ޝީޝާ ބަރތަކަށް ހަމަލާދިން ކަނާތުފިޔައިގެ ހަރުކަށި ފިކުރުގެ މީހާ މަރުވެފައި އޮއްވާ ފެނިއްޖެ

މިދިޔަ ބުދަ ދުވަހު ޖަރުމަނުގެ ޝީޝާ ބާރ ތަކަކަށް ބަޑީގެ ޙަމަލާތަކެއް ދިން ކަމަށް ތުހުމަތު ކުރެވޭ މީހާ އޭނާގެ ގޭގައި މަރުވެފައި އޮއްވައި ފެނިއްޖެއެވެ.

މި ޙަމަލާގައި 9 މީހަކު މަރުވެފައިވާއިރު، ފުރަތަމަ ޙަމަލާ ދީފައިވަނީ ޖަރުމަނުގެ މެދުތެރޭ އަވަށެއް ކަމަށްވާ ހަނާއުގެ މިޑްނައިޓް ޝީޝާ ބާރ އަކަށެވެ. އެގޮތުން މި ޙަމަލާ ދިނުމަށްފަހު ތުހުމަތު ކުރެވޭ މީހާ ކާރެއްގައި އެ ސަރަޙައްދާއި 2.5 ކިލޯމީޓަރު ދުރުގައި ހުރި "އެރީނާ ބާރ އެންޑް ކެފޭ" ކިޔާ ތަނަކަށްވަދެ އިތުރު ޙަމަލާތަކެއް ދީފައިވާކަމަށް މީޑިއާ ރިޕޯޓްތައް ބުނެއެވެ.

އެގޮތުން ސަވައިލެންސް ކެމެރާތަކާއި މަންޒަރުދުއް މީހުންގެ އެހީގައި ތުހުމަތު ކުރެވޭ މީހާ (ޓޮބިއަސް އާރ) ދިރިއުޅޭ ގެ ހޯދައި އެގެއަށް ފުލުހުން ދިޔައިރު، ގޭ ތެރޭގައި އޭނާއާއި އޭނާގެ 72 އަހަރުގެ މަންމަ މަރުވެފައި އޮއްވާ ފެނިފައިވާކަމަށާއި، އަދި އެ ދެމީހުން ކައިރީގައި ބަޑިއެއް އޮތް ކަމަށް ބީބީސީގައި ރިޕޯޓްކޮށްފައިވެއެވެ.

މި ޙަމަލާގައި އެކި ޤައުމުތަކަށް ނިސްބަތްވާ މީހުން މަރުވެފައިވާއިރު، އޭގެ ތެރޭގައި ބޮސްނިއާ މީހަކާއި، ބަލްގޭރިއާގެ އިތުރުން ރޮމޭނިއާއަށް ނިސްބަތްވާ މީހެއް ހިމެނޭކަމަށް ރިޕޯޓްތައް ބުނެއެވެ. އަދި މި ޙަމަލާއަކީވެސް ނަސްލީ ތަފާތު ކުރުމުގެ ވިސްނުމެއްގެ ތެރެއިން ދީފައިވާ ޙަމަލާއެއްގެ ގޮތުގައި އެކި ފަރާތްތަކުން ދަނީ ސިފަކުރަމުންނެވެ.

ބީބީސީގައި ރިޕޯޓްކޮށްފައިވާ ގޮތުގައި މި ޙަމަލާ ދިން މީހާ ވަނީ އިންޓަރނެޓުގެ ޒަރިއްޔާއިން އެފަދަ މެނިފެސްޓޯތައް ފަތުރަން މަސައްކަތް ކޮށްފައެވެ. އެގޮތުން ތުރުކީއާއި އިޒްރޭލް ހިމެނޭ ގޮތަށް 20 ޤައުމެއްގެ ރައްޔިތުންނަކީ "ނައްތާލަން" ޖެހޭ ބައެއްގެ ގޮތުގައި އޭނާ ވަނީ ސިފަކޮށްފައެވެ.

ލަންޑަންގައި ހުންނަ ޖަރުމަނުގެ ކައުންޓަރ ޓެރަރިޒަމް އެކްސްޕަރޓްވެސް ވަނީ މި ޙަމަލާއަކީ ކަނާތު ފިޔައިގެ ހަރުކަށި ފިކުރުގެ ވިސްނުމެއްގެ ދަށުން ދީފައިވާ ޙަމަލާއެއްގެ ގޮތުގައި ސިފަކޮށްފައެވެ. އެގޮތުން ނިމިދިޔަ އަހަރުގެ އޮކްޓޯބަރު މަހާއި، ޖޫން މަހުވެސް ޖަރުމަނުގައި އެފަދަ ޙަމަލާތަކެއް ދީފައިވެއެވެ.