ހުރިހާ މަޝްރޫއެއް މަރުކަޒީކޮށް ނުހިންގޭނެ، ކައުންސިލްތަކުގެ އެއްބާރުލުން ބޭނުން: ރައީސް
21 ފެބުރުއަރީ 2020 | ހުކުރު 17:59މަޝްރޫޢުތައް ހިންގާނެ ފުރިހަމަ އިޚްތިޔާރު ޤާނޫނޫން ވަނީ ކައުންސިލްތަކަށް ދެވިފައި: ރައީސް
ރައީސް ސޯލިހު ރަށްވެހި ފަތިސް ޖަލްސާގައި ވާހަކަފުޅު ދައްކަވަނީ
މި ހިނގާ އަހަރު މުޅި ރާއްޖޭގައި 500 ށް ވުރެ ގިނަ މަޝްރޫޢު ހިންގުމަށް ހަމަޖެހިފައިވާކަމަށާއި މަރުކަޒީ ކޮށް އެހުރިހާ މަޝްރޫޢުތައް ހިންގުމަކީ ނާދިރުކަމެއް ކަަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެ އެވެ.
ކުރިޔަށް އޮތް ލޯކަލް ކައުންސިލް އިންތިޚާބުގެ ކެމްޕެއިން އިފްތިތާހުކުރުމަށް އެމްޑީޕީން ބޭއްވި "ރަށްވެހިފަތިސް" ޖަލްސާގައި ވާހަކަ ދައްކަވަމުން ރައީސް ވިދާޅުވީ ކައުންސިލްތަކަށް މިހާރު ދެވިފައިވާ ބާރާއެކީގައި މިފަދަ މަޝްރޫޢުތައް ހިންގާނެ ފުރިހަމަ އިޚްތިޔާރު ޤާނޫނޫން މިވަނީ ކައުންސިލްތަކަށް ދެވިފައިކަމަށެވެ. އެހެންކަމުން ސަރުކާރާ އެކީގައި މިމަޝްރޫޢުތައް ހިންގާނެ ބަޔަކު ކުރިޔަށް އޮތް ކައުންސިލް އިންތިޚާބުގައި ހޮވަންޖެހޭ ކަަމަށް ރައީސް ވިދާޅުވި އެވެ.
ރައީސްގެ ވާހަކަފުޅުގައި އިތުރަށް ވިދާޅުވީ ވޭތުވެދިޔަ ތަނަށް ބަލާއިރު ވެރިކަން ހިންގުމުގައި ތަރައްޤީގެ މަޝްރޫޢުތައް މަރުކަޒީ އުސޫލުން ހިންގުމުގެ ނަތީޖާއެއްގެ ގޮތުން ރާއްޖޭގެ ރަށްތައް ފަޅުވުމުގެ އިތުރަށް އެކަމުގެ ހިތި ނަތީޖާ އެންމެ ބޮޑަށް ފެންނަން އޮތީ މާލެއިން ކަމަށެވެ.ތޮށްޖެހިފައިވުމާއިއިޖުތިމާޢީ މައްސަލަތަކުގެ ހާއްޔަކަށްވެފައިވާ ވެރިކަންކުރާ މާލެއަށް އޮތް އެންމެ ބޮޑު ހައްލަކީވެސް ލާމަރުކަޒުކުރުން ކަމަށް ރައީސް ވިދާޅުވި އެވެ.
ރައީސް ވިދާޅުވީ އެންމެ އަސާސީ ޚިދުމަތްތައް ލިބިގަތުމަށް ރާއްޖޭގެ ރައްޔިތުން މާލެއަށް ޖަމާވާތާ އެތައް އަހަރެއް ވެއްޖެ ކަމަށެވެ. އަދި ތަރައްޤީގެ ނަމުގައި ކުރި ކަންކަމުން ރައްޔިތުންނަށް އޭގެ ފައިދާ ނުލިބި މާލެއަށް ލިބެމުންއައީ ނިކަމެތިކަންކަމަށް ރައީސް ވިދާޅުވި އެވެ.
އަދި އެކަމަކީ ތަރައްޤީ ނަމުގައި ރާއްޖޭގެ ރައްޔިތުންގެ ހިތްތަކުގައި އަތޮޅު ތަރައްޤީކުރުމަށާއި ރަށުގެ ތަރައްޤީއަށް އޮތް އުންމީދު ފަނޑުކޮށްލި ވިސްނުމެއްކަމަށާއި އެކަމުގެ ސަބަބުން މުޅި ރާއްޖެ ތަރައްޤީކުރުމަށް ހުރަސް އެޅިފައިވާކަމަށް ރައީސް ވިދާޅުވި އެވެ. މީގެއިތުރުން ރައީސް ވިދާޅުވީ ގިނަ ދުވަސްތަކެއް ވަންދެން އުމްރާނީ ތަރައްޤީގެ ވާހަކަ ދައްކަމުން އަންނަކަމަށާއި އެއީ މުހިންމު ވާހަކަ އެއްކަމަށެވެ. އެހެންނަމަވެސް 2020 ވަނަ އަހަރާ ހަމައަށް ސާފުބޯފެނާއި ނަރުދަމާ ލިބެން އޮތީ އެންމެ 40 ރަށުން ކަމަށްވާއިރު އެއީ ލަދުވެތި ވާހަކައެއްކަމަށް ރައީސް ވިދާޅުވި އެވެ
ރައީސް ވިދާޅުވީ ރަށްވެހި ފަތިހަކަށް މިއަލިވިލެގެން ދަނީ ގިނަ ތަޖުރިބާތަކެއް ކުރުމަށްފަހު ކަމަށެވެ. ޒަމާންތަކެއް ވަންދެން މުޅި ރާއްޖޭގެ ސިޔާސީ ފިކުރު ބަދަލުކުރުމަށް ވޭންހުރި ބޮޑެތި މަސައްކަތްތަކެއް ކުރުމަށްފަހުގައި ކަމަށް ރައީސް ވިދާޅުވި އެވެ. އަދި މިއީ ވަރަށް ބޮޑު އުންމީދުގެ ވަގުތުކޮޅެއްކަމަށް ރައީސް ވިދާޅުވި އެވެ.
ރައީސް ވަރަށް އަސަރާއެކު ވިދާޅުވީ މިއީ އެމަނިކުފާނުގެ ހަޔާތްޕުޅުގައި އެންމެ ދެކެން ބޭނުންވި އެއް ދުވަސް ކަމަށެވެ.
