ކްރޮއޭޝިއާގެ ރައީސް ހުވާކުރުމުގެ ރަސްމިއްޔާތުގައި ޤައުމީ ސަލާމް ހުށައެޅި ލަވަކިއުންތެރިއާއަށް ޖިނާއީ ދައުވާއެއް!

ކްރޮއޭޝިއާގެ އައު ރައީސް ޒޮރަން މިލާނޮވިޗްގެ ރައީސްކަމުގެ ހުވާކުރުމުގެ ރަސްމިއްޔާތުގައި އެ ޤައުމުގެ ޤައުމީ ސަލާމް ހުށައެޅި ލަވަކިއުންތެރިއާގެ މައްޗަށް ޖިނާޢީ ދައުވާއެއް އުފުލައިފިއެވެ.

އަންގާރަ ދުވަހު އޮތް މި ރަސްމިއްޔާތުގައި ޤައުމީ ސަލާމް ހުށައަޅާދީފައިވަނީ އެ ޤައުމުގެ މަޝްހޫރު ލަވަކިއުންތެރިއެއް ކަމަށްވާ ޔޮސިޕާ ލީސަކް (70) އެވެ. ޔޮސިޕާ ލީސަކްއަކީ އޭނާގެ 53 އަހަރުވީ ދިގު ކެރިއަރގައި ގިނަ އެވަރޑްތަކެއް ހާސިލުކޮށް، އެތައް ބައެއްގެ މަޤުބޫލުކަން ހޯދާފައިވާ ފަންނާނެކެވެ.

އޭނާއާ ދެކޮޅަށް ޤާނޫނީ ވަކީލަކު ހުށައެޅި މި ޖިނާޢީ ދައުވާގައި ބުނެފައިވަނީ އޭނާ ޤަސްތުގައި ޤައުމީ ސަލާމަށް އިޙްތިރާމު ކުޑަކޮށްފައިވާ ކަމަށާއި، މަލާމަތް ކޮށްފައިވާ ކަމަށެވެ.

ކްރޮއޭޝިއާގެ ޤާނޫނު ބުނާ ގޮތުން ޤައުމީ ސަލާމަށް ޤަދަރު ކުޑަވާނެ ފަދަ ޢަމަލެއް ކުރުމަކީ ޖިނާޢީ ބޮޑު ކުށެކެވެ. އަދި އެކަމުގެ އަދަބެއްގެ ގޮތުގައި މަދުވެގެން 1 އަހަރުގެ ޖަލު ޙުކުމެއް އަންނާނެއެވެ.

ބީބީސީގައި ރިޕޯޓުކޮށްފައިވާ ގޮތުން އޭނާ ޤައުމީ ސަލާމް ހުށައަޅާދީފައިވަނީ ޤައުމީ ސަލާމް ޢާންމުކޮށް ކިޔާ ވަރަށްވުރެ ކުޑަކޮށް ތަފާތު ޓޯނެއްގައެވެ. ނަމަވެސް އޭނާއާ ދެކޮޅަށް ހުށައަޅާފައިވާ ދަޢުވާގައި ބުނެފައިވަނީ އެއީ އިޖުތިމާޢީ މިންގަނޑުން ބަލާއިރު ބަލައިގަނެވޭނެ ކަމެއް ނޫން ކަމަށާއި، އެއީ މުޅި ޤައުމަށްވެސް ކުރި މަލާމާތެއް ކަމަށެވެ.

އެކަމާ ގުޅޭގޮތުން މިއުޒިކީ ފަންނާނުން ވަނީ ކަންބޮޑުވުން ފާޅުކޮށް، އެއީ ފަންނާނުންގެ މިނިވަންކަން ނަގާލުން ކަމުގައި ބުނެފައެވެ. އަދި އެއީ ވަކީލު މީޑިއާގެ ސަމާލުކަން ހޯދުމަށް ކުރި ކަމެއްގެ ގޮތުގައި އެމީހުން ސިފަކުރެއެވެ.