕޯ ކުރިއަށްދާނީ މި މަހުގެ 24 އަށް ދަރުބާރުގޭގައި މެންދުރު 1:30 އިން ފެށިގެން ރޭގަނޑު 11:30 ގެ ނިޔަލަށެވެ.

މިފަހަރުގެ އެކްސްޕޯގައި ވިޔަފާރީގެ ދާއިރާގެ 60 އަށް ވުރެ ގިނަ ވިޔަފާރިތައް އެގްޒިބިޓަރުންގެ ގޮތުގައި ބައިވެރިވެފައިވާ ކަމަށް އިވެންޓް އިންތިޒާމު ކުރާ އޯރކާ މީޑިއާ ގްރޫޕުން ބުނެފިއެވެ.

ބިޒްނަސް އެކްސްޕޯ އަކީ ބޮޑެތި ވިޔަފާރިތަކާއި، ކުދި އަދި މެދު ފަންތީގެ ވިޔަފާރިތަކައް، ވިޔަފާރި ކުރިއެރުވުމަށްޓަކައި ގުޅުން ބަދަހިކުރަންޖެހޭ ފަރާތްތަކާ ގުޅުން ބަދަހިކޮށް، ފޯރުކޮށްދޭ ޚިދުމަތްތަކާއި އުފެއްދުންތައް ޢާންމުންނަށް ދައްކާލުމުގެ ފުރުޞަތު ހޯދައިދިނުމުގެ ގޮތުން ބާއްވާ އެކްސްޕޯއެކެވެ.

އެކްސްޕޯގެ ތެރެއިން ވިޔަފާރިއާ ގުޅުން ހުރި ހަތަރު ސަމިޓެއް ބޭއްވުމަށް ވަނީ ހަމަޖެހިފައެވެ. އެއީ ވިޔަފާރިވެރިންނަށް ޚާއްޞަ ސަމިޓަކާއި، އަންހެނުންނަށް ޚާއްޞަ ސަމިޓެއްގެ އިތުރުން މޯލްޑިވްސް ޓޫރިޒަމް ޕްރޮފެޝަނަލް ސަމިޓާއި، މޯލްޑިވްސް ފައިނޭންސް ޕްރޮފެޝަނަލް ސަމިޓެވެ.

ސަމިޓުތަކުގެ ވާހަކަދައްކަވާ ބޭފުޅުންގެ ތެރޭގައި ހިމެނެނީ އެކިއެކި ފަންނުތަކުގެ ފާހަގަކޮށްލެވޭ ބޭފުޅުންނެވެ. މި ބޭފުޅުން، އެ ސަމިޓުތަކުގެ ލިބިފައިވާ ކާމިޔާބީއާއި ތަޖުރިބާ، އެހެން ވިޔަފާރިވެރިންނާއި ވިޔަފާރިއަށް ޝައުޤުވެރިވާ ފަރާތްތަކާއި ޙިއްސާ ކުރުމުގެ ފުރުޞަތު ލިބިގެންދާނެއެވެ. އަދި ވިޔަފާރިވެރިންނަށް ބޭނުންވާ ކަންކަމާއި، އެފަރާތްތަކަށް ދިމާވާ ގޮންޖެހުންތަކުން އަރައިގަތުމަށް ކުރެވިދާނެ ކަންކަމާ މެދު ބައިވެރިންގެ މެދުގައި ޚިޔާލު ބަދަލު ކުރުމުގެ ފުރުޞަތު ވެސް ސަމިޓުތަކުގެ ބައިވެރިންނަށް ލިބިގެންދާނެއެވެ.

މިއީ، މި އެކްސްޕޯ ބާއްވާ 2 ވަނަ އަހަރެވެ.