ނަހުލާގެ ފޯން ކޯލް: "ފޯނު ކަނޑާލާފަވެސް ކީކޭތަ ތިވިދާޅުވީ"
23 ފެބުރުއަރީ 2020 | އާދީއްތަ 18:03ކުރިން އާންމުވި ފޯނު ކޯލަކީ ސައްހަ ކޯލެއް ކަމަށް ނަހުލާ ވިދާޅުވޭ
ޓްރާންސްޕޯޓް މިނިސްޓަރު އާއިޝަތު ނަހުލާ
ޓްރާންސްޕޯޓް މިނިސްޓަރު އައިޝަތު ނަހުލާ އާއި ޓޫރިޒަމް މިނިސްޓަރު އަލީ ވަހީދުގެ ފޯން ކޯލެއްކަމަށް ބުނާ ފޯނު ކޯލެއްގެ އޯޑިއޯއެއް އަނެއްކާވެސް ލީކް ވެއްޖެ އެވެ.
ސޯޝަލް މީޑިއާގައި އާދިއްތަ ދުވަހު އާއްމުވެފައިވާ އޯޑިއޯގައި ވަނީ މީގެކުރިން ނަހުލާއާ އާއި އަލީ ވަހީދުގެ ލިކުވި ފޯނު ކޯލުގެ އޯޑިއާއާ ގުޅިގެން ނުރުހުން ފާޅުކުރައްވާފަ އެވެ. ކުރިން ލީކްވި އޮޑިއޯއަކީ އެޑިޓްކޮށްފައިވާ އޯޑިއޯއެއް ކަމަށް އަލީ ވަހީދު މީގެކުރިން ވިދާޅުވިނަމަވެސް މިހާރު ލީކުވެގެން އުޅޭ އޯޑިއޯގައި، ކުރިން ލީކްވެފައިވާ އޯޑިއޯއަކީ ސައްހަ އޯޑިއޯއެއްކަމަށް ނަހުލާ ވިދާޅުވެ އެވެ.
ކުރިން ލީކްވި އޯޑިއޯއަކީ، އެ ދެ ބޭފުޅުންގެ ފޯނުކޯލެއް އަލީ ވަހީދުގެ ފޯން ސްޕީކަރަށް ލައިގެން އޭނާގެ ރައްޓެހިންތަކަކާކު ތިއްބަވައިގެން ހުތުރުބަހުން ވާހަކަދައްކާ އޯޑިއޯ އެވެ. އަދި ނަހުލާގެ ފޯން ކޯލް ނިމުމާއެކު، ނަހުލާއަށް ނިސްބަތްކޮށް، ހުތުރު ބަހުން ވާހަކަ ދައްކާފައިވެއެވެ.
މިހާރު ލީކުވެގެން އުޅޭ އޯޑިއޯގައި ނަހުލާ ވަނީ އެފޯނު ކޯލް އަލީ ވަހީދުގެ ރައްޓެހިންތަކަކާއެކު ތިއްބަވައި، ސްޕީކަރަށް ލައިގެން ވާހަކަ ދައްކާފައިވާތީ އާއި، އަދި ފޯން ބޭއްވުމަށްފަހު، ނަހުލާއާ ގުޅޭގޮތުން އަލީ ވަހީދު ދެއްކެވި ހުތުރު ވާހަކަތަކާ ގުޅިގެންވެސް ނަހުލާ ވަނީ ނުރުހުން ފާޅު ކުރައްވާފަ އެވެ. "ފޯނު ކަނޑާލާފައިވެސް ކީކޭތަ ތިވިދާޅުވީ،" މިހާރު ލީކުވެގެން އުޅޭ ފޯން ކޯލްގެ އޯޑިއޯގައި ނަހުލާ ވިދާޅު ވެއެވެ.
ނަމަވެސް އަލީ ވަހީދު ވިދާޅުވަނީ އެފަދަ ކަމެއް ނުކުރައްވާކަމަށާއި އެއީ އެޑިޓް ކޮށްފައިވާ އޯޑިއޯއެއް ކަމަށް ވިދާޅުވެ ތަކުރާރު ކުރައްވާފަ އެވެ. "އެކަމަކު ކިހިނެއްތޯ އެހެން އެޑިޓް ކުރަނީ، އަޅުގަނޑަށް އެނގޭނެ ދެއްތޯ ވާހަކަ ދެއްކެވުނު ފޯން ކޯލެއްކަން،" މިހާރު ލީކުވެގެން އުޅޭ ފޯން ކޯލުގެ އޯޑިއޯގައި ނަހުލާ ވިދާޅު ވެއެވެ.
ނަހުލާގެ އިތުރުން އެޑިއުކޭޝަން މިނިސްޓަރު ޑރ. އާއިޝަތު އަލީ އާދި ހެލްތް މިނިސްޓަރު އަބްދުﷲ އަމީނުއަށް ވެސް އަލީ ވަހީދު ފާޑު ވިދާޅުވާ އޯޑިއޯތަކެއް ކުރިން އާންމުވި އެވެ.
މިހާރަކަށް އައިސް އަލީ ވަހީދުގެ ލީކު ވަމުންދާ އޯޑިއޯތަކާއި ގުޅިގެން އަލީ ވަހީދު ވަނީ އެއީ އެޑިޓްކޮށްފައިވާ އޯޑިއޯތަކެއް ކަމަށް ވިދާޅުވެ، އަދި ތަހުގީގު ހިންގައިފި ނަމަ، އޭގެ ހަގީގަތް ސާފުވާނެ ކަމަށް ވިދާޅުވެފަ އެވެ.
މިނިސްޓަރު ނަހުލާއާ ގުޅޭ، ލީކުވެފައި އޯޑިއޯގެ މައްސަލަ، ޖިންސީ ފުރައްސާރަކުރި ކަމަށް ތުހުމަތު ކުރައްވައި، އެމައްސަލަ ވަނީ ރައީސުލްޖުމްހޫރިއްޔާގެ އޮފީހަށް ހުށަހަޅުއްވާފަ ކަމަށް ބައެއް ނޫސްތަކުގައި ރިޕޯޓް ކޮށްފައި ވެއެވެ. ނަމަވެސް ރައީސް އޮފީހުން އެކަމާބެހޭ ގޮތުން އަދި މިހާތަނަށް ކޮމެންޓެއް ކުރައްވާފައެއް ނުވެއެވެ.
