އެމްޑީޕީގެ ހުރިހާ ކެންޑިޑޭޓުންގެ ފޯމްތައް ބަލައިގެންފި: އެމްޑީޕީ
23 ފެބުރުއަރީ 2020 | އާދީއްތަ 08:03ކައުންސިލްތަކުގެ 982 މަގާމަކަށް ބޭފުޅުން އިންތިހާބު ކުރާނެ
އެމްޑީޕީގެ ކެމްޕެއިން ސްޕޯކްސްޕާސަން އަފްޝަން ލަތީފް
ލޯކަލް ކައުންސިލްތަކުގެ އިންތިހާބުގައި އެމްޑީޕީގެ ޓިކެޓްގައި ވާދަކުރާ ހުރިހާ ކެންޑިޑޭޓުންގެ ފޯމްތައް އިލެކްޝަންސް ކޮމިޝަނުން ބަލައިގެންފައިވާ ކަމަށް އެމްޑީޕީން ބުނެފި އެވެ.
އެމްޑީޕީގެ ކެމްޕެއިން މައި އޮފީހުގައި އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ކެމްޕެއިން ސްޕޯކްސްޕާސަން އަފްޝަން ލަތީފް ވިދާޅުވީ، ލޯކަލް ކައުންސިލްތަކުގެ އިންތިހާބުގައި އެމްޑީޕީން ވާދަކުރާ 877 ކެންޑިޑޭޓުންގެ ފޯމް އިލެކްޝަންސް ކޮމިޝަނުން ބަލައިގެންފައިވާކަމަށެވެ.
އަފްޝަން ވިދާޅުވީ، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބުގައި މިވަގުތު 442 ކެންޑިޑޭޓުން ކަނޑައެޅިފައިވާ ކަމަށެވެ. އެމްޑީޕީން ވަނީ މިދިއަ ހަފްތާގައި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ޕްރައިމަރީ ބާއްވާފަ އެވެ. އެޕްރައިމަރީ ކާމިޔަބުކުރެއްވި 442 ކެންޑިޑޭޓުންގެ އިތުރުން، އިތުރު ފަރާތްތަކަކަށް ޓިކެޓް ލިބުމުގެ ފުރުސަތު ވެސް އެބައޮތް ކަމަށެވެ.
އަންހެންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބުގައި ވާދަކުރުމުގެ ފުރުސަތު މިމަހުގެ 24 ވަނަ ދުވަހާ ހަމައަށް ވަނީ އިލެކްޝަންސް ކޮމިޝަނުން ހުޅުވާލާފަ އެވެ.
ކައުންސިލްތަކަށް ކުރިމަތި ލުމުގެ ފުރުސަތު މިދިޔަ ބުރާސްފަތި ދުވަހަށް ހަމަވެފައިވާއިރު، 3،000 އެއްހާ ފޯމް އިލެކްޝަންސް ކޮމިޝަނަށް ހުށަހެޅިފައިވާ ކަމަށް އެ ކޮމިޝަނުން ބުރާސްފަތި ދުވަހު ބުނެފައި ވެއެވެ.
ލޯކަލް ކައުންސިލްތަކުގެ އިންތިހާބުގައި 982 މަގާމަށް ބޭފުޅުން އިންތިހާބު ކުރަންޖެހެ އެވެ.
އެމްޑީޕީން ބުނަނީ ލޯކަލް ކައުންސިލްތަކުގެ އިންތިހާބު، އެމްޑީޕީން ފަށާނީވެސް 60 އިންސައްތަ ގޮނޑިޔާއެކު ކަމަށެވެ.
