ރީބްރޯޑްކާސްޓިންގގެ ޚިދުމަތް ރެގިއުލޭޓްކުރުމަށް ހުރި ދަތިތަކާ ގުޅޭގޮތުން ބްރޯޑްކޮމް އިން އެލް.ޖީ.އޭ.އާ މަޝްވަރާކޮށްފި
ރީބްރޯޑްކާސްޓިންގގެ މައްސަލަތައް ބެލުމަށް ބޭނުންވާ މަޢުލޫމާތު ހޯދުމަށް ބައެއް ރަށު ކައުންސިލްތަކުން ލިބެންވާ އެއްބާރުލުން ނުލިބޭ ކަމަށް ބްރޯޑްކޮމް އިން ބުނޭ
ބްރޯޑްކޮމް އިން އެލްޖީއޭ އާއެކު ބޭއްވި ބައްދަލުވުމުގެ ތެރެއިން
ބައެއް ރަށްރަށުގައި ޤަވާއިދާ ޚިލާފަށް ރީބްރޯޑްކާސްޓިންގގެ ޚިދުމަތް ދެމުންދާތީ ހުށަހެޅޭ މައްސަލަތައް ބެލުމުގައި، ކައުންސިލްތަކުން ހޯދަންޖެހޭ މަޢުލޫމާތު ލިބުމުގައި ދިމާވާ ދަތިތަކާ ގުޅޭގޮތުން މޯލްޑިވްސް ބްރޯޑްކާސްޓިންގ ކޮމިޝަނުން ލޯކަލް ގަވަރންމަންޓް އޮތޯރިޓީއާއެކު، މަޝްވަރާކޮށްފިއެވެ.
މި ބައްދަލުވުމުގައި ކޮމިޝަނުން ފާހަގަކުރި އެންމެ ބޮޑު ކަންބޮޑުވުމަކީ، ބައެއް ރަށްރަށުގައި ޤަވާއިދާ ޚިލާފަށް ދެމުންދާ ރީބްރޯޑްކާސްޓިންގގެ މައްސަލަތައް ބެލުމަށް ބޭނުންވާ މަޢުލޫމާތު ހޯދުމަށް ބައެއް ރަށު ކައުންސިލްތަކުން ލިބެންވާ އެއްބާރުލުން ނުލިބޭ ކަމުގެ ކަންބޮޑުވުމެވެ.
އަދި، މި މައްސަލަތައް ބެލުމަށް އެލް.ޖީ.އޭ.އާއި ރަށު ކައުންސިލްތަކުގެ ފުރިހަމަ އެއްބާރުލުން ބޭނުންވާ ކަމަށާއި، ބައެއް ރަށްރަށުގައި ޤަވާއިދާ ޚިލާފަށް ދެމުންދާ ރީބްރޯޑްކާސްޓިންގެ ޚިދުމަތްތަކާ ގުޅޭ މައްސަލަތައް ބެލުމަށް މިކަމުގެ ސަބަބުން ދަތިވެފައި ކަމުގައި ކޮމިޝަނުން ފާހަގަކުރިއެވެ.
މީގެއިތުރުން، ރީބްރޯޑްކާސްޓިންގ ޚިދުމަތް ރަށްރަށުގައި ޤަވާއިދާ އެއްގޮތަށް ދިނުމަށް ބާރުއެޅުމުގެ ގޮތުން، ރަށު ކައުންސިލްތަކަށް ޚާއްޞަކޮށްގެން އަހުލުވެރިކުރުމުގެ ޕްރޮގުރާމުތައް ހިންގުމާއި ގުޅޭގޮތުންނާއި، ޤަވާއިދާ ޚިލާފަށް މި ޚިދުމަތް ދިނުމުގެ ސަބަބުން ކޮމިޝަނުން ބަލަމުންދާ ގިނަ ދުވަސްވީ މައްސަލަތައް އަވަހަށް ޙައްލުކުރުމަށް ދެ މުވައްސަސާއިން އިތުރު މަސައްކަތްތަކެއް ކުރުމާ ގުޅޭގޮތުންވެސް މަޝްވަރާކުރެއްވިއެވެ.
