ވަކި މީހަކަށްވީތީވެ ކުރާ ކަންތައް ފޮރުވައިގެން ނުތިބޭނަން: ނައިބު ރައީސް
ރާއްޖެއަށް އެކި ގޮތް ގޮތުން ބަދަލުތަކެއް ވަނީ އައިސްފައި: ނައިބް ރައީސް
\'\'މަސަލަސް ރާއްޖެ\'\' އިފްތިތާހު ކޮށްދެއްވައި ނައިބް ރައީސް ވާހަކަފުޅު ދައްކަވަނީ
މި ސަރުކާރަކީ ވަކި މީހަކު ކުރާ ކަންތައް ފޮރުވައިގެން، ތިބޭނޭ ބައެއް ނޫން ކަމަށާއި، އެއަށްވުރެ މާ ސާފުސީދާކޮށް ތިބި ބައެއް ކަމަށް ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ނައިބު ރައީސް އެހެން ވިދާޅުވީ، އިލެކްޝަންސް ކޮމިޝަނުން ފަރާތުން އިސް ނަގައިގެން 16 މުއައްސަސާއެއްގެ ބައިވެރިވުމާއެކު ބުރާސްފަތި ދުވަހުން ފެށިގެން އެއް އަހަރު ދުވަހުގެ މުއްދަތަށް ކުރިއަށްގެންދިއުމަށް ހަމަޖެހިފައިވާ ''މަސަލަސް ރާއްޖެ'' ހޭލުންތެރިކުރުވުމުގެ ފްރޮގުރާމުގައި ވާހަކަފުޅު ދައްކަވަމުންނެވެ.
ނައިބު ރައީސް ވިދާޅުވީ، ވޭތުވެދިޔަ އަހަރުތަކަށް ބަލައިފިނަމަ ރާއްޖެ އަށް އެކި ދާއިރާތަކުން ގިނަގުނަ ބަދަލުތަކެއް އަންނަން ފަށާފައިވާ ކަމަށެވެ. އެގޮތުން 2008 ވަނަ އަހަރު އައު ޤާނޫނުއަސާސީން ރާއްޖޭގެ ރައްޔިތުންނަށް ގިނަ ހައްޤުތަކެއް ލިބިފައިވާކަން ފާހަގަކުރައްވަމުން އެމަނިކުފާނު ވިދާޅުވީ، މުޅި ނިޒާމާއި ޤައުމުގެ ވެރިކަން ހިންގުމުގެ ނިޒާމު ވަނީ ޒަމާނާ އެއްގޮތަށް ޤާނޫނުއަސާސީން ބަދަލުކުރުމުގެ ޖާގަ ދީފައި ކަަމަށެވެ.
ބުރާސްފަތި ދުވަހުން ފެށިގެން އަމަލުކުރަން ފެށި ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނަށް އިޝާރާތް ކުރައްވާ ނައިބު ރައީސް ވިދާޅުވީ، އެ ޤާނޫނާއެކު ކުޑަކުދިންނަށްޓަކައި އެކަނި ވިސްނާ އޭގައި ބުނާ ކަންތައްތައް ހޯދައިދިނުމަށް ގިނަ މަސައްކަތްތަކެއް ކުރަންޖެހޭ ކަމަށެވެ.
އަދި ޤާނޫނުއަސާސީން ލިބިދީފައިވާ ޙައްޤުތަކުގެ ތެރެއިން މި ވާހަކަތައް ދައްކަން ޖެހޭ ކަމަށާއި، ކޮންމެ މީހަކަށްވެސް އެ މީހެއްގެ މައްސަލަތައް ކިޔައިދެވެން ޖެހޭ ކަމަށް ވިދާޅުވިއެވެ. އަދި ކަންކަން ފޮރުވުމެއް ނެތި، ހާމަކުރުމުގެ މުހިންމުކަމަށްވެސް ނައިބު ރައީސް އަލިއަޅުވާލެއްވިއެވެ.
އެކަން ކާމިޔާބު ކުރުމަށްޓަކައި އެންމެން އެއްކޮށް އެކުގައި މަސައްކަތްތަކެއް ކުރުމަށާއި، ކަންކަން ރަނގަޅު ކުރުމަށްޓަކައި، ކަންކަން ރަނގަޅުކުރެވޭނެ ދުވަހެއްގެ އިންތިޒާރުގައި އެންމެން ތިބުމަށް ނައިބު ރައީސް ވަނީ ގޮވާލައްވާފައެވެ.
