2020 ވަނަ އަހަރުގެ އެމްއެންޔޫއެސްޔޫ މާލޭ ކެމްޕަހުގެ ގޮފިތައް އިފްތިތާހުކޮށްފިއެވެ.

އެމްއެންޔޫ ސެންޓްރަލް އެޑްމިނިސްޓްރޭޝަން (ސީއޭ) އޮޑިޓޯރިއަމްގައި ކުރިޔަށްދިޔަ ހަފްލާ ޝަރަފްވެރިކޮށްދެއްވީ މިިނިސްޓްރީ އޮފް ޔޫތް، ސްޕޯޓްސް އެންޑް ކޮމިއުނިޓީ އެމްޕަވަރމެންޓްގެ ސީނިއާ ޕޮލެސީ ޑިރެކްޓާރ އަދި ޖަމިއްޔާތަކުގެ ރެޖިސްޓްރާ އަލްފާޟިލް އަހްމަދު އިރާޝް އެވެ. މީގެ އިތުރުން އެމްއެންޔޫގެ އިސްވެރިންނާއި އެމްޓީސީސީގެ ޗީފް އޮޕަރޭޓިން އޮފިސަރ އަލްފާޟިލް ޝާހިދު ހުސެއިން މޫސާ ބައިވެރިވެވަޑައިގެންނެވިއެވެ.

މި ހަފްލާގައި އެމްއެންޔޫއެސްޔޫގެ މާލޭ ކެމްޕަހުގެ 10 ގޮފީގެ 60 މެމްބަރުންނަށް ވަނީ މަގާމުތައް ހަވާލުކޮށްފައިވެއެވެ. އަދި މި ހަފްލާގައި އެމްއެންޔޫގެ ދެވަނައަށް އެންމެ މަތީ ޝަރަފް އެމްއެންޔޫއެސްޔޫ އަލްމަރްހޫމް އަހުމަދު ނަސީރުގެ ހަދާނުގައި ދެވޭ ޝަރަފްވެރިކަމުގެ އިނާމް އަބްދުﷲ އަތޫފް އާތިފް އަށް ވަނީ އަރުވައިފައެވެ.

މި ހަފްލާގައި ވާހަކަފުޅުދައްކަވަމުން އަހްމަދު އިރާޝް ވިދާޅުވީ އެމްއެންޔޫއެސްޔޫ އަކީ މިހާރު ރާއްޖޭގައި އޮތް އެންމެ މެމްބަރުން ގިނަ ޖަމިއްޔާ ކަމަށާއި މި ޖަމިއްޔާއަކީ ޔޫތް މިނިސްޓްރީއާއި ވަރަށް ގާތް ގުޅުމެއް ބާއްވާ ޖަމިއްޔާއެއް ކަމަށެވެ. މީގެ އިތުރުން އިރާޝް ވިދާޅުވީ ދިވެހިރާއްޖެ އަކީ އެތަކެއް ބައެއްގެ ލޯ އަމާޒުވެފައިވާ ގައުމެއް ކަމަށާއި ރާއްޖޭގެ ފަސްވަނަ ބާރަކީ މަދަނީ ޖަމިއްޔާ ކަމަށެވެ. އަދި އެމްއެންޔޫއެސްޔޫ އަކީ ހުރިހާ ޖަމިއްޔާއަކަށް ނަމޫނާ ޖަމިއްޔާއެއް ކަމަށެވެ.

އެމްއެންޔޫގެ ވައިސް ޗާންސެލަރ ޑރ. މުހައަމްދު ޝަރީފް ވިދާޅުވީ އެމްއެންޔޫއެސްޔޫގެ މަސައްކަތް ދަރިވަރުން ވަނީ ބަލައިގަނެފި ކަމަށާއި އެމްއެންޔޫއެސްޔޫ އަކީ އެމްއެންޔޫގެ ކުރިއެރުމަށް މުހިންމު ޖަމިއްޔާއެއް ކަމަށެވެ. މީގެ އިތުރުން ޝަރީފް ވިދާޅުވީ މިއަހަރުގެ ތެރޭގައި އެމްއެންޔޫއެސްޔޫގެ ގޮފިތަކުން އިލްމީ ގިނަ ހަރަކާތްތަކެއް ދަރިވަރުންނާއި ގުޅިގެން ކުރިޔަށް ގެންދާނެ ކަމަށް އުންމީދު ކުރައްވާ ކަަމަށެވެ.

އެމްއެންޔޫއެސްޔޫގެ އެޑްވައިޒަރީ ބޯޑު މެމްބަރ އަރުޝަދު އަޝްރަފް ވިދާޅުވީ މި މަސައްކަތް އެންމެ ފުރަތަމަ ފެށިއިރު ގިނަ ގޮންޖެހުންތަކެއް ކުރިމަތިވި ކަމަށާއި އެންމެ ބޮޑު ގޮންޖެހުމަކަށް ކުރިމަތިވި ގޮންޖެހުމަކީ ޒުވާން ކުދިންތަކެއް ގޮވައިގެން ނުކުންނަން ޖެހުން ކަމަށެވެ. ނަމަވެސް މިއަދު ޔޫނިއަންގެ ހުރިހާ ހަރަކާތެއް ހިންގުމުގައި އެންމެ ބޮޑު އެހީއެއް ލިބެމުން އަންނަނީ 17 އަހަރާއި 21 އަހަރާއި ދެމެދުގެ ޒުވާން ކުދިންގެ ފަރާތުން ކަމަށެވެ.

އެމްއެންޔޫއެސްޔޫ އަކީ މިނިސްޓްރީ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަރމެންޓްގައި ރަޖިސްޓްރީ ކޮށްގެން ހިންގަމުން އަންނަ މަދަނީ ޖަމިއްޔާއެކެވެ. އަދި މި ޖަމިއްޔާއަކީ އެމްއެންޔޫގެ ކައުންސިލުން ހުއްދަލިބި އެމްއެންޔޫގައި ހަރަކާތްތެރިވަމުން އަންނަ ޖަމިއްޔާއެކެވެ