ޖަޕާނު: ރާއްޖޭގެ ތަރައްޤީގެ މުހިންމު ބައިވެރިއެއް
1996 ވަނަ އަހަރުން ފެށިގެން 15 ޕްރޮޖެކްޓެއްގެ މަސައްކަތް ޖަޕާނު ސަރުކާރުން ރާއްޖޭގައި ކޮށްފައިވޭ
ޖަޕާނުގެ ޤައުމީ ދުވަސް ފާހަގަކުރުމަށް ބޭއްވި ހަފްލާގެ ތެރެއިން
ޖަޕާނުން ރާއްޖެއަށް މިހާރުވެސް ދެމުންދާ އެހީތެރިކަން ކުރިޔަށް އޮތް ތަނުގައިވެސް އެގޮތަށް ދެމުންގެންދާނެ ކަމަށް ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ކީކޯ ޔަނާއީ ވިދާޅުވެއްޖެ އެވެ.
ޖަޕާނުގެ ޤައުމީ ދުވަސް ފާހަގަކުރުމުގެ ގޮތުން ހޮޓެލް ޖެންގައި ބޭއްވި ހަފްލާގައި ވާހަކަ ދައްކަވަމުން ޔަނާއީ ވިދާޅުވީ ޖަޕާނާއި ރާއްޖެ އާ ދެމެދު ޑިޕްލޮމެޓިކް ގުޅުން ރަސްމީކޮށް ގާއިމުކޮށްފައިވަނީ 1967 ވަނަ އަހަރު ކަމަށެވެ. އޭގެފަހުން ދެގައުމުގެ ގުޅުން އެކި ދާއިރާތަކުން ބަދަހިކުރަމުންދާކަން ފާހަގަކުރައްވާ ސަފީރު ވިދާޅުވީ ދެ ގައުމު ގުޅިގެން މިސަރަހައްދުގެ މައްސަލަތަކާއި ދުނިޔޭގެ މައްސަލަތަކަށް މަސައްކަތް ކުރެވޭނެ ކަމަށް އުންމީދުކުރައްވާ ކަމަށެވެ. މީގެއިތުރުން ރާއްޖެއަކީ އިންޑޯ ޕެސިޕިކް ވިޝަން ކުރިޔަށް ގެންދިޔުމުގައިވެސް މުހިންމު ރޯލެއް އަދާކުރަމުންދާ ގައުމެއް ކަމަށް ޖަޕާނުގެ ސަފީރު ވިދާޅުވި އެވެ.
ސަފީރު އިތުރަށް ވިދާޅުވީ ރާއްޖެ މިހާރު މިދަނީ ތަރައްޤީގެ އައު ހަރުފަތަކަށް ކަމަށެވެ. 1996 ވަނަ އަހަރުން ފެށިގެން 15 ޕްރޮޖެކްޓެއްގެ މަސައްކަތް ޖަޕާނު ސަރުކާރުން ރާއްޖޭގައި ކޮށްފައިވާކަމަށް ސަފީރު ވިދާޅުވި އެވެ. ނަމަވެސް މިިދިޔަ އަހަރު ވާނީ ދޭ އެހީތެރިކަން އިތުރުކޮށްފައިކަމަށް ސަފީރު ވިދާޅުވި އެވެ.
ޖަޕާނަށް ރާއްޖޭގެ އިގްތިޞާދަށާއި ތަރައްޤީއަށް އެހީތެރިކަން ފޯރުކޮށްދެވޭތީ އެކަމާ އުފާކުރައްވާ ކަމަށް ސަފީރު ވިދާޅުވި އެވެ. އަދި ޖަޕާނުން ރާއްޖެއަށް އެހީވެދޭއިރު އެންމެ ބޮޑަށް ބަލަނީ ސޯޝިއޯ އެކޮނޮމިކް ތަރައްޤީއަށް ކަމަށް ސަފީރު ވިދާޅުވި އެވެ. މީގެއިތުރުން ރާއްޖޭގައި އިންވެސްޓް ކުރުމަށް ޖަޕާނުގެ ކުންފުނިތަކުން ޝައުގުވެރިކަން ފާޅުކުރަމުންދާ ކަންވެސް ސަފީރުގެ ވާހަކަފުޅުގައި ފާހަގަކުރެއްވި އެވެ.
މިހަފްލާގައި ޝަރަފްވެރި މެހެމާނެއްގެ ގޮތުގައި ބައިވެރިވެވަޑައިގެން ޑިފެންސް މިނިސްޓަރ އަލްއުސްތާޛާ މާރިޔާ އަހުމަދު ދީދީ ވިދާޅުވީ ޖަޕާނާއި ރާއްޖޭގެ ގުޅުން 53 އަހަރު ކުރިން ގާއިމުވެގެން ދިޔުމާއެކު އެކި ދާއިރާތަކުން ވަނީ ގުޅުން ބަދަހިވެފައި ކަމަށެވެ. ޖަޕާނުން ވަނީ ސޯޝިއޯ އެކޮނޮމިކް ގެ އެކި ދާއިރާތަކުން އެހީތެރިކަން ފޯރުކޮށްދީފައިކަމަށް އެކަމަނާހެ ވާހަކަފުޅުގައި ފާހަގަކުރެއްވި އެވެ.
މާރިޔާ ވިދާޅުވީ ޖަޕާނާއި ރާއްޖެއާ ދެމެދު އޮތީ ޚަރުދަނާ ގުޅުމެއް ކަމަށެވެ.
